Angkon ang indi matay-og nga determinasyon, kag sa iwag sang pagpamuno sang Partido, ubos kusog nga paga-usuyon sang malapad nga masa sang pumuluyo sa maga-abot nga tuig ang mabudlay nga banas sang paghimakas agud ilabi pa nga pabaskugon ang ila nga pagpakig-away sa korap, mapiguson, brutal kag traidor sa pungsod nga rehimen US-Marcos.

Nagalubha nga nagalubha ang kahimtangan sang pumuluyong Pilipino tungod sa mga paantus kag pabug-at nga patakaran kag programa sang rehimen US-Marcos. Sa nagligad nga tuig, labi nga nag-usmod ang kahimtangan pangkatilingban kag palangabuhian sang pumuluyo. Tungod sa mga patakaran nga palasalig sa importasyon kag nagapatay sa lokal nga produksyon, halos wala untat ang pagsirit sang presyo sang pagkaon, lana kag mga nagapanguna nga kinahanglanon, pati na ang galastuhan sa ikaayong-lawas, edukasyon kag iban pa nga serbisyo.

Ginapawalaan ni Marcos ang singgit sang masang mamumugon para sa nagakaigo nga sweldo nga makabuhi sa ila mga pamilya. Ginahabuyan niya sang sinsilyo ang mga mamumugon samtang tuman ka busog ang mga dumuluong nga dalagko nga kapitalista. Wala-tuo ang pagpang-agaw sa duta sang mga mangunguma sang mga agalon mayduta, kag dalagko nga plantasyon kag kumpanya sa mina.

Gina-agawan sang palangabuhian ang mga mangingisda, mga drayber kag opereytor kag iban pa nga sektor sang masang anakbalhas. Tuman ka kulang ang trabaho, ilabi na para sa mga pamatan-on, sa ekonomya nga indi industriyalisado. Bisan ano na lang ang ginasudlan nga palangitan-an sang minilyon ka mamumugon kag mayoriya sang mga pamilya nga nagapangabuhi nga kahig-tuka. Linibo ang adlaw-adlaw nga nagakapilitan nga magtrabaho sa luwas sa pungsod para magpasimpalad agud makapangita sang gamay para sa ila mga pamilya.

Nagalala nga nagalala ang indi pag-alalangay kag inhustisya pangkatilingban. Samtang ang kadam-an ang nagapakigbato para mabuhi sa tunga sang kapigaduhon, padayon naman nga nagapagusa sa nagasinobra kag luho si Marcos kag ang iya mga korap nga burukrata, ginapaburan nga mga kapitalista kag dalagko nga agalon mayduta. Ang pamilya Marcos mismo ang nagakabuhi sa pagpagusto, masami nga pagwa sa pungsod, mga handaan kag konsyerto sa Malacañang, paggamit sang helikopter para sa pribado nga biyahe kag iban pa. Nagakamol sila sang mas dako nga manggad paagi sa korapsyon, mga kikbak, pagpanghimulos sa mga mamumugon kag mangunguma, kag pagpangkawkaw sang dunang manggad sang pungsod.

Ilabi na sa atubang sang palaabuton nga eleksyon, masako subong ang nagahari nga hubon ni Marcos sa konsolidasyon sang iya nga gahum para ma-solo ang poder. Ginagamit niya ini batuk sa pumuluyo kag sa iya mga karibal sa pulitika. Ginasipa niya subong ang mga Duterte nga gin-alyado niya sa pangpangdaya sa eleksyon 2022. Subongman, nagapabungol-bungol siya sa reklamo sang katawhan nga ipa-aresto si Rodrigo Duterte kag pahalinon si Sara Duterte agud desaysibo nga masilotan sila sa linaksa nga krimen sang pagpatay kag pagkurakot sang baol sang manggad sang banwa.

Wala-puas ang brutal nga gyera nga pagpanumpo ni Marcos. Nagasingki pa ang terorismo sang estado para wasakon ang ila nga paghimakas. Sa tabon sang mga deklarasyon nga “insurgency-free,” ginapatuman ni Marcos ang indi-deklarado nga laye militar sa linibo ka mga barangay sa kabukiran nga hugot nga ginakontrol sang iya mga pasista nga suluguon. Labi pa nga ginapakitid ni Marcos ang patag sang paghimakas ligal. Sa kabukiran man ukon kasyudaran, wala-untat ang sarbeylans, pagpang-ipit, Red-tagging, pagpang-aresto kag pagpasaka sang himu-himo nga kaso batuk sa masang nagapanindugan kag nagapakigbato para sa pungsodnon kag demokratiko nga interes sang banwa.

Wala sang tupong ang pagtraidor ni Marcos sa pumuluyong Pilipino sa pagduko niya sa gahum sang imperyalistang amo. Sa idalom sang papet nga si Marcos, tuman ka garapalan ang pagpasilabot militar sang US. Bulag niya nga ginasunod ang tanan nga kagustohan sang US, lakip na ang pagtukod sang dugang pa nga mga base militar kag sikreto nga pasilidad. Ginapaidalom niya ang reaksyunaryo nga armadong hubon sa mando kag kontrol sang mga upisyal militar sang US. Ginapagamit ni Marcos ang pungsod sa US sa pagpa-init sini sang armado nga kinagamo sa imperyalista nga karibal nga China, lakip ang pagpalawod sang mga dalagko nga armada sang US Navy sa sulod mismo sang mga isla sang Pilipinas.

Sa palaabuton nga tuig kag panahon, dapat labi nga pabaskugon sang malapad nga masa sang pumuluyong Pilipino ang ila paghimakas batuk sa papet, paantus kag pasista nga rehimen Marcos. Dapat ubos-kusog nga pandayon ang determinasyon kag ikasarang sang katawhan nga magbangon kag magprotesta. Dapat nila ipakita ang ila kaakig sa pagka-inutil sini nga panubuon ang presyo sang pagkaon kag mga balaklon kag kapaslawan nga magtuga sang regular nga trabaho para sa minilyon ka mamumugon. Dapat nila ipakigbato ang ila demokratiko nga demanda para sa duta, dugang nga suhol kag sweldo, palangabuhian kag nagakaigo nga serbisyo pangkatilingban.

Labi nga pabakuron ang determinasyon sang pumuluyong Pilipino para buk-on ang terorista nga kakugmat sang rehimen US-Marcos. Dapat nila nga maisog nga batuan sa tanan nga pamaagi ang pasismo sang estado. Hatagan sang tingog ang tanan nga biktima sang mga pagpatay kag kapintas militar sa kabukiran kag kasyudaran. Tipunon ang ila kusog sa ululupod nga pagmartsa sa tanan nga bahin sang pungsod para isinggit kag ipakigbato ang katarungan. Dapat nga magtindog ang bug-os nga katawhan para sa kinamatarung kag hustisya para sa tanan nga biktima.

Dapat ipakita sang pumuluyo ang patriyotiko nga kaakig kay Marcos, pabaskugon ang singgit para bungkagon ang tanan nga base militar sang US, kuhaon ang tanan nga armas pang-gyera sang US nga gintipon sini sa Pilipinas, pamatukan ang mga paghanas sa gyera, kag palayason ang tanan nga tropang Amerikano, pati ang mga tropa sang Japan nga ginguyod sang US. Dapat ipakigbato sang banwa ang matuod nga indepen-dyente nga patakaran pangluwas nga nagatib-ong sa kalinong kag dayalogo, partikular na para solbaron ang mga kinagamo pangkadagatan sa China.

Determinado ang Partido nga pangibabawan ang mga kahuyangan sa nagliligad kag pataason ang ikasarang sini nga malaparan nga pamunuan ang masa. Ginabuyok sini ang tanan niya nga kadre kag ang rebolusyonaryo nga masa nga labi nga pandayon ang ila determinasyon nga palaparon kag pabaskugon ang Partido, ang Bagong Hukbong Bayan kag mga rebolusyonaryong organisasyon masa, isulong ang pungsodnon-demokratiko nga rebolusyon kag ubos-kusog nga lab-uton ang mga kadalag-an subong nga tuig kag sa magaabot pa nga mga tini-on.