Naglunsar sang mga aktibidad ang nagkalain-lain nga yunit sang Bagong Hukbong Bayan (BHB) kag rebolusyonaryong masa sa kabukiran man, mga kabanwahanan kag kasyudaran sa pungsod para saulogon ang ika-56 nga anibersaryo sang Partido Komunista ng Pilipinas (PKP).

Sa Manila, nagrali-pakilat ang mga alyado nga organisasyon sang National Democratic Front (NDF)-Metro Manila sadtong Disyembre 23, 2024 sa Recto Avenue para itib-ong ang anibersaryo sang PKP. Sa martsa, nagpanawagan sila sa pumuluyong Pilipino nga isulong ang pungsodnon-demokratiko nga rebolusyon sa tunga sang nagagrabe nga kapigaduhon kag nagasingki nga banggianay sa pulitika sang nagahari nga sahi.

Sa Rizal, ginlunsar sang NDF-Rizal ang Oplan-Dikit sa pagsugod sang 2025. Makita ang maduagon kag talalupangdon nga mga balatengga sa pagsaulog sang anibersaryo sang Partido nga ginsab-it sa matawo nga sentro sang Antipolo City. Gintigayon man nila ang madamuan nga pagpatapik sang mga istiker kag nanagtag sang mga polyeto bahin sa BHB.

Ginapalab-ot man sang pungsodnon nga pamunuan sang Compatriots, Katipunan ng mga Gurong Makabayan kag Makabayang Kilusan ng Bagong Kababaihan ang ila nga panamyaw sa Partido. Halin naman sa internasyunal nga mga partido kag abyan sang PKP, nagpahayag na sang pagtamyaw ang Communist Party of Australia (Marxist-Leninist), “Serve the People” (Vietnam), Anti-Imperialist Action Ireland, Communist Party of Canada (Marxist-Leninist), Friends of the Filipino People in Struggle kag mga sanga sini halin sa nagkalain-lain nga bahin sang kalibutan.