Sadtong una nga semana sang Disyembre 2024, madasig nga nahugno ang gubyerno sang Syria kag napahalin ang presidente sini nga si Bashar al-Assad, pagkatapos naglusob ang kombinasyon sang mga jihadista kag mga grupo nga suportado, gin-armasan kag koordinado sang US, Turkey, Israel, kag bisan sang UK.

Nagapanguna sa mga grupo nga nag-atake amo ang Hey’etu Tahriri’s- Sâm (HTS ukon Damascus Liberation Movement), nga naghalin sa grupo nga ISIS. Gintawag ini nga “terorista” sang gubyernong US, pero nagabaton sang ayuda halin sa UK, alyado sang US sa NATO. Upod man sa mga naglusob ang Syrian National Army, nga direkta nga suportado sang Turkey, kag ang Free Syrian Army (ukon Revoluionary Commando Army) nga direkta nga ginasuportahan sang militar sang US nga nakabase lapit sa dulunan sang Syria sa Iraq kag Jordan.

Sa sulod lang sang 10 ka adlaw, nalab-ot sang HTS ang Damascus, syudad nga kapital sang pungsod, halin sa kuta sini sa prubinsya sang Idlib sa naaminhan-nakatungdan nga bahin sang Syria. Ginatos ka sibilyan kag mga soldado nga Syrian ang ginpatay sang mga pwersa sini sa mapintas nga kampanya nga agawon ang Damascus. Madasig sini nga napapas ang armadong hukbo nga Syrian.

Ang pagpabagsak sa rehimen Assad ang kabahin sang nagabaskog nga inter-imperyalista nga banggianay sa bilog nga kalibutan, kag partikular sa Middle East. Resulta ini sang padayon nga pagpasilabot sa Syria sang mga dumuluong nga gahum, ilabi na sang imperyalismong US sa balayon sang ginatawag sini nga Greater Middle East Initiative nga ginsuguran sadto pang 2004. Kabahin sang pagpasilabot diri sang US ang pagpa-armas sa nagkalain-lain nga grupo halin pa 2012 kag paggatong sa armado nga kinagamo sa pungsod.

Gilayon pagbagsak sang gubyernong al-Assad, ginkilala sang US ang HTS (nga gintukod halin sa bilin sang ISIS) kag ginkuha ang bansag diri nga “terorista,” nga gintawag nga “moderato” ang lider sini nga si Abu Mohammad al-Jolani, nga ginhatagan sang bag-o nga bayo sa imperyalistang midya. Nagapasilabot subong ang imperyalismong US kag UK, pati na ang Turkey, sa pagtukod sang bag-o nga gubyerno sa Syria. Samtang, ginapanginpuslan sang Israel ang pagbagsak ni al-Assad kag gilayon nga gin-okupa ang Golan Heights, supak sa pagkilala sang United Nations nga kabahin ini sang Syria. Naglunsar man ang Israel sang mga airstrike tubtob sa Damascus para pasangkaron pa ang sakop sini nga kadutaan sang Syria.

Indi malipod nga ang pagpabagsak sa gubyerno sang Syria ang kabahin sa pagpalapad sang US kag pareho sini nga imperyalista sa armado nga kinagamo sa Middle East. Padayon nga naga-arangkada ang henosidyo sang Israel sa Palestine kag ang maisog nga pagbato sang mga pwersang Palestino, amo man sang mga pwersang Hezbollah kag pumuluyo nga Lebanese batuk diri.

Kadungan sang paglusob sa Damascus, ginsalakay man sang mga pwersang HTS, katimbang ang Syrian National Army, kag suportado sang mga airstrike sang Turkey, ang mga pwersang Kurdish kag rebolusyonaryong pwersa sa awtonomo nga rehiyon sang mga Kurd sa naaminhan-nasidlakan nga bahin sang Syria. Ini ang lugar nga Autonomous Administration of North and East Syria nga ginkilala sa tawag nga Rojava.

Ang lugar nga ini ang mayor nga ginauyatan sang YPG (People’s Protection Unit) kag YPJ (milisyang kababainhan) nga kabahin sang Syrian Defense Forces. Makit-an man diri ang nagkalain-lain nga rebolusyonaryong armadong grupo, pareho sang pila ka yunit sang TIKKO nga Hukbo sang mga Mamumugon kag Mangunguma sang Turkey (hukbo sang Partido Komunista sang Turkey-Marxista-Leninista ukon TKP-ML).

Suno sa TKP-ML, indi “rebolusyon sang pumuluyo” ang nahitabo sa Syria kundi pagpanginbabaw sang “proyekto sang NATO” nga ginlunsar sang mga operatiba sang US, UK, Turkey kag Israel. “Ang pagtuhaw kag pag-uswag sang mga Salafista nga jihadist nga mga grupo, ilabi na sang HTS nga nag-agaw sang gahum sa Syria, ang direkta nga nagresulta sang paghanas kag pagpondo sang mga imperyalista kag mga reaksyunaryo nga estado sa rehiyon.” Sa pag-agaw sang gahum sang HTS, nga may suporta sang US-Israel, NATO kag Turkey, nagapangatubang ang pumuluyong Kurd, partikular na ang mga kababainhan, sang dako nga pamahog sang pagpangsakop kag kapintas.

Nagakadapat nga manindugan ang mga pwersang anti-imperyalista kag rebolusyonaryo para suportahan ang pumuluyo sang Syria sa ila paghimakas para sa matuod nga demokrasya kag pungsodnon nga independensya. Sa pagpahalin kay al-Assad, ang Syria ang magapaidalom sa dominasyon kag kontrol sang gahum sang US-Israel kag Turkey nga tuyo kontrolon ang kabilogan nga Middle East kag ang manggaran nga rekurso sini sa lana.