Hugot nga gikundena sa mga grupo sa mga mangingisda ang pagpabor sa Korte Suprema sa petisyon sa usa ka kumpanya nga iabli ang municipal waters sa pagpangawkaw sa dagkung komersyal nga pagpangisda. Ang municipal waters mao ang 15 kilometrong kadagatang gikan sa baybay.

Sumala sa Pamalakaya, pagagun-ubon sa maong desisyon ang panginabuhian sa duha ka milyong gagmayng mangingisda. Dili kayang makikumpitensya ang mga gagmayng mangingisda nga naggamit og tradisyunal ug manwal nga mga pamaagi sa pagsikop sa isda kumpara sa mga abante, ug kasagaran magun-ubong mga kagamitan ug teknolohiya sa komersyal nga mangingisda, matud pa nila.

Tungod sa abanteng kagamitan, dali ra nga mahurot sa mga dagkong barko ang tanang klase sa bahandi sa dagat.