Sa dili mabuntog nga determinasyon, ug sa iwag sa pagpangulo sa Partido, tibuok kusog nga pagasagubangon sa lapad nga masa sa katawhan sa umaabot nga tuig ang lisud nga dalan sa pakigbisog aron pakusgon ang ilang pagbatok sa korap, madaugdaugon, brutal, ug traydor nga rehimeng US-Marcos.

Nagkagrabe ang kahimtang sa kadaghanan sa katawhang Pilipino tungod sa mga paantus ug perwisyong mga palisiya ug programa sa rehimeng US-Marcos. Sa milabayng tuig, labaw nga mitiurok ang kahimtang sa katilingban ug panginabuhian sa katawhan. Tungod sa mga palisiya nga nagsalig sa importasyon ug nagapatay sa lokal nga produksyon, halos walay hunong ang pagsaka sa presyo sa pagkaon, lana, ug mga batakang panginahanglan, lakip na ang gasto sa panglawas, edukasyon, ug uban pang serbisyo.

Nagpabungol-bungol si Marcos sa singgit sa mga mamumuo alang sa angayang suhulan nga makabuhi sa ilang mga pamilya. Sinsilyo lamang ang iyang ginasabwag ngadto sa mga mamumuo samtang busog kaayo ang mga langyawng dagkung kapitalista. Walag tuo ang pagpangilog og yuta sa mga agalong yutaan, ug dagkung plantasyon ug kumpanya sa mina gikan sa mga mag-uuma.

Ginailugan og panginabuhian ang mga mangingisda, mga drayber ug operator, ug uban pang sektor. Kulang kaayo ang trabaho, ilabina alang sa mga kabatan-onan, tungod sa dili industriyalisadong ekonomiya. Bisan unsa na lang ang ginasudlang trabaho sa minilyong mamumuo ug kadaghanang pamilya nga uyamot ang kita. Liboan ang napugos nga mag-abrod adlaw-adlaw aron manimpalad para masuportahan ang ilang mga pamilya.

Nagkagrabe ang kawalay kaangayan ug katilingbanong inhustisya. Samtang nagbaguod sa kalisud ang mayorya, padayon nga nagpakatagbaw ug nagpakaharuhay si Marcos ug ang iyang mga korap nga burukrata, gipaburang kapitalista ug dagkung agalong yutaan. Ang pamilyang Marcos mismo nabuhi sa luho, kanunayng pagbyahe gawas sa nasud, mga kumbira ug konsyerto sa Malacañang, paggamit og helikopter para sa pribadong byahe ug uban pa. Naghakop sila og mas dakung bahandi pinaagi sa korapsyon, kikbak, pagpahimulos sa mga mamumuo ug mag-uuma, ug pagkawkaw sa kinaiyanhong bahandi.

Sa umalabot nga eleksyon, nagkapuliki karon ang nagharing pundok ni Marcos sa pakonsolida sa iyang gahum para solohon ang poder. Gigamit niya kini batok sa katawhan ug sa iyang mga kaaway sa pulitika. Ginasipa niya karon ang mga Duterte nga iyang gialyado sa pagpanglimbong sa eleksyong 2022. Ingonman, nagpabungol-bungol siya sa mga pangayo sa katawhan nga ipaaresto si Rodrigo Duterte ug palagputon si Sara Duterte aron masilutan sila sa daghang krimen sama sa pagpatay ug korapsyon.

Walay hunong ang brutal nga gera sa pagpanumpo ni Marcos. Migrabe pa ang terorismo sa estado aron pukanon ang pakigbisog sa katawhan. Ilalum sa mga deklarasyon nga “insurgency-free,” gipahamtang ni Marcos ang dili deklaradong balaod militar sa liboan ka barangay sa kabanikanhan nga hugot nga ginakontrol sa iyang mga pasistang suluguon. Gipasigpit ni Marcos ang natad sa ligal nga pakigbisog. Sa kabanikanhan man o kasyudaran, walay hunong ang pagpaniktik, pagpamig-ot, Red-tagging, pag-aresto ug pagpasaka og hinimu-himong kaso batok masang mibarog ug nakigbisog alang sa makinasudnon ug demokratikong interes.

Dayag kaayo ang pagluib ni Marcos sa katawhang Pilipino sa pagyukbo niya sa gahum sa imperyalistang amo. Ilalum sa papet nga si Marcos, grabe ka garapal ang interbensyong militar sa US. Buta niyang ginasunod ang tanang gusto sa US, lakip na ang pagtukod og dugang pang base militar ug sekretong pasilidad. Gipailalum niya ang reaksyunaryong armadong kusog sa mando ug kontrol sa upisyal militar sa US. Gipagamit niya ang nasud sa US aron pasikaron pa ang armadong panagbangi batok sa karibal niining imperyalistang China. Lakip dinhi ang paglawig sa mga higanteng armada sa US Navy sulod mismo sa kapupud-an sa Pilipinas.

Sa umalabot nga tuig ug panahon, kinahanglang labaw pang palig-onon sa lapad nga masa sa katawhang Pilipino ang ilang pakigbisog batok sa papet, paantus ug pasistang rehimeng Marcos. Kinahanglang kusganong pandayon ang ilang determinasyon ug katakus nga mobarog ug magprotesta. Kinahanglan nilang ipakita ang ilang kasuko batok sa kainutil niining paubsan ang presyo sa pagkaon ug mga palaliton, ug paghimo og regular nga trabaho alang sa minilyong mamumuo. Kinahanglan nilang pakigbisugan ang ilang demokratikong pangayo alang sa yuta, dugang suhulan ug sweldo, panginabuhian ug igong katilingbanong serbisyo.

Makanunayong palig-onon ang determinasyon sa katawhang Pilipino aron bungkagon ang teroristang kabangis sa rehimeng US-Marcos. Kinahanglang maisugon nilang batukan sa tanang pamaagi ang pasismo sa estado. Hatagan og tingog ang tanang biktima sa pagpatay ug kabangis militar sa kabanikanhan ug kasyudaran. Tigumon ang ilang kusog pinaagi sa hiniusang pagmartsa para isinggit ug ipanghingusog ang hustisya. Kinahanglang mobarog ang tibuok katawhan alang sa katungod ug hustisya para tanang biktima.

Kinahanglang ipakita sa katawhan ang patriyotikong kasuko batok kang Marcos, pakusgon ang singgit aron bungkagon ang tanang base militar sa US, tangtangon ang tanang armas iggugubat sa US nga gihan-ok sa Pilipinas, batukan ang tanang war games, ug palayason ang tanang tropang Amerikano lakip na ang tropag Hapon nga ginaguyod sa US. Kinahanglan ipakigbisog sa katawhan ang tinuod nga independyenteng palisiyang panggawas nga nagapasiugda sa kalinaw ug dayalogo, partikular aron masulbad ang pangdagat nga bangi tali sa China.

Determinado ang Partido nga mapatigbabawan ang mga kahuyangan sa nangagi ug ipataas ang kapasidad niini nga malukpanong pangulohan ang masa. Ginaawhag niini ang tanan niyang kadre og rebolusyonaryong masa nga labaw pang pandayon ang ilang determinasyon aron palapdon ug palig-onon ang Partido, Bagong Hukbong Bayan og rebolusyonaryong organisasyong masa, iasdang ang nasudnon-demokratikong rebolusyon ug maningkamot nga kab-oton ang mga kadaugan karong tuiga ug sa umalabot nga panahon.