Niadtong unang semana sa Disyembre 2024, dali nga nahagba ang gubyerno sa Syria ug napalagpot ang presidente niini nga si Bashar al-Assad, human misulong ang kumbinasyon sa mga jihadista ug mga grupong gisuportahan, giarmasan, ug gikoordina sa US, Turkey, Israel, ug bisan sa UK.

Nag-una sa mga grupong miatake ang Hey’etu Tahrîri’ş-Şâm (HTS o Damascus Liberation Movement), nga salin sa grupong ISIS. Gitawag kini nga “terorista” sa gubyerno sa US, apan nagadawat og ayuda gikan sa UK, nga alyado sa US sa NATO. Lakip usab sa mga miatake ang Syrian National Army, nga direktang suportado sa Turkey, ug ang Free Syrian Army (o Revolutionary Commando Army) nga direktang ginasuportahan sa militar sa US nga nakabase duul sa utlanan sa Syria ngadto Iraq ug Jordan.

Sulod lamang sa 10 ka adlaw, naabot na sa HTS ang Damascus, ang kapital sa nasud, gikan sa ilang kuta sa prubinsya sa Idlib sa amihanan-kasadpan nga bahin sa Syria. Gatusan ka sibilyan ug mga sundalong Syrian ang gipatay sa mga pwersa niini pinaagi sa bangis nga kampanyang sakmiton ang Damascus. Dali nilang napukan ang armadong kusog sa Syria.

Ang pagkahagba sa rehimeng Assad kabahin sa nagkakusog nga inter-imperyalistang panagbangi sa tibuok kalibutan, partikular sa Middle East. Resulta kini sa padayong interbensyon sa mga langyawng gahum ngadto sa Syria, ilabina sa imperyalismong US ilalum sa gitawag nilang Greater Middle East Initiative nga gisugdan niadtong 2004. Kabahin sa interbensyon dinhi sa US ang pag-armas sa nagkalain-laing grupo sukad pa niadtong 2012 ug pagsugnod sa armadong kaguliyang sa nasud.

Sa pagkahagba sa gubyernong al-Assad, dihadihang giila sa US ang HTS ug gitangtang ang tatak niining “terorista,” gitudlo nga “moderato” ang lider niini nga si Abu Mohammad al-Jolani, nga gihatagan og bag-ong hitsura pinaagi sa imperyalistang midya. Nanginlabot karon ang imperyalismong US ug UK, bisan ang Turkey, sa pagtukod og bag-ong gubyerno sa Syria. Samtang, gipahimuslan sa Israel ang pagkahagba ni al-Assad ug dali nilang giokupa ang Golan Heights, bisan og lapas kini sa pag-ila sa United Nations nga sakop kini sa Syria. Naglunsad usab ang Israel og mga airstrike hangtud Damascus aron palapdon pa ang kontrolado niining kayutaan sa Syria.

Dili malimod nga ang pagpahagba sa gubyerno sa Syria kabahin sa pagpalapad sa US ug uban pang imperyalista sa armadong panagbangi sa Middle East. Padayon gihapon ang henosidyo sa Israel sa Palestine ug ang maisugong pakigbisog sa mga pwersang Palestino, ingonman ang mga pwersang Hezbollah ug katawhang Lebanese batok niini.

Dungan sa pag-atake sa Damascus, gisulong usab sa mga pwersang HTS kauban ang Syrian National Army nga suportado sa airstrike sa Turkey ang mga pwersang Kurdish ug rebolusyonaryong pwersa sa awtonomong rehiyon sa mga Kurd sa amihanan-sidlakang bahin sa Syria. Kini mao ang lugar nga Autonomous Administration of North and East Syria nga nailhan isip Rojava.

Ang maong lugar kontrolado sa YPG (People’s Protection Unit) ug YPJ (milisyang kababayen-an) nga kabahin sa Syrian Defense Forces. Makita usab dinhi ang nagkalain-laing rebolusyonaryong armadong grupo, sama sa pipila ka yunit sa TIKKO nga Hukbo sa mga Mamumuo ug Mag-uuma sa Turkey (hukbo sa Partido Komunista ng Turkey-Marxista-Leninista o TKP-ML).

Sumala sa TKP-ML, dili “rebolusyon sa katawhan” ang nahitabo sa Syria kundili paghari sa “proyekto sa NATO” nga gipatuman pinaagi sa mga operatiba sa US, UK, Turkey ug Israel. “Ang pagtumaw ug paglambo sa mga grupong Salafistang jihadist, ilabina ang HST nga miilog sa gahum sa Syria, direktang resulta pagbansay ug pagpondo sa mga imperyalista ug reaksyunaryong estado sa rehiyon.” Sa pag-ilog sa HTS sa gahum, sa suporta sa US-Israel, NATO ug Turkey, nag-atubang karon ang katawhang Kurd, partikular na ang mga kababayen-an, sa daku kaayong hulga sa pagpanakop ug kabangis.

Angayan lamang nga mobarog ang mga pwersang anti-imperyalista ug rebolusyonaryo aron suportahan ang katawhan sa Syria sa ilang pakigbisog alang sa tinuod nga demokrasya ug nasudnong kaugalingnan. Sa pagpalagpot kang al-Assad, mapailalum ang Syria sa dominasyon ug kontrol sa gahum sa US-Israel ug Turkey nga nagtinguhang kontrolon ang tibuok Middle East ug ang abundang rekurso niini sa lana.