Naglansar hin mga aktibidad an dirudilain nga yunit han Bagong Hukbong Bayan (BHB) ngan rebolusyunaryo nga masa ngaduha ha kabaryuhan, mga poblasyon ngan kasyudaran ha nasud para igselebrar an ika-56 nga anibersaryo han Partido Komunista ng Pilipinas (PKP).

Ha Manila, nagpakilat-nga-rali an mga alyado nga organisasyon han National Democratic Front (NDF)-Metro Manila hadton Disyembre 23, 2024 ha Recto Avenue para igsalin-urog an anibersaryo han PKP. Ha martsa, nanawagan hira ha katawhan Pilipino nga ipasulong an nasyunal demokratiko nga rebolusyon ha butnga han nagtitikagrabe nga kakurian ngan nagtitikapintas nga banggaay ha pulitika han naghahadi nga mga klase.

Ha Rizal, iginlansar han NDF-Rizal an Oplan-Sab-ong ngan Oplan-Pilit ha pagtikang han 2025. Landaw an makolor ngan nakakakuha-atensyon nga mga balatengga nga nagselebrar ha anibersaryo han Partido nga iginsab-ong ha mga tawuhon nga sentro han Antipolo City. Naghimo liwat hira hin tinagdamo nga pagpilit hin mga istiker ngan nagdistribwer hin polyeto hiunong ha BHB.

Iginpadangat liwat han nasyunal nga pamunuan han Compatriots, Katipunan ng mga Gurong Makabayan ngan Makabayang Kilusan ng Bagong Kababaihan an ira pagbati ha Partido. Tikang naman ha internasyunal nga mga partido ngan sangkay han PKP, nagpahayag na hin pagbati an Communist Party of Australia (Marxist-Leninist), “Serve the People” (Vietnam), Anti-Imperialist Action Ireland, Communist Party of Canada (Marxist-Leninist), Friends of the Filipino People in Struggle ngan mga tsapter hini tikang ha magkalain-lain nga parte han kalibutan.