Nanawagan an Partido Komunista ng Pilipinas (PKP) ha katawhan Pilipino nga mahugot nga suknaon an paglalayag han US Carrier Strike Group (CSG) One ha Surigao Strait giutan han Leyte ngan Mindanao hadton urhi nga semana han Disyembre 2024. Waray-awod an ginhimo nga pagtabok hini ha soberano nga kadagatan nga lupgop han Pilipinas tikang ha Pacific Ocean tikadto ha West Philippine Sea.

An nabal nga pormasyon han US, nga ginpapangunahan han USS Carl Vinson aircraft carrier, usa nga higante nga bokis-de-gerra nga may kapas nga magkarga hin usa nga dako nga nukleyar nga arsenal. Karga hini an tulo pa nga bokis-de-gerra.

Samtang, butaray nga pagpakaniyutiyo ha imperyalista nga US an pag-anunsyo han AFP ngan Department of National Defense nga naglalarang nga pumalit hin Typhon Midrange Capability (MRC) missile system tikang ha US. Hadton Abril 2024, nagbutang an US hin Typhon missile ha norte nga dapit han Luzon nga gin-gamit ha Balikatan war games. Waray pa liwat ini kuhaa.

Kasunod hini, utro nga iginduso ni Surigao Del Norte 2nd District Rep. Robert Ace Barbers hadton Enero 2 nga magkamayda hin Enhanced Defense Cooperation Agreement site ha iya prubinsya. Sigon ha iya, kinahanglan ini ha prubinsya tungod kay “bulnerable an sinirangan nga dapit han nasud ha mga ismagler ngan langyaw nga panginlabot”.

Sigon kan Marco Valbuena, upisyal ha impormasyon han Partido, ura-ura an pagpakaniyutiyo ni Marcos ha imperyalista nga amo nga US ha pakigkunsabuhay ha pagtamak ha soberaniya han Pilipinas. “Iginpapakita hini kun tiunan-o gin-gagamit an nasud komo usa nga lansaran han mga operasyon han US ha pagpapakita han kusog ha Pasipiko ngan komo niyutiyo ha ginhihimo han US nga pagpapapintas han inter-imperyalista nga tensyon,” sigon ha iya.