Hadton syahan nga semana han Disyembre 2024, madagmit nga bumagsak an gubyerno han Syria ngan napatalsik an presidente hini nga hi Bashar al-Assad kahuman umatake an kumbinasyon han mga jihadista ngan mga grupo nga suportado, gin-armasan ngan koordinado han US, Turkey, Israel ngan bisan han UK.

Nanguna ha nga grupo nga umatake amo an Hey’etu Tahrîri’ş-Şâm (HTS o Damascus Liberation Movement), nga nagtikang ha salin han grupo nga ISIS. Gindeklara ini nga “terorista” han gubyerno han US, kundi kumarawat hin ayuda tikang ha UK, kaalyado han US ha NATO. Kaupod liwat ha umatake an Syrian National Army, nga direkta nga suportado han Turkey, ngan an Free Syrian Army (o Revolutionary Commando Army) nga direkta nga ginsusuportahan han militar han US nga nakabase hirani ha bawnderi han Syria ha Iraq ngan Jordan.

Sakob la hin 10 kaadlaw, naabot han HTS an Damascus, sentro nga syudad han nasud, tikang ha base hini ha prubinsya han Idlib ha norte-weste nga parte han Syria. Gatus-gatos nga sibilyan ngan mga sundalo nga Syrian an ginpatay hini nga mga pwersa ha madarahug nga kampanya nga agawon an Damascus. Madagmit hini nga nalipol an armado nga hukbo nga Syrian.

Kaparte han natikagrabe nga inter-imperyalista nga sumpakiay ha bug-os nga kalibutan, ngan partikular ha Middle East, an pagpabagsak ha rehimen Assad. Resulta ini han dirudiretso nga panginlabot ha Syria han mga langyaw nga poder, labina an imperyalismo nga US ha balayan han gintawag hini nga Greater Middle East Initiative nga gintikangan hadton 2024 pa. Kaparte han panginlabot dinhi han US an pag-armas ha magkalain-lain nga grupo tikang pa 2012 ngan pagsulsol ha armado nga sumpakiay ha nasud.

Kahuman bumagsak an gubyerno nga al-Assad, ginkilala ha gilayon han US an HTS (nga igintukod tikang ha salin han ISIS) ngan gintanggal an bansag dinhi nga “terorista,” gintawag nga “moderato” an pinuno hini nga hi Abu Mohammad al-Jolani, nga gintagan hin bag-o nga imahe ha imperyalista nga midya. Nanginginlabot yana an imperyalismo nga US ngan UK, hasta na an Turkey, ha pagbug-os han bag-o nga gubyerno ha Syria. Samtang, ginsisingabot han Israel an pagbagsak ni al-Assad ngan dagmit nga gin-okuparan an Golan Heights, sukwahi ha pagkilala han United Nations nga kaparte ini han Syria. Naglansar liwat an Israel hin mga airstrike tubtub ha Damascus agud pahiluagon pa an lupgop hini nga katunaan han Syria.

Diri madidiwara nga an pagpabagsak ha gubyerno han Syria parte han pagpahiluag han US ngan igkasi imperyalista hini ha armado nga sumpakiay ha Middle East. Padayon nga nabuylo an henosidyo han Israel ha Palestine ngan an mabayanihon nga pag-ato han mga pwersa nga Palestino, sugad liwat an mga pwersa nga Hezbollah ngan katawhan nga Lebanese kontra hini.

Kadungan han pag-atake ha Damascus, gin-atake liwat han mga pwersa nga HTS, kabakyang an Syrian National Army, ngan suportado han mga airstrike han Turkey, an mga pwersa nga Kurdish ngan rebolusyunaryo nga pwersa ha otonomo nga rehiyon han mga Kurd ha norte-este nga parte han Syria. Amo ini an lugar nga Autonomous Administration of North and East Syria nga kilalado ha tawag nga Rojava.

Ini nga lugar prinsipal nga katin han YPG (People’s Protection Unit) ngan YPJ (milisya nga kababayin-an) nga parte han Syrian Defense Forces. Matatad-an liwat dinhi an magkalain-lain nga rebolusyunaryo nga armado nga grupo, sugad han pira nga yunit han TIK-KO nga Hukbo han mga Trabahador ngan Parag-uma han Turkey o (hukbo han Partido Komunista han Turkey-Marxista-Leninista o TKP-ML).

Sigon ha TKP-ML, diri “rebolusyon han katawhan” an nahitabo ha Syria kundi pag-ungbaw han “proyekto han NATO” nga ginhimo han mga operatiba han US, UK, Turkey ngan Israel. “An paglutaw ngan pag-uswag han mga Salafista nga jihadist nga mga grupo, labi na han HST nga nag-agaw han poder ha Syria, direkta nga resulta han pagpahiara ngan pagpondo han mga imperyalista ngan reaksyunaryo nga estado ha rehiyon.” Ha pag-agaw han poder han HTS, nga may suporta han US-Israel, NATO ngan Turkey, naatubang an katawhan nga Kurd, partikular na an kababayin-an, hin dako nga hulga han pananakop ngan kamadarahug.

Kaangayan nga manindugan an mga pwersa nga kontra-imperyalista ngan rebolusyunaryo agud suportahan an katawhan han Syria ha ira pakigbisog para ha tinuod nga demokrasya ngan nasyunal nga katalwasan. Ha pagpatalsik kan al-Assad, mapapailarum an Syria ha dominasyon ngan kontrol han gahum nga US-Israel ngan Turkey nga naglalarang nga kontrolon an Middle East ngan an riko nga rekurso hini ha lana.