Angkon an diri mababantad nga determinasyon, ngan ha lamrag han pamumuno han Partido, bug-os kusog nga hahasugon han hiluag nga masa han katawhan ha tiarabot nga tuig an makuri nga dalan han pakigbisog agud pakusgon an ira pag-ato ha korap, matalumpiguson, madarahug ngan traydor ha nasud nga rehimen US-Marcos.

Natikagrabe an kamutangan han mayoriya han katawhan Pilipino tungod ha mga pakuri ngan pabug-at nga palisiya ngan programa han rehimen US-Marcos. Ha linabay nga tuig, dugang nga bumagsak an pankatilingban nga kamutangan ngan pakabuhi han katawhan. Tungod ha mga palisiya nga nakasarig ha importasyon ngan nagpapatay ha lokal nga produksyon, haros waray hunong an pag-umento han presyo han pagkaon, lana ngan mga batakan nga panginahanglan, hasta na an kagarastuhan ha kalibsugan, edukasyon ngan iba pa nga serbisyo.

Nagpapakabungol hi Marcos ha guliat han masa nga trabahador para ha kaangayan nga suhol nga makaburuhi ha ira mga pamilya. Ginsasabragan niya hin sinsilyo an mga trabahador samtang busog ura-ura an mga dagko nga langyaw nga kapitalista. Wala-tuo an panlulupot han mga agaron maytuna, ngan dagko nga plantasyon ngan kompaniya ha pagmimina ha tuna han mga parag-uma.

Gin-aagawan hin pakabuhian an mga parupangisda, mga drayber ngan opereytor ngan iba pa nga sektor han masa nga anakbalhas. Kulang kaupay an trabaho, labina para ha mga kabatan-unan, ha diri industriyalisado nga ekonomiya. Bisan ano nala an ginsusudlan nga panginabuhi han milyun-milyon nga trabahador ngan mayoriya nga mga pamilya nga nabubuhi ha kahig-tuka. Yukut-yukot an kada adlaw nga napipiritan nga mag-abrod agud kumita hin guti para ha ira pamilya.

Natikagrabe an diri pagkakapapreho ngan pankatilingban nga inhustisya. Samtang an kadam-an naato agud mabuhi ha butnga han kakurian, dirudiretso naman nga nagpapatakas ha pagmalgastar ngan luho hi Marcos ngan an iya mga korap nga burukrata, ginpapaburan nga mga kapitalista ngan dagko nga agaron maytuna. Mismo an pamilya nga Marcos nabubuhi ha layaw, niruniyan nga paggawas ha nasud, mga pakaon ngan konsyerto ha Malacañang, paggamit han helikopter para ha pribado nga biyahe ngan iba pa. Naghahakin hira hin mas dako nga karikuhan pinaagi han korapsyon, mga kikbak, paniniyupi ha mga trabahador ngan parag-uma, ngan pagdambong ha natural nga karikuhan han nasud.

Labina atubangan han tiarabot nga piniliay, nalilibang yana an naghahadi nga barkadahan nga Marcos ha konsolidasyon han iya poder agud solohon an poder. Gin-gagamit niya ini kontra ha katawhan ngan ha iya mga karibal ha pulitika. Gin-eetsapwera niya yana an mga Duterte nga gin-alyado niya ha panlibo ha 2022 nga piniliay. Kundi, nagpapakabungol hiya ha araba han katawhan nga ipaaresto hi Rodrigo Duterte ngan patalsikon hi Sara Duterte agud mapagdesisyon nga masirutan hira ha damo nga krimen han pagpatay ngan pagdambong ha baul-karikuhan han nasud.

Waray-hunong an madarahug nga mapanmuypoy nga gerra ni Marcos. Tikapintas pa an terorismo han estado agud perdihon an ira pakigbisog. Ha tahub han mga “insurgency-free” nga mga deklarasyon, igin-imponer ni Marcos an diri-deklarado nga balaud militar ha yukut-yukot nga barangay ha kabaryuhan nga mahugot nga ginkokontrol han iya mga pasista nga suruguon. Ura-ura nga ginpapahaligot ni Marcos an natad han ligal nga pakigbisog. Ha kabaryuhan man o kasyudaran, waray-wantas an sarbeylans, pan-gigipit, Red-tagging, pangaresto ngan pagsalawad han hinimu-himo nga kaso kontra ha masa nga naninindugan ngan naato para ha patriyotiko ngan demokratiko nga interes han katawhan.

Lunod-patay an pagtraydor ni Marcos ha katawhan Pilipino ha pagyukbo niya ha poder han imperyalista nga amo. Ha ilarum han papet nga hi Marcos, waray kapareho kagarapal an panmilitar nga panginlabot han US. Buta niya nga gin-aalagad an ngatanan han karuyagon han US, kalakip an pagtindog hin dugang pa nga mga base militar ngan sikreto nga pasilidad. Iginpapailarum niya an reaksyunaryo nga armado nga pwersa ha mando ngan kontrol han mga upisyal militar han US. Iginpapagamit ni Marcos an nasud ha US ha pagpapapaso han armado nga pingkiay ha imperyalista nga karibal nga China, kalakip an paglalayag han mga higante nga armas han US Navy ha sakob mismo han kamurupud-an han Pilipinas.

Ha tiarabot nga tuig ngan panahon, kinahanglan dugang nga pakusgon han hiluag nga masa han katawhan Pilipino an ira pakigbisog kontra ha niyutiyo, pakuri ngan pasista nga rehimen Marcos. Kinahanglan nga bug-os kusog nga pandayon an determinasyon ngan kapas han katawhan nga tumindog ngan magprotesta. Kinahanglan nira ipakita an ira kangalas ha kawaray-pulos hini nga paluruson an presyo han pagkaon ngan mga papliton ngan kapakyasan nga maghimo hin regular nga trabaho para ha milyun-milyon nga trabahador. Kinahanglan nira ipakigbisog an ira demokratiko nga demanda para ha tuna, umento nga suhol ngan sweldo, pakabuhian ngan sadang nga pankatilingan nga serbisyo.

Pursigido nga padig-unon an determinasyon han katawhan Pilipino agud buungon an terorista nga ngirhat han rehimen US-Marcos. Kinahanglan nira maisugon nga atuhan ha ngatanan nga pamaagi an pasismo han estado. Tagan hin tingog an ngatanan nga biktima han mga pagpatay nga panmilitar nga pandarahug ha kabaryuhan ngan kasyudaran. Tirukon an ira kusog ha urusa nga pagmartsa ha ngatanan nga parte han nasud para iguliat ngan ipakigbisog an hustisya. Kinahanglan tumindog an bug-os nga nasud para ha katungod ngan hustisya para ha ngatanan han biktima.

Kinahanglan ipakita han katawhan an patriyotiko nga kangalas kan Marcos, pakusgon an panawagan para bungkagon an ngatanan nga base militar han US, kuhaon an ngatanan nga higamit pan-gerra han US nga nakaistak ha Pilipinas, tipahan an mga treyning pan-gerra, ngan palayason an ngatanan nga tropa nga Amerikano, kalakip an mga tropa han Japan nga gindadanas han US. Kinahanglan ipakigbisog han katawhan an tinuod nga naglulugaring nga pan-gawas nga palisiya nga nag-uundong ha kamurayawan ngan dayalogo, partikular agud solbaron an mga pankadagatan nga tipa-tipa ha China.

Determinado an Partido nga ungbawan an mga kaluyahan ha naglabay ngan isahon an kapas hini nga hiluagan nga pamunuan an masa. Gin-aaghat hini an ngatanan han iya kadre ngan an rebolusyunaryo nga masa nga dugang nga pandayon an ira determinasyon nga pahiluagon ngan pakusgon an Partido, Bagong Hukbong Bayan ngan mga rebolusyunaryo nga organisasyon masa, ipasulong an nasyunal demokratiko nga rebolusyon ngan bug-os kusog nga kab-uton an mga kadaugan yana nga tuig ngan ha tiarabot nga panahon.