Sukwahi sa ginapangayong hustisya sa katawhang Pilipino, naglangan-langan karon si Marcos sa pagduso sa impeachment o pagtaral kang Bise Presidente Sara Duterte sa Kongreso, ug sa pagpaaresto sa kanhing Presidente nga si Rodrigo Duterte aron mag-atubang sa International Criminal Court. Kini bisan og nagbansiwag ang mga ebidensya sa grabeng korapsyon ni Sara, ug mga krimen batok sa katawhan ni Rodrigo.

Ginasunod ni Marcos ang tambag sa iyang among imperyalistang US nga pahupayon ang iyang pakiglantugi sa mga Duterte aron dili maalarma ang mga langyawng monopolyo kapitalista nga namuhunan sa nasud. Imbis nga paminawon ang singgit sa katawhan alang sa hustisya, ginauna ni Marcos ang konsolidasyon sa iyang gahum aron hinay-hinay nga bungkagon ang gahum ug impluwensya sa mga Duterte. Lakip dinhi ang ginahimong “loyalty check” ug pagbalhin-balhin sa mga upisyal sa AFP ug PNP ug reorganisasyon sa National Security Council.

Pinakalaraw ni Marcos nga mas pahugton pa ang kontrol sa pulitikanhong gahum aron mapanalipdan ang iyang personal nga burukrata-kapitalistang interes. Usa sa nag-unang gihatagag pagtagad karon ni Marcos mao ang umalabot nga eleksyon sa Mayo. Ginagamit niya ang tibuok gahum sa estado ug pondo publiko aron masiguro nga makontrol sa iyang mga alipures ang Senado, Kongreso, ug mga lokal nga gubyerno. Gigamit niya ang konsolidasyon sa gahum sa batok katawhan ug batok sa iyang mga kaatbang sa pulitika.

Sa pagsulay nga lunuron ang singgit sa katawhan alang sa hustisya ug pig-oton ang mga kongresista ug grupo nga nagduso sa impeachment, migasto ang pro-Duterte nga mga lider sa Iglesia ni Cristo og gatusan ka milyong piso aron tapukon ang minilyong myembro niini sa mga rali niadtong milabayng semana. Gigamit ang malinglahong temang “panaghiusa ug kalinaw” aron tabunan ang gipangayo sa katawhan nga hustisya ug ang singgit aron papanubagon ang gikasilagang mag-amahang Duterte.

Kapin usa ka bulan na ang milabay sukad sunud-sunod nga gisumite ang tulo ka kaso sa impeachment ngadto sa Kongreso. Apan, sa kumpas ni Marcos, nga miingong ang impeachment “sayang sa panahon” ug “dili pa panahon,” wala pa ni usa niini ang gisugdan pagproseso. Ginalantaw sa uban nga nagahulat lamang si Marcos nga masigurong gunit niya ang mayorya sa Senado aron mahukman si Sara Duterte. Ang tinuod, nagpabungol-bungol si Marcos sa singgit sa katawhan ug ginababagan ug ginadiskaril ang inisyatiba sa lain-laing demokratikong sektor aron panubagon si Sara Duterte ug iyang amahan nga si Rodrigo.

Labaw pang nagpasuko sa katawhang Pilipino ang paglanganlangan ni Marcos sa kasong impeachment batok kang Sara Duterte. Dili nila maagwanta nga makitang gawasnon ang bise presidente nga nanguna sa maanomalyang pag-usik-usik sa gatusan ka milyong piso gikan sa pondo publiko. Ug mas dili nila madawat nga ang binilyong pisong badyet sa reaksyunaryong gubyerno nga naggikan sa buwis sa ordinaryong katawhan ginabulsa lamang sa mga korap nga upisyal sa gubyerno, sa pagpanguna sa burukrata-kapitalistang si Marcos.

Labaw nga milalum ang kasuko sa katawhang Pilipino atubangan sa nagkagrabeng krisis sa panginabuhian, ilabina sa sunud-sunod nga pagsaka sa presyo sa pagkaon, lana, ug uban pang mga palaliton sulod sa unang mga semana sa 2025. Padayon nga nagpabungulbungol si Marcos sa singgit sa mga mamumuo ug ordinaryong empleyado nga patas-an ang suhulan ug sweldo, nga kulang kaayo para mabuhing disente ang mga pamilyang Pilipino.

Walay solusyon ang rehimeng Marcos sa grabeng problema sa malukpanong disempleyo, ug ginapasagdan na lamang ang katawhan nga mag-iya-iya og pangitag trabaho. Mas grabe pa, ginahikawan sa panginabuhian ang minilyong mag-uuma, mangingisda, drayber sa dyip, ug uban pang sektor atubangan sa pagsulay sa mga burgesya-kumprador ug kakunsabang langyawng kumpanya ug bangko nga ilugon ang ilang yuta ug panginabuhian.

Atubangan sa malukpanong pag-antus ug pagkaguba sa panginabuhian sa katawhan, nagkabangis nga pagpanumpo ang tubag sa rehimeng Marcos para pakgangon ang ilang mga reklamo. Nagkadaghan ang kaso sa pagpaniktik, pagpamig-ot sa mga organisasyon, pagpasaka og gama-gamang kaso, pag-aresto, tortyur ug ekstra-hudisyal nga pagpamatay batok sa ordinaryong katawhan nga naghugpong aron panalipdan ang ilang interes ug kaayuhan. Hilabihan ang paggamit karon ni Marcos sa mga balaod “kontra-terorismo” sa pagpanumpo sa mga katungod. Mas grabe ang sitwasyon sulod sa kabanikanhan kung asa dayag nga balaod militar ang gipahamtang batok sa liboang barangay nga ginakontrol ug ginaharian sa pasistang sundalo.

Aron iasdang ang kaayuhan ug katungod sa masa sa katawhang Pilipino, kinahanglang kusganong hugpungon ang ilang han-ay ug hatagan og gamhanang porma ang ilang kasuko batok sa krimen ug kasal-anan sa mga Duterte, ug batok sa nagapadayong burukrata-kapitalista ug pasistang paghari ni Marcos. Dugang pakusgon ang lapad nga nagkahiusang prente aron hugpungon ang tanang sektor, organisasyon ug indibidwal aron panubagon ang mga Duterte. Kinahanglang mugnaon ang lain-laing porma sa organisasyon ug alyansa, pormal man o dili pormal, aron maawhag ang pinakalapad nga masa nga mosalmot lain-laing porma sa protesta ug pagpadayag sa mga reklamo.

Kinahanglang mahukmanong iasdang ang demokratikong kalihukang masa aron panubagon ang mga Duterte ug pakusgon ang pakigbisog aron singlon si Marcos ug tibuok burukrata-kapitalistang sistema. Haum kaayo ang sitwasyon para pukawon ang masa ug paspas nga palapdon ang ilang organisadong han-ay. Tabunok ang yuta aron dinaghang tukuron ang mga unyon ug organisasyong masa sa kasyudaran ug kabanikanhan.

Sakmiton ang labing haum nga sitwasyon aron iasdang ang ekonomikanhon ug pulitikanhong pakigbisog sa masa ug mokab-ot og mga kadaugan. Kinahanglang isumpay kini sa pagbatok sa rehimeng US-Marcos ug pagpaasdang sa nasudnon-demokratikong kalihukan.

Kinahanglang kusganong molihok ug labaw pang magpakalig-on ang mga kadre ug myembro sa Partido aron magsilbing uyok sa mga pakigbisog sa masa. Sila ang iwag ug giya sa pag-abante sa masa sa lisud nga dalan sa pakigbisog. Kinahanglang tukuron ang mga tago nga organisasyong masa nga direktang nagasuporta sa pagpaasdang sa armadong pakigbisog, ug nagaaghat sa masa nga mosampa sa Bagong Hukbong Bayan.