Upisyal nang nagsugod ang panahon sa reaksyunaryong eleksyon sa nasud niadtong Enero 12. Makigkumpetensya ug magkigbugno dinhi ang mga kandidato aron makuha ang dili moubos sa 18,000 ka posisyon sa gubyerno ug pahimuslan ang burukrata-kapitalistang sistema. Magkig-away dinhi ang mga dagkung warlord ug mga dinastiya sa pulitika ug dungan-dungan nilang yatakan ang kaayuhan sa katawhan. Gigamit nila ang ilang mga armadong maton, pulis, ug pwersang militar.

Atubangan niini, hugot nga iimplementar sa rebolusyonaryong kalihukan ang nagtunhay nang mga palisya sa panahon sa reaksyunaryong eleksyon sa langkub sa erya sa operasyon. Sa mando sa Partido, pagasiguruhon sa Bagong Hukbong Bayan (BHB) ang pagpanalipud sa kaayuhan, mga katungod, ug interes sa katawhan.

Angay ipahimangno sa tanang nagtinguha og pwesto sa reaksyunaryong gubyerno nga ang mga palisya hugot nga pagatumanon sa mga rebolusyonaryong lugar. Ang mga kandidato ug ilang mga tigsuporta pagatugutan nga mangampanya subay sa naglungtad nga mga lagda.

Gibawalan ang mga pulitiko nga magdala og armadong maton ug mga eskort nga pulis ug militar nga kasagarang ginagamit aron hadlukon ang katawhan. Dili luwas dinhi ang uban pang porma sa pagpamugos ug paggamit og armadong kabangis, ilabina sa mga burukrata-kapitalista nga nagagamit sa pondo publiko batok sa katawhan. Pagatumanon sa BHB ang pagsakmit sa mga armas sa mga kandidato ug ilang mga armadong maton. Kung gikinahanglan, iimplementar kini pinaagi sa mga tsekpoynt ug uban pa.

Kinahanglang targiton sa BHB ang mga yunit sa AFP ug PNP, ingonman ang armadong maton sa mga reaksyunaryong pulitiko, nga gamiton ang kampanya sa eleksyon sa mga natarang gerilya isip takuban sa mga operasyong paniniktik batok sa Partido, sa BHB, sa demokratikong gubyerno sa katawhan, ug batok sa rebolusyonaryong masa.

Sa dili pa mangampanya sa mga rebolusyonaryong erya, kinahanglan magpahibalo ang mga pulitiko ug makigkoordina sa lokal nga yunit sa BHB. Importante kini nga koordinasyon aron malikayan ang bisan unsang insidente, lakip na ang komprontasyon tali sa armadong maton sa magkalabang pulitiko.

Sigurado nga pagagamiton sa AFP ang reaksyunaryong eleksyon aron pagrabehon ang operasyong kombat niini, pulitikanhong pagpanumpo ug pagkontrol sa mga barangay sa kabanikanhan sa ngalan sa gera kontra-insurhensiya. Sa pikas bahin, pagainaton usab niini ang AFP ug PNP nga obligadong ikatag sa lain-laing lungsod nga paga-ilhong “red, orange ug yellow-risk” subay sa kagrabehon sa lantugiay sa mga lokal nga pulitiko, lakip na “presensya” sa BHB. Lehitimong target sa BHB ang mga yunit pangkombat sa AFP.

Hugot nga giaghat sa Partido ang mga kandidato nga balibaran ang armadong seguridad gikan sa AFP, tungod kay kini ginagamit lamang aron ipatuman ang pulitikanhong pagpanumpo. Kasagaran, ang mga burukratang gipaboran sa militar mao usab ang nakig-alyansa sa pasistang kampanya sa pagpanumpo sa kabanikanhan. Ang pinakatumong nila mao ang pagpugong sa pakigbisog sa katawhan ug pagpanalipod sa interes sa dagkung agalong yutaan, dagkung negosyo, ug mga langyawng kumpanya sa mina ug plantasyon.

Taliwala sa kanunayng pagdeklarar nga usa na lamang ka “huyang nga natarang gerilya” ang nabilin sa BHB, gipamahayag sa Philippine Army nga sila “nagpabiling alerto ug magpadayon sa pagpatuman og mga operasyon alang sa internal nga seguridad” aron masiguro ang “kalinaw ug kahusay” sa eleksyon. Kini nga mga operasyon nagpasiugda sa mga taktika sama sa “guns, goons, and gold” nga kinaiya sa tanang reaksyunaryong eleksyon.