Klaro ang tubag sa mga komiteng pangrehiyon sa Partido Komunista ng Pilipinas (PKP) sa nagkalain-laing bahin sa nasud sa kalihukang pagtul-id nga gipanawagan sa Komite Sentral. Gipadayag sa mga nangulong komite ang ilang paglimbasog ug padayon nga paningkamot nga tul-iron ang mga kahuyangan ug kasaypanan sa miaging mga tuig aron mahukmanong makaabante sa nagkalain-laing natad sa gimbuhaton sa ilang mga erya sa operasyon.

Mga kadaugan sa Southern Tagalog

“Angayang saulugon ang mga kadaugan sa kasamtangang kalihukang pagtul-id sa rehiyon,” pamahayag sa komite sa Southern Tagalog nga gipagawas sa ilang kalihiman. Gipaambit sa komite nga gipalig-on, gihuptan ug gipatuman sa Partido sa rehiyon ang mga katungdanan alang sa kalihukang pagtul-id. Lakip dinhi ang paglampos sa kampanya sa pagtuon sa mga kursong pangpartido sa halos lima ka libong myembro sa Partido gikan sa kabanikanhan ug kasyudaran.

Matud nila, kadaghanan sa mga komite sa Partido malampusong nakapahigayon og mga kumprehensibong pagsumada sa ilang praktika sulod sa milabayang lima ka tuig. “Ang maong mga pagsumada nagpalalum pa sa mga naunang napunting nga mga isyu gikan sa mga gipalig-on nga sumada sa ang-ang sa komiteng rehiyon,” pamahayag sa Kalihiman.

Nakatabang usab ang mga sumada aron labaw pang mahaiton ang nasusi ug napunting nga mga sayop ug kahuyangan sa mga subrehiyon/prubinsya ug mga nataran isip partikular nga porma sa empirisismo gikan 2019 hangtud 2022. Dugang pa, “Gipunting ang mabaw, panggawas ug makausa ka bahin nga pagsusi sa kahimtang ug mga butang, sayop sa istatikong pagtan-aw sa mga butang hinungdan aron mahimong hupas ang nahibal-an ug wala mitakdo ang kahibalo ngadto sa obhetibong kahimtang ug sa ingon [nakaapekto sa] natibuok nga plano ug palisiya.”

Gipahayag sa Kalihiman nga “determinado kini nga dugang pang palalumon ug palapdon ug dalhon hangtud sa kadaugan ang kasamtangang kalihukang pagtul-id.” Apan, matinud-anon usab niining gipadayag nga bisan og adunay dakung pag-abante, wala pay mahukmanong bwelo aron pugngan ang kadaut ug pag-atras sa mga rebolusyonaryong gimbuhaton ug pwersa gikan sa kabanikanhan ug kasyudaran sa rehiyon samtang adunay bahin nga padayon pa ang pag-atras.

Pagpanglimbasog sa Negros Island

Padayon nga gipalig-on sa Komiteng Rehiyon sa Negros Island ang panawagan sa Komite Sentral alang sa kalihukang pagtul-id. Sa milabayng tuig, gipaabot niini ang pagbalik-tuon sa Partido ug mga myembro sa nauna na niining natibuok nga 22 ka tuig nga sumada sa rebolusyonaryong pakigbisog sa isla sukad sa tunga-tungang bahin sa dekada 1990. Gipaambit nila nga kini ang gibasihan sa Komite alang sa 5-ka tuig nga pagsumada para sa 2017-2022.

“Nakapundo kita og bulawanong mga leksyon isip lig-ong basihan sa kinatibuk-ang plano ug direksyon nga labaw pang makapakusog sa pundasyon sa atong Partido,” pamahayag gikan sa Komite mahitungod sa pagsumada. Giila niini ang positibong kasinatian sa kolektibong pagsumada sa mga gimbuhaton sa matag komite hangtud sa ang-ang nataran.

Gipasiugdahan sa Komite ang kampanya sa pagtuon sa mga dokumentong gipagula sa Komite Sentral nga kinahanglang makanunayong tun-an. Lakip dinhi ang tulo ka ang-ang nga kurso sa Partido nga gipahigayon sa nagkalain-laing organo ug baseng masa subay sa nahimong plano sa edukasyon sa rehiyon. Mitumaw gikan kanila ang bag-ong instruktor ug bag-ong mga myembro sa Partido.

Paambit nila, samtang ginatun-an ang maong mga teoretikanhong mga sinulat, praktikal nga nakatabang sa rehiyon ang kolektibong pagtuon sa Rebolusyon, teoretikanhong mantalaan sa Partido, ug memorandum gikan Komite Sentral aron patigbabawan ang mga sayop nga pamatasan ug ideya. Matud nila, daku ang nahimong tabang sa paghubad sa dokumento, kurso ug balasahon ngadto sa Hiligaynon aron mas sayon sabton sa mga myembro, ilabina sa mga naggikan sa batakang hut-ong.

Atubangan sa mga focused military operations (FMO) sa rehimeng US-Marcos, nakasugakod ang Partido ug hukbong bayan sa rehiyon sa tabang sa kalihukang pagtul-id. Nahimo niining palapdon pa ang ginalihukang erya sa lima ka natarang gerilya sa isla kumpara sa miaging tuig. “Taliwala sa mga sakripisyo ug kalisdanan sa pagpaasdang sa armadong rebolusyon, napugngan ang ‘trend’ sa pag-atras. Hinunua, mitubo ang BHB karong tuiga kumpara sa miaging tuig,” matud sa Komite.

Nakita ang bag-ong kusog nga adunay kumpyansa sa han-ay sa Pulang manggugubat tungod sa naabot nga konsolidasyon ug mga pagbansay pulitiko-militar. Dili moubos 36 ka opensiba ang gilunsad sa Pulang hukbo sa milabayng tuig. Nakumpiska dinhi ang 17 ka armas, bala ug uban pang kahimanang militar aron maarmas ang mga bag-ong rekrut BHB. Kini tubag sa BHB sa panawagan alang sa hustisya sa daghan kaayong biktima sa paglapas sa militar ug pulis sa tawhanong katungod.