Walay hunong ang kabangis militar nga ginasabwag sa mga yunit sa Armed Forces of the Philippines (AFP) sa Negros Island. Sa unang mga semana pa lamang sa Enero, aduna nay mga kaso sa ekstra-hudisyal nga pagpatay, iligal nga pag-aresto ug uban pang mga paglapas sa tawhanong katungod nga gihimo sa mga berdugo.

Pagpatay. Tinuyo nga gipatay sa mga sundalo sa 15th IB ang naarestong Pulang manggugubat sa Bagong Hukbong Bayan (BHB)-Southwest Negros (Armando Sumayang Jr Command) nga si Rodney Lumanog (Ka Wanny) niadtong Enero 10 sa Sityo Cambogui-ot, Barangay Camindangan, Sipalay City, Negros Occidental. Sumala sa yunit sa BHB, buhi dihang nadakpan si Ka Wanny sa usa ka armadong panagsangka sa maong lugar.

Matud sa mga taho, gitortyur siya ayha gipatay sa mga sundalo. Adunay deperensya sa tiil si Ka Wanny tungod sa usa ka operasyon niadto pang dekada 1990 ug gipulihan kini og stainless.

Pag-aresto. Sa Sityo Palosais, Barangay Mahalang, giaresto sa 94th IB ang usa ka nailang Dado Sanchez niadtong Enero 14. Sumala sa mga residente, miadto ang biktima sa iyang ulingan ug wala na siya nakabalik pagkahuman. Dugang pa, gipugos siya sa mga sundalo nga magsilbing giya alang sa operasyong kombat niini.

Sa Sityo Nahulop, Barangay San Antonio, gidakop usab sa mga sundalo silang Aira Gonzales ug Alfredo Hilado niadtong Enero 15. Gikulata ang bana ni Gonzales nga si Joseph ug ang iyang silingan. Gipagawas nga nakumpiska gikan kanila ang usa ka .45 kalibreng pistola, mga command-detonated explosive, ug mga dokumento. Sa maong adlawa, iligal nga gikumpiska sa mga sundalo sa 94th IB ang mga selpon gikan sa mga residente sa Sityo Nahulop.

Pagpanghulga. Niadtong Enero 3, gihulga sa mga sundalo sa 94th IB nga pagapusilon ang magtiayong Tasi ug ilang mga silingan sa Sityo Kambudlis, Barangay Mahalang.

Pagpamig-ot. Gipasakahan og kasong “terrorism financing” ang duha ka upisyal sa United Methodist Church (UMC) ug usa ka drayber niadtong Disyembre 2024. Giakusahan sa mga pwersa sa estado silang Rev. Julius Neri Camannong ug Rev. Joel Ordaneza gikan sa UMC sa Zamboanga Sibugay, ug ang drayber nga si Romeo A. Russell nga naghatag og tabang pinansyal sa mga “terorista.”

Ang kaso kalabot sa paghatag og sangtwaryo sa mga pastor ngadto sa ginapig-ot nga mga tigpanalipud sa tawhanong katungod niadtong Enero 2024 sa Zamboanga Sibugay. Gigamit nga basehan sa mga pulis ang salaysay gikan sa kanhing aktibista ug karon ahente na sa estado nga si Nelson Bautista Jr aron kasuhan ang mga biktima.