Sa nagkaduul nga eleksyong mid-term, migrabe ang atake ug pagpamig-ot sa rehimeng Marcos ug armadong pwersa niini batok sa mga kandidato ug partido nga sakop sa Koalisyong Makabayan.

Niadtong Enero 15, nag-atubang ang mga kandidato pagkasenador sa Makabayan sa Office of the City Prosecutor sa Manila aron magsumite og kontra-apidabit batok sa kasong iligal nga asembleya o paglapas sa Public Assembly Act o Batas Pambansa 880 nga gipasaka batok kanila sa mga pulis. Kini may kalabutan sa lihok protesta niadtong Nobyembre 30, 2024, Adlaw ni Bonifacio, sa Mendiola sa Maynila.

Napulo sa 11 ka kandidato sa koalisyon ang gilambigit sa kaso, lakip na ang nominado sa Bayan Muna Party-list, mga lider sa Alliance of Concerned Teachers ug Alliance of Health Workers. Kahinumduman nga una nang gikasuhan sila KMU Chairperson Elmer “Ka Bong” Labog ug Nilo Mortifero nga myembro sa Bayan Muna nga iligal nga giaresto sa mga pulis sa adlaw sa protesta.

Niadtong Enero 10, nagpagawas og memorandum ang Bureau of Jail Management and Penology (BJMP) nga nagmando nga “hugot nga bantayan” ang mga bilanggong gidudahang may kalabutan sa Partido Komunista ng Pilipinas (PKP) o mga alyado niini. Gihisgutan usab sa mando nga dapat bantayan ang kandidato pagkasenador nga si ACT Teacher’s Rep. France Castro tungod sa kanunayng pagbisita niini sa prisohan. Gipagawas nga iya kunong gimandoan ang mga bilanggong pulitikal nga mangolekta og pondo gikan sa mga “drug trafficker” sulod sa prisohan. Nagkadaghan usab ang mga hulga nga nadawat ni Castro sa iyang kinabuhi.

Samtang, halos matag adlaw ang pagpagawas sa National Task Force-Elcac og mga pamahayag sa Red-tagging ug pagpakaylap og bakak batok sa Makabayan, mga partido ug kandidato niini.