Human ang 460 ka adlaw sa brutal nga pagpamomba ug pag-atake sa Zionistang Israel sa Gaza, natibuok ang kasabutan sa hunong-buto sa Gaza Strip. Gianunsyo kini niadtong Enero 16 sa gubyerno sa Qatar, nga nagsilbing tigpatunga sa panaghisgot, uban ang US ug Egypt. Gipatuman ang unang yugto sa kasabutan niadtong Enero 19.

Sa usa ka pamahayag, gidayeg sa Hamas ang kalig-on ug kaisog sa katawhang Palestino nga nagtukmod sa Israel nga mouyon sa usa ka hunong-buto. Dakung tikang ang kasabutan atubangan sa saad sa Israel nga dili niini ihunong ang pag-atake hangtud sa “absolutong kadaugan.” Gipakyas sa mga Palestino ang plano sa Israel nga palayason sila ug pukanon ang ilang pangandoy nga mahimong luwas sa okupasyon ug agresyon niini.

“Ang kasabutan aron tapuson ang agresyon sa Gaza usa ka kadaugan sa atong katawhan, sa atong pagsukol, ug sa gawasnong katawhan sa kalibutan,” matud sa Hamas. Gipasiugdahan sa Hamas, uban ang Palestinian Islamic Jihad, Popular Front for the Liberation of Palestine ug uban pang grupong Palestino ang mabayanihong pagpanalipud sa Gaza sulod sa 15 ka bulan. Nagpasalamat ang mga grupo sa tanang suporta gikan sa laing nasud sa ilang pakigbisog.

Giparangalan nila ang mga namartir nga Palestinong manggugubat sa ilang “maisugon ug determinadong pagsukol” batok sa brutalidad sa Israel ug US. Nagbangutan sila alang tanang mga inosenteng bata nga gipatay ug sa tanang gidaugdaug ug gipaantus sa Zionistang estado.

Moagi ang hunong-buto sa tulo ka yugto. Ang una mao ang hinanaling paghunong sa panagsangka ug pagpagawas sa Hamas sa 33 ka Israeli (mga bata, babae, ug mga tigulang edad 50 pataas) bugti sa pagpagawas sa Israel sa hangtud 1,000 ka bilanggong Palestino. Sa maong yugto, obligado ang Israel nga moatras gikan sa mga sentro sa populasyon sa Gaza ug hatagag-dalan ang pagsulod sa gikinahanglang ayuda alang sa mga pamilyang Palestino.

Sa ikaduhang yugto mahitabo ang hingpit nga pag-atras sa Israel sa Gaza ug dugang bayloay sa mga bilanggo. Sa ikatulong yugto pagasugdan ang rekonstruksyon sa teritoryong naguba sa mga airstrike sa Israel. Ang tanang detalye sa ikaduha ug ikatulong yugto ipaagi sa negosasyon samtang ginapatuman ang unang yugto sa kasabutan, nga gibanabanang molungtad og tulo ka semana.

Gitimbaya sa Partido Komunista ng Pilipinas (PKP), dungan sa mga demokratikong organisasyon sa tibuok kalibutan ang hunong-buto. Apan, kabalo ang tanan nga wala kini nagpasabot nga natapos na ang Zionistang okupasyon ug gyerang henosidyo. Sa mismong adlaw sa pag-anunsyo niadtong Enero 16, naghimo ang Israel og laing serye sa pagpamomba. Sulod sa 24 ka oras, 101 ka Palestino ang napatay ug 264 ang nasamdan sa mga airstrike niini.

“Saluduhan nato ang tanang mga manggugubat sa ilang kaisog ug kahanas sa pagsukol aron moangkon og mga kadaugan alang sa katawhang Palestino sa natad sa gubat ug negosasyon,” matud sa PKP. Gipakita sa katawhang Palestino nga unsaman kagrabe ang terorismo sa Israel, wala niini nabuntog ang ilang diwang masukulon ug determinasyon nga kab-oton ang ilang gitinguhang kagawasan.

Niadtong Enero 17, mikabat na sa 46,788 ka Palestino ang gipatay sa Israel sa gipasubsub niining henosidyo sa Gaza sa milabayng 15 ka bulan. Lakip dinhi ang 18,000 ka mga bata. Anaa sa 110,265 usab ang nasamdan, kung asa 25% niini grabeng naangol. Kapin 90% sa populasyon sa Gaza ang napalayas gikan sa ilang mga puluy-anan.