Wala untat ang kapintas militar nga ginasabwag sang mga yunit sang Armed Forces of the Philippines (AFP) sa Negros Island. Sa una nga mga semana pa lang sang Enero, may yara na mga kaso sang ekstra-hudisyal nga pagpatay, iligal nga pag-aresto kag iban pa nga mga paglapas sa tawhanon nga kinamatarung ang mga berdugo.

Pagpatay. Hungod nga ginpatay sang mga suldado sang 15th IB ang gin-aresto sini nga Pulang hangaway sang Bagong Hukbong Bayan (BHB)-Southern Negros (Armando Sumayang Jr Command) nga si Rodney Lumanog (Ka Wanny) sadtong Enero 10 sa Sityo Cambogui-ot, Barangay Camindangan, Sipalay City, Negros Occidental. Suno sa yunit sang BHB, buhi nga gindakop si Ka Wanny pagkatapos sang isa ka armado nga inaway sa nasambit nga lugar.

Suno sa mga report, gintortyur siya bag-o ginpatay sang mga suldado. May yara sang kapansanan sa tiil si Ka Wanny tungod sa isa ka operasyon sadto pang dekada 1990 kag ginbuslan ini sang stainless.

Pag-aresto. sa Sityo Palosais, Barangay Mahalang, gin-aresto sang 94th IB ang isa nga nagahinganlan nga Dado Sanchez sadtong Enero 14. Suno sa mga residente, nagpadulong ang biktima sa iya nga ulingan kag pagkatapos wala na nakabalik. Ginpilit kuno siya sang mga suldado nga mangin giya sa operasyon kombat sang mga ini.

Sa Sityo Nahulop, Barangay San Antonio, gindakop sang mga suldado sila ni Aira Gonzales kag Alfredo Hilado sadtong Enero 15. Ginkastigo naman ang bana ni Gonzales nga si Joseph kag ang upod niya nga tupad balay. Ginapagwa nga nakumpiskar sa ila ang isa ka .45 kalibre nga pistola, mga command-detonated explosive kag mga dokumento. Sa amo man nga adlaw, iligal nga ginkumpiskar sang mga suldado sang 94th IB ang mga selpon sang mga residente sang Sityo Nahulop.

Pagpaandam. Sadtong Enero 3, ginpaandaman sang mga suldado sang 94th IB nga tiruhon ang mag-asawa nga Tasi kag ila mga tupad balay sa Sityo Kamudlis, Barangay Mahalang.

Pagpang-ipit. Ginpasakaan sang kaso nga “terrorism financing” ang duha ka upisyal sang United Methodist Church (UMC) kag isa ka drayber sadtong Disyembre 2024. Ginapasibangdan sang mga pwersa sang estado sila Rev. Julius Neri Camannong kag Rev. Joel Ordaneza sang UMC sa Zamboanga Sibugay, kag drayber nga si Romeo A. Russell nga naghatag sang bulig pinansyal sa mga “terorista.”

Ang kaso ang kaangot sa paghatag sang sangtwaryo sang mga pastor sa ginapang-ipit nga mga tigpangapin sang tawhanon nga kinamatarung sadtong Enero 2024 sa Zamboanga Sibugay. Gingamit nga basehan sang pulis ang pahayag sang anay aktibista kag subong ahente sang estado nga si Nelson Bautista Jr para kasuhan ang mga biktima.