Matapos ang 460 ka adlaw sang brutal nga pagpamomba kag paglusob sang Zionistang Israel sa Gaza, nadihon ang kasugtanan sa untat-lupok sa Gaza Strip. Gin-anunsyo ini sadtong Enero 16 sang gubyerno sang Qatar, ang nagserbe nga tigpatunga sa estoryahanay, upod ang US kag Egypt. Nagdulot ang una nga hugna sang kasugtanan sadtong Enero 19.

Sa isa ka pahayag, gindayaw sang Hamas ang kapag-on kag kabaganihan sang pumuluyong Palestino nga nagaduso sa Israel nga mag-uyon sa isa ka untat-lupok. Dako nga tiyog ang kasugtanan sa atubang sang pasalig sang Israel nga indi sini pag-untaton ang pagpanglusob tubtob sa “absoluto nga kadalag-an.” Ginpaslaw sang mga Palestino ang plano sang Israel nga palayason sila kag paslawon ang ila handum para mangin hilway sa okupasyon kag agresyon sini.

“Ang kasugtanan agud tapuson ang agresyon sa Gaza ang isa ka kadalag-an sang aton pumuluyo, sang aton pagbato, kag sang hilway nga pumuluyo sa kalibutan,” suno sa Hamas. Ginpangunahan sang Hamas, upod ang Palestinian Islamic Jihad, Popular Front for the Liberation of Palestine kag iban pa nga grupo sa tanan nga suporta sa ila pagbato sa luwas sang pungsod.

Ginpasidunggan nila ang mga namartir nga Palestinong hangaway sa ila “maisog kag pag-on nga pagbato” sa atubang sang brutalidad sang Israel kag US. Ginkasubo nila ang tanan nga mga inosente nga bata nga ginpatay kag tanan nga ginpigos kag ginpaantus sang Zionistang estado.

Maga-agi sa tatlo ka hugna ang untat-lupok. Ang una ang may dagway sang gilayon nga pag-untat sang inaway kag paghilway sang Hamas sa uyat sini nga 33 ka Israeli (mga bata, babaye kag tigulang nga edad 50 pasaka) kabaylo sang paghilway sang Israeli sa tubtob 1,000 ka bilanggo nga Palestino. Sa hugna nga ini, paga-obligaron ang Israel nga mag-atras halin sa mga sentro sang populasyon sang Gaza kag hatagan ligwa ang pagsulod sang labaw ka kinahanglanon nga ayuda para sa mga pamilyang Palestino.

Sa ikaduha nga hugna mahitabo ang lubos nga pag-atras sang Israel sa Gaza kag dugang nga baylohanay sang mga bilanggo. Sa ikatatlo nga hugna pagasuguran ang rekonstruksyon sang teritoryo nga ginpulbos sang mga airstrike sang Israel. Tanan nga detalye sa ikaduha kag ikatatlo nga hugna ang ipaidalom sa negosasyon samtang ginapatuman ang una nga hugna sang kasugtanan, nga ginabulubanta magadugay sang tatlo ka semana.

Gintamyaw sang Partido Komunista ng Pilipinas (PKP), kadungan sang mga demokratiko nga organisasyon sa bilog nga kalibutan ang untat-lupok. Amo pa man, sayod ang tanan nga wala sini ginatapos ang Zionista nga okupasyon kag gyerang henosidyo. Sa adlaw mismo sang anunsyo sadtong Enero 16, naglunsar ang Israel sang panibag-o nga serye sang pagpamomba. Sa sulod sang 24 oras, 101 Palestino ang napatay kag 264 ang napilasan sa mga airstrike sini.

“Saluduhan naton ang tanan nga mga hangaway sa ila kaisog kag kahanas sa pagpakig-away para maka-angkon sang mga kadalag-an para sa pumuluyong Palestino sa patag awayan kag negosasyon,” suno sa PKP. Ginpakita sang pumuluyong Palestino nga bisan ano man kabaskog ang terorismo sang Israel, wala sini naperdi ang ila diwa nga palaban kag determinasyon nga malab-ot ang ila ginahandum nga kahilwayan.

Sadtong Enero 17, naglab-ot na sa 46,788 Palestino ang ginpatay sang Israel sa ginpaarangkada nga gyerang henosidyo sini sa Gaza sa nagligad nga 15 ka bulan. Kabahin diri ang 18,000 ka mga bata. Yara sa 110,265 ang pilason, kung sa diin 25% ang lubha nga napilasan. Masobra 90% sang populasyon sang Gaza ang napalayas sa ila mga puluy-an.