Upisyal na nga nagsugod ang panahon sang reaksyunaryo nga eleksyon sa pungsod sadtong Enero 12. Magapa-indisanay kag magdinaguso diri ang mga kandidato para makuha ang indi magnubo sa 18,000 pusisyon sa gubyerno kag panginpuslan ang burukrata-kapitalista nga sistema. Magabungguanay diri ang dalagko nga warlord kag mga dinastiya sa pulitika kag dululungan nila nga pagalapakan ang kaayuhan sang pumuluyo. Gamit nila ang ila mga armado nga maton, pulis kag pwersa militar.

Sa atubang sini, hugot nga ipatuman sang rebolusyonaryong kahublagan ang nagaluntad nga mga patakaran sa panahon sang reaksyunaryo nga eleksyon sa sakop nga erya sang operasyon. Sa mando sang Partido, pagasiguruhon sang Bagong Hukbong Bayan (BHB) ang pagpangapin sa kaayuhan, mga kinamatarung kag interes sang pumuluyo.

Nagakadapat nga ipahanumdom sa tanan nga mga nagalagas sang pwesto sa reaksyunaryo nga gubyerno nga ang mga patakaran ang hugot nga ipatuman sa mga rebolusyonaryong erya. Ang mga kandidato kag ila mga tigsuporta ang pagatugutan nga mangampanya sandig sa mga nagaluntad nga pagsulundan.

Ginadumulian ang mga pulitiko nga magdala sang mga armado nga maton kag mga eskort nga pulis kag militar nga masami ginagamit para pahugon ang pumuluyo. Ang iban pa nga porma sang pagpamilit, paggamit sang armadong kapintas ang indi pagpalampuwason, ilabi na sang mga burukrata-kapitalista nga nagagamit sa pondo sang banwa batuk sa pumuluyo. Pagatumanon sang BHB nga kuhaon ang mga armas sang mga kandidato kag ila mga armadong hurong. Kung kinahanglanon, igapatuman ini paagi sa mga tsekpoynt kag iban pa.

Dapat nga targeton sang BHB ang mga yunit sang AFP kag PNP, pati man ang mga armadong hurong sang mga reaksyunaryo nga pulitiko, nga pagagamiton ang kampanya sa eleksyon sa mga larangan gerilya isip pantabon sa mga operasyon panilag batuk sa Partido, sa BHB, sa demokratikong gubyenro sang banwa kag sa rebolusyonaryong masa.

Bag-o mangampanya sa mga rebolusyonaryong erya, kinahanglan nga magpahibalo ang mga pulitiko kag makig-angot sa mga lokal nga yunit sang BHB. Bilidhon ang koordinasyon nga ini agud malikawan ang ano man nga insidente, kabahin ang mga komprontasyon sa tunga sang mga armado nga hurong sang magkasumpong nga pulitiko.

Sigurado nga pagagamiton sang AFP ang reaksyunaryo nga eleksyon para pabaskugon ang mga operasyon kombat sini, pampulitika nga pagpanumpo kag pagkontrol sa mga barangay sa kabukiran sa balayon sang gyera kontra-insurhensya. Sa pihak nga bahin, pagaluboson man sini ang AFP kag PNP nga obligado nga ibutang sa nagkalain-lain nga banwa nga pagatumuron nga “red, orange kag yellow-risk” sandig sa kabaskugon sang banggianay sang mga lokal nga pulitiko, pati na “presensya” sang BHB. Ang mga yunit pangkombat sang AFP ang lehitimo nga target sang BHB.

Hugot nga gina-engganyo sang Partido ang mga kandidato nga likawan ang mga tanyag sang armado nga seguridad halin sa AFP, tungod ini ang ginagamit lang sang militar agud ilunsar ang pampulitika nga pagpanumpo. Masami, ang mga burukrata nga ginapaboran sang militar ang sila man nagapakigsabwatan sa pasista nga kampanya sang pagpanumpo sa kabukiran. Pinakakatuyuan sang ila nga mga operasyon nga sumpuon ang pagbato sang pumuluyo kag protektahan ang interes sang mga dalagko nga agalon mayduta, dalagko nga negosyo kag mga dumuluong nga kumpanya sa pagmina kag plantasyon.

Sa pihak sang pasulit-sulit nga pagdeklarar nga isa na lang ang “huyang nga larangan gerilya” sang BHB, ginpahayag sang Philippine Army nga sila ang “nagapabilin nga alerto kag padayon nga magalunsar sang mga operasyon para sa internal nga seguridad” agud masiguro ang “kalinong kag kasulhay” sang piniliay. Ang mga operasyon nga ini ang nagatib-ong sang mga taktika sang “guns, goons and gold” nga kinaiya sang tanan nga mga reaksyunaryong eleksyon.