Maathag ang sabat sang nagkalain-lain nga komite panrehiyon sang Partido Komunista ng Pilipinas (PKP) sa nagkalain-lain nga bahin sang pungsod sa kahublagan panadlong nga ginapanawagan sang Komite Sentral. Ginpahayag sang mga nagapamuno nga komite ang ila pagpanginbabaw kag padayon nga pagpaninguha nga tadlungon ang mga nangin kahuyangan kag pagsayop sa nagligad nga mga tinuig agud makahulusga nga maka-abante sa nagkalain-lain nga patag sang hilikuton sa tagsa nila ka sakop nga erya sang operasyon.

Mga kadalag-an sa Southern Tagalog

“Dapat ikalipay ang mga kadalag-an sang subong nga kahublagan panadlong sa rehiyon,” pahayag sang komite sa Southern Tagalog nga ginpagwa sang tiglikom sini. Ginbahin sang komite nga ginpabakod, gin-uyatan kag ginhatagan katumanan sang Partido sa rehiyon ang mga katungdanan sa kahublagan panadlong. Kabahin diri ang pagpatapos sang kampanya sa pagtuon sa mga pagtulun-an pampartido sa halos lima ka libo nga katapo sang Partido sa kabukiran kag kasyudaran.

Suno diri, kalabanan sang mga komite sang Partido ang madinalag-on nga nakalunsar sang tagsa nila ka komprehensibo nga pagsumada sa ila nga praktika sa nagligad nga lima ka tuig. “Ang mga pagsumada nga ini ang ilabi pa nagpadalom sa mga nauna na nga natumod nga mga hambalanon sa mga ginpabakod nga pagsumada sa lebel sang komite sa rehiyon,” pahayag sang Tiglikom.

Nakabulig man ang mga pagsumada para labaw pa nga patalumon ang mga natukib kag natumod nga pagsayop kag kahuyangan sa mga subrehiyon/prubinsya kag mga larangan isip mga partikular nga porma sang empirisismo halin 2019 tubtob 2022. Dugang sang tiglikom, “Gintumod ang hapaw, pang-gwa kag maka-isa ka habig nga pagtumod sa kahimtangan kag mga butang, pagsayop sa istratehikong paglantaw sa mga butang kabangdanan agud mangin hupas ang uyat nga kinaalam kag wala nagahaum sa obhetibo nga kahimtangan kag sa amo [nakaapekto sa] nadihon nga mga plano kag patakaran.”

Ginpahayag sang Tiglikom nga “determinado ini nga ilabi pa nga padalumon kag palaparon kag dalhon tubtob sa kadalag-an ang subong nga kahublagan panadlong.” Amo man, matinud-anon man nga ginpahayag sini nga samtang may dalagko nga pagsulong wala pa sang makahulusga nga pagtiyog sa pagpugong sa mga kahalitan kag pag-atras sang mga rebolusyonaryong hilikuton kag pwersa sa kabukiran kag kasyudaran sang rehiyon samtang may bahin pa nga nagapadayon sa pag-atras.

Pagpanginbabaw sa Negros Island

Padayon nga ginapabakod sang Komiteng Rehiyon sa Negros Island ang panawagan sang Komite Sentral para sa kahublagan panadlong. Sa nagligad nga tuig, ginreport sini ang pagbalik-tuon sang Partido kag mga katapo sa nauna na sini nga nadihon nga 22 ka tuig nga sumada sang rebolusyonaryong paghimakas sa isla halin sa tunga-tunga nga bahin sang dekada 1990. Ginbahin nila nga ini ang gintungtungan sang Komite para sa 5-tuig nga pagsumada para sa 2017-2022.

“Nakatipon kita sang bulawanon nga mga leksyon isip mabakod nga basehan sa pangkabilugan nga plano kag direksyon nga labaw pa makapabaskog sa pundasyon sang aton Partido,” pahayag sang Komite angot sa pagsumada. Gintumod sini ang positibo nga inagihan sang kolektibo nga pagsuma sang mga hilikuton sang tagsa ka komite tubtob sa lebel sang larangan gerilya.

Ginsulong sang Komite ang kampanya nga pagtuon sa mga dokumento nga ginpagwa sang Komite Sentral nga dapat padayon nga tun-an. Kabahin diri ang tatlo-lebel nga kurso sang Partido nga ginlunsar sa nagkalain-lain nga organo kag masang katapuan sandig sa nangin plano sa edukasyon sang rehiyon. Nagtuhaw sa kubay nila ang bag-o nga mga instruktor kag mga bag-ong katapuan sang Partido.

Pagbahin pa nila, samtang ginatun-an ang teoritikal nga mga sinulat nga ini, praktikal nga nakabulig sa rehiyon ang kolektibo nga pagtuon sa Rebolusyon, ang teoritikal nga dyornal sang Partido, kag mga memorandum halin sa Komite Sentral para panginbabawan ang mga sayop nga gawi kag ideya. Dako ini ang nabulig sang paglubad sang mga dokumento, kurso kag balasahon padulong sa lenggwahe nga Hiligaynon para sa mas madali nga paghangop sang mga katapo, ilabi na ang mga naghalin sa sandigan nga sahi.

Sa atubang sang mga focused military operations (FMO) sang rehimen US-Marcos, nakapanginbabaw ang Partido kag hukbo sang banwa sa rehiyon sa bulig sang kahublagan panadlong. Nahimo sini nga pasangkaron ang ginahulagan nga erya sang lima ka larangan gerilya sa isla kung ikumpara sa nagligad nga tuig. “Sa tunga sang mga sakripisyo kag kabudlayan sa pagsulong sang armado nga rebolusyon, napunggan ang “trend” sang pag-atras. Sa baylo, nagdamo ang BHB subong nga tuig kumpara sa nagligad nga tuig,” suno sa Komite.

Nagtuhaw ang panibag-o nga kusog nga may kumpanya sa kubay sang mga Pulang hangaway tungod sa nalab-ot nga konsolidasyon kag mga paghanas sa pulitiko-militar. Indi magnubo sa 36 nga mga opensiba ang ginlunsar sang Pulang hukbo sa nagligad nga tuig. Nakumpiskar sini ang 17 ka armas, bala kag iban pa nga kagamitan militar nga maga-armas sa bag-o nga mga rekrut sang BHB. Nangin sabat ini sang BHB sa panawagan para sa hustisya sang tuman kadamo nga biktima sang mga paglapas sa tawhanon nga kinamatarung sang militar kag pulis.