Sa nagahilapit nga mid-term nga eleksyon, nagabaskog ang atake kag pagpang-ipit sang rehimen Marcos kag armado nga pwersa sini batuk sa mga kandidato kag partido sa idalom sang Koalisyon nga Makabayan.

Sadtong Enero 15, nag-atubang sa Office of the City Prosecutor of Manila ang mga kandidato pagkasenador sang Makabayan para magpasaka sang kontra-salaysay sa kaso nga iligal nga asembleya ukon paglapas sa Public Assembly Act ukon Batas Pambansa 880 nga ginpasaka sa ila sang mga pulis. Kaangot ini sang hublag protesta sadtong Nobyembre 30, 2024, Adlaw ni Bonifacio, sa Mendiola sa Manila.

Napulo sa 11 ka kandidato sang koalisyon ang gindalahig sa kaso upod ang nominado sang Bayan Muna Party-list, mga lider sang Alliance of Concerned Teachers kag Alliance of Health Workers. Matandaan nga nauna na nga ginkasohan sila KMU chairperson Elmer “Ka Bong” Labog kag Nilo Mortifero, katapo sang Bayan Muna nga iligal nga gin-aresto sang mga pulis sa adlaw sang protesta.

Sadtong Enero 10, nagpagwa sang memorandum ang Bureau of Jail Management and Penology (BJMP) nga nagmando nga “hugot nga bantayan” ang mga bilanggo nga ginadudahan nga may kaangtanan sa Partido Komunista ng Pilipinas (PKP) ukon mga alyado sini. Gintumod man sa kasuguan nga dapat bantayan ang kandidato pagkasenador nga si ACT Teacher’s Rep. France Castro tungod sa masako niya nga pagbisita sa bilangguan. Ginapagwa nga ginasugo niya kuno ang mga bilanggong pulitikal nga magtipon sang pondo halin sa mga “drug trafficker” sa prisohan. Nagadamo man ang nagakabaton ni Castro nga pamahog sa iya nga kabuhi.

Samtang, halos adlaw-adlaw ang pagpagwa sang National Task Force-Elcac sang mga pahayag sang Red-tagging kag pagpalapta sang kabutigan batuk sa Makabayan, mga partido kag kandidato sini.