Supak sa ginapangayo nga katarungan sang pumuluyong Pilipino, uyaya subong si Marcos sa pagduso sang impeachment ukon paghukom sa Kongreso kay Vice President Sara Duterte, kag sa pagpa-aresto kay anay Presidente Rodrigo Duterte para mag-atubang sa International Criminal Court. Ini sa pihak nga nagasinggitan na ang mga ebidensya sang malala nga korapsyon ni Sara, kag mga krimen batuk sa katawhan ni Rodrigo.

Ginasunod ni Marcos ang panugyan sang amo nga imperyalistang US nga tapuson ang pakigbanggi niya sa mga Duterte agud indi magkahangawa ang mga dumuluong nga monopolyo kapitalista nga magpangapital sa pungsod. Sa baylo nga pamati-an ang singgit sang katawhan para sa katarungan, ginauna ni Marcos ang konsolidasyon sang iya nga poder para amat-amat nga kuhaan ang mga Duterte sang gahum kag impluwensya. Kabahin sang mga tikang nga ini ang ginahimo nga “loyalty check” kag pagbalasa sang mga upisyal sang AFP kag PNP kag reorganisasyon sang National Security Council.

Pinaka-katuyuan ni Marcos ang mas pahugton ang kontrol sa gahum pampulitika para pangapinan ang kaugalingon nga burukrata-kapitalista nga interes. Isa ka nagapanguna nga ginahatagan pagtamod subong ni Marcos amo ang palaabuton nga eleksyon sa Mayo. Ginagamit niya ang bug-os nga kusog sang estado kag pampubliko nga pondo agud siguraduhon nga makontrol sang iya mga alipures ang Senado, Kongreso kag mga lokal nga gubyerno. Ang konsolidasyon sang poder ni Marcos ang ginagamit niya batuk sa pumuluyo kag batuk sa mga karibal niya sa pulitika.

Sa tuyo nga lumsan ang singgit sang katawhan para sa katarungan kag pahugon ang mga kongresista kag grupo nga nagaduso sang impeachment, nag-gasto ang mga maki-Duterte nga lider sang Iglesia ni Cristo sang ginatos ka milyon piso para tipunon ang minilyon ka katapo sini sa mga rali sadtong nagligad nga semana. Gingamit ang mapaniplang nga tema nga “paghiliugyon kag kalinong” agud tabunan ang ginapangayo sang pumuluyo nga katarungan kag singgit para pasabton ang ginaka-ugtan nila nga mag-amay nga Duterte.

Masobra isa ka bulan na ang nagligad sang asud-asod nga ginpasaka ang tatlo ka kaso sang impeachment sa Kongreso. Apang sa kumpas ni Marcos, nga naghambal nga ang impeachment ang “pag-usik sang panahon” kag “wala pa sa husto nga ti-on,” wala pa sang bisan isa sa tatlo nga ini ang nasuguran iproseso. Ginapagwa sang iban nga ginahulat ni Marcos nga masigurado nga uyat niya ang mayorya sa Senado agud sigurado nga mahukman si Sara Duterte. Ang matuod, nagapabungol-bungol si Marcos sa singgit sang katawhan kag ginapunggan kag ginabungkag ang inisyatiba sang nagkalain-lain nga demokratiko nga sektor nga pasabton si Sara Duterte kag amay nga si Rodrigo.

Ang pag-atrasar ni Marcos sa kaso sang pagpahalin kay Sara Duterte ang ilabi nga naga-gatong sa kaakig sang pumuluyong Pilipino. Indi nila mabatas nga makita nga padayon nga nagaluntad ang bise presidente nga utok sa maanomalya nga pag-gasto sa ginatos ka milyon piso nga kwarta sang banwa. Kag ilabi nga indi nila mabatas nga ang binilyon piso nga badyet sang reaksyunaryo nga gubyerno nga naghalin sa ginabayaran nga buhis sang ordinaryo nga pumuluyo ang ginabulsa sang mga korap nga upisyal sang gubyerno, sa pagpanguna sang burukrata-kapitalista nga si Marcos.

Ilabi nga nagadalom ang kaakig sang pumuluyong Pilipino sa atubang sang nagalala nga nagalala nga krisis sa palangabuhian, ilabi na sa asud-asod nga pagsaka sang presyo sang pagkaon, lana kag nagkalain-lain nga balaklon sa una nga semana sang 2025. Padayon nga nagapabungol-bungol si Marcos sa singgit sang mga mamumugon kag ordinaryo nga empleyado nga pataason ang suhol kag sweldo, nga tuman ka kulang para mabuhi sang disente ang mga pamilyang Pilipino.

Wala sang solusyon ang rehimen Marcos sa naga-grabe nga problema sang malaparan nga disempleyo, kag ginapabay-an na lang ang mga tawo nga mansig-mansig mangita sang ila palangitan-an. Mas malala pa, ginadingutan ang minilyon ka mangunguma, mangingisda, mga drayber sang dyip kag iban pa nga sektor sa atubang sang mga burges-kumprador kag kasabwat nga dumuluong nga mga kumpanya kag bangko nga agawon ang ila duta kag palangabuhian.

Sa atubang sang malapad nga pag-antus kag kapigaduhon sa palangabuhian sang katawhan, nagabaskog nga pagpanumpo ang sabat sang rehimen Marcos sa tuyo nga tabunan ang ila mga hibubun-ot. Padayon nga nagadamo ang kaso sang sarbeylans, pagpang-ipit sa mga organisasyon, pagpasaka sang mga himu-himo nga kaso, pag-aresto, tortyur kag ekstra-hudisyal nga pagpamatay batuk sa ordinaryo nga pumuluyo nga naga-isa para ipakigbato ang ila nga interes kag kaayuhan. Todo-todo ang paggamit subong ni Marcos sa mga laye “kontra-terorismo” para sa pagpanumpo sa mga kinamatarung. Mas malala ang kahimtangan sa kabukiran kung sa diin direkta nga laye militar ang ginapatuman sa linibo ka mga barangay nga ginakontrol kag ginahari-harian sang mga pasista nga suldado.

Agud isulong ang kaayuhan kag kinamatarung sang masa sang pumuluyong Pilipino, dapat maukod nga bugkuson ang ila kubay kag hatagan sang gamhanan nga porma ang ila kaakig sa mga krimen kag kasal-anan sang mga Duterte, kag sa nagapadayon nga burukrata-kapitalista kag pasista nga paghari sa idalom ni Marcos. Ilabi nga pabaskugon ang malapad nga nagahiliugyon nga prente para tipunon ang tanan nga sektor, organisasyon kag mga indibidwal sa panawagan nga pasabton ang mga Duterte. Dapat tukuron ang nagkalain-lain nga porma sang kahugpongan kag mga alyansa, pormal man ukon indi pormal, agud mabuyok ang pinakamalapad nga masa nga makigbahin sa nagkalain-lain nga porma sang hublag kag pagpadayag sang hibubun-ot.

Kinahanglan makahulusga nga isulong ang demokratiko nga kahublagan masa para pasabton ang mga Duterte kag pabaskugon ang awayan sa pagpugong sa mga Marcos kag sa kabilugan nga burukrata-kapitalista nga sistema. Tuman ka paborable ang sitwasyon para pukawon ang masa kag madasig nga palaparon ang ila nga organisado nga kubay. Matambok ang duta agud madamuan nga patubuon ang mga unyon kag hugpong masa lunsay sa kasyudaran kag kabukiran.

Sakmiton ang tuman kahaum nga sitwasyon agud isulong ang pang-ekonomya kag pampulitika nga mga awayan sang masa kag mag-angkon sang mga kadalag-an sa ila mga paghimakas. Dapat iangot ang mga ini sa pagbato sa rehimen US-Marcos kag sa pagsulong sang pungsodnon-demokratiko nga kahublagan.

Dapat mapagsik nga maghulag kag ilabi nga magpakabakod ang mga kadre kag katapo sang Partido agud magserbe nga ubod sa mga pagbato sang masa. Sila ang iwag kag giya sa pagsulong sang masa sa mabudlay nga banas sang paghimakas. Dapat tukuron ang mga likom nga organisasyon masa nga direkta nagasuporta sa pagsulong sang armado nga paghimakas, kag nagapukaw sa masa nga magpatapo sa Bagong Hukbong Bayan.