Walk-out iti UP Baguio. Agarup 1,200 nga estudyante, manursuro ken empleyado ti University of the Philippines (UP)-Baguio ti timmabuno iti naiyaramid a walk-out idi Pebrero 26 para iti nangato a pondo iti edukasyon, transparency iti badyet ken sungsungbatan ti administrasyon. Kadakkelan daytoy a demonstrasyon iti napalabas a mano a tawen iti UP Baguio. Iti panangiyuna ti Alliance of Concerned Students (ACS), binabalaw da ti saan nga umno a panagaramat ti pondo ti unibersidad a naibunannag idi Disyembre 2024 iti Commission on Audit 2023 Annual Audit Report.

Sala-protesta ti babbai. Adda iti 1,000 babbai a mangmangged ti Southern Tagalog ti nagtitipon idiay Laguna tapno isayangkat ti sala-protesta a paset ti tignay One Billion Rising idi Marso 2. Ti aktibidad ket inyuna ti Women Workers United (WWU) a nagpanawagan para iti pananggibus ti kinaranggas iti lugar ti pagtrabahuan, panangingato ti sweldo iti makabiag a tukad, regular ken disente a trabaho, akses iti pangpubliko a serbisyo ken karbengan dagiti mangmangged nga agunyon.

30 tawen ti Philippine Mining Act. Nagprotesta iti sakaanan ti Mendiola idiay Manila dagiti grupo a makakalikasan iti sidong ti Kalikasan PNE ken dadduma pay a progresibo a grupo tapno ipanawagan ti panangibasura iti Philippine Mining Act of 1995 iti maika-30 tawen daytoy idi Marso 3. Awit dagiti nagprotesta ti maysa a mapa ti Pilipinas a mangipakpakita nu sadinno dagiti kadadakkelan a minasan iti pagilyan ken dagiti dinastiya iti pulitika nga agtagikua kadagitoy.

Bagi tayo ti 15-kilometro. Agkaykaysa ti nasurok 100 mangngalap, akademiko, dagiti estudyante ken tao’t-simbaan ti Iloilo iti panangbukel ti alyansa nga Aton ang Kinse Kilometro idi Marso 3 tapno irupir ti karbengan ti babassit a mangngalap iti 15-kilometro a municipal water. Dimmay-ay iti taripnong dagiti kameng ti Pamalakaya manipud iti Panay.