Naguurnong itay nabiit ti manopulo a kamkameng ti Compatriots tapno isayangkat ti istorikal a kumperensya ti tignay ti migrante a Pilipino. Ibagbagi ti rebolusyonaryo a timpuyog a Compatriots ti espesyal a sektor dagiti migrante a Pilipino iti National Democratic Front of the Philippines.

Iti balangkas ti tignay panagilinteg, pinasingkedan ti Compatriots ti rebbengen daytoy nga organisaen ken patignayen dagiti kailyan a Pilipino iti nailyan-demokratiko a rebolusyon, sadinno man ti ayanda a paset ti lubong. Dumandanon iti 15 milyon ti migrante a Pilipino, kabilang ti minilyon a temporaryo a mangmangged iti nababa a klase ti trabaho. Manipud 2023, dumanon iti agarup 10,000 a Pilipino ti inaldaw a rumrumwar iti pagilyan gapu iti kinakirang ti lokal a trabaho, kinaawan wenno agkurkurang a sapul ken nakababbaba a sweldo, panagkamkam ti daga ken pagbiagan. Babaen ti patakaran iti panag-eksport iti tegged, isuda ket isaksakripisyo ti reaksyunaryo nga estado tapno kissayan ti krisis iti empleyo iti pagilyan. Isuda ket makikkikilan ti minilmilyon iti langa dagiti singir iti basaran a serbisyo a saan da met a malaklak-am.

Kadagiti gangannaet a pagilyan, sagsagabaen da ti panag-abuso, panaglabsing kadagiti karbengan da iti tegged, rasismo wenno diskriminasyon iti puli, kinaranggas ken nakangatngato a gastos iti migrasyon. Awan ti proteksyon da, nangruna dagiti babbai a mangmangged nga adda kadagiti trabaho a pinakabulnerable iti abuso ken krimen.

Inadal ti Compatriots ti panagsuma iti nasurok uppat a dekada a rebolusyonaryo a trabaho iti intar dagiti migrante ken immadaw da kadagiti adal iti nabaknang a kapadasan manipud kadagitoy. Sinublian da dagiti adal ti umuna ken maikadwa a naindaklan a tignay panagilinteg tapno ilugar ti panawagan ti agdama a tignay panagilinteg laban iti suhetibismo, konserbatismo, ultrademokrasya ken burukratismo.

Napagadalan met iti kumperensya dagiti resulta ti panagsukisok iti gimong ken panagamiris iti dasig (SICA wenno social investigation and class analysis) nga insagana dagiti komite daytoy iti nadumaduma a pagilyan ken kontinente. Babaen kadagiti SICA, nasungbatan ken nailawag ti Compatriots dagiti madagdagus a saludsod kanaig iti sektor ken naikeddeng dagiti patakaran iti panagpalawa ken panag-organisa da.

Tapno iyabante ti interes dagiti Pilipino a migrante, tinalmegan ti Compatriots ti pagkasapulan a buklen dagiti organisasyon iti intar da tapno iyabante dagiti demokratiko a karbengan da, kabilang ti karbengan iti trabaho ken dagiti proteksyon a panggimong kadagiti pagilyan a pagtrabtrabahuan da. Sinigurado met daytoy ti panag-organisa kadagiti limed nga organisasyon ti masa nga agserbi a kabinnadang ti Partido iti panangidaulo iti tignay migrante, panangpapigsa ti tignay ti migrante a mangmangged a Pilipino ken nalawa a multisektoral a patriyotiko a tignay masa dagiti Pilipino iti nadumaduma a pagilyan. Tantannawagan ti Compatriots nga iti panagpigsa dagitoy a tignay, dumakkel pay ti maibinglay daytoy iti anti-imperyalista a pannakikinnabsat, kasta met iti panangiyabante ti internasyunal a proletaryado a rebolusyon.

Nairut a nakasilpo iti kasasaad dagiti migrante ti usapin a sangsangwen ti umili iti Pilipinas, kas ti barat a sweldo dagiti mangmangged ken kinaawan ti daga, kinarinuker dagiti burukrata-kapitalista nga agar-ari iti estado ken panangsallukob ti imperyalismo a US iti gimong a Pilipino. Nu pagpilyen, kaykayat da nga agtalinaed iti pagilyan a kadwa dagiti ipatpateg da iti biag. Bayat nga adda da iti ruar ti pagilyan, ultimo a tarigagay da a makaawid iti ina a pagilyan.

Kas Pilipino, mabigbig dagiti migrante kas paset ti nailyan a tignay mamagwayawaya. Ti solusyon iti migrasyon da ket ti panangiyabante ti nailyan demokratiko a rebolusyon. Karit iti Compatriots ti panagpapigsa ti tignay laban iti managgundaway ken mangidadanes nga aso-aso a reaksyunaryo nga estado iti Pilipinas ken panagpalawa iti suporta iti naunday a gubat ti umili iti tengnga ti kumarkaro a pasismo iti sangalubongan.

Tantannawagan ti Partido ken ti umili a Pilipino ti aduan a panagawid dagiti migrante iti Pilipinas tapno makipaset iti rebolusyonaryo a tignay iti Pilipinas, nangruna iti tay-ak ti armado a dangadang, para iti panangpanday ti gimong a pudno a nawaya, demokratiko ken nasaliwanwan.