Walk-out sa UP Baguio. Gibanabanang 1,200 ka mga estudyante, magtutudlo ug empleyado sa University of the Philippines (UP)-Baguio ang misalmot sa gihimong walk-out niadtong Pebrero 26 alang sa taas nga pondo sa edukasyon, transparency sa badyet, ug tulubagon sa administrasyon. Pinakadaku ang maong demonstrasyon sa milabayng pipila ka tuig sa UP Baguio. Sa pagpanguna sa Alliance of Concerned Students (ACS), gimakmak nila ang sayop nga paggamit sa pondo sa unibersidad nga nabutyag niadtong Disyembre 2024 sa Commission on Audit 2023 Annual Audit Report.

Sayaw-protesta sa kababayen-an. Anaa sa 1,000 ka kababayen-ang mamumuo sa Southern Tagalog ang nagtapok sa Laguna aron ilunsad ang sayaw-protesta nga kabahin sa kalihukang One Billion Rising niadtong Marso 2. Gipasiugdahan sa Women Workers United (WWU) ang aktibidad nga nanawagan alang sa pagtapos sa kabangis sa mga pabrika, pagpataas sa suhulan sa makabuhi nga ang-ang, regular ug disenteng trabaho, akses sa serbisyo publiko ug katungod sa mga mamumuong mag-unyon.

30 ka tuig sa Philippine Mining Act. Nagprotesta sa tiilan sa Mendiola sa Maynila ang mga grupong para sa kinaiyahan ilalum sa Kalikasan PNE ug uban pang mga progresibong grupo aron ipanawagan ang pagbasura sa Philippine Mining Act of 1995 sa ika-30 ka tuig niini niadtong Marso 3. Dala sa mga nagprotesta ang usa ka mapa sa Pilipinas nga nagpakita kung asa ang pinakadakung minahan sa nasud ug ang mga dinastiya sa pulitika nga nanang-iya niini.

Ato ang 15-kilometro. Nagkahiusa ang kapin 100 ka mangingisda, akademiko, mga estudyante ug tawong-simbahan sa Iloilo sa pagtukod sa alyansang Aton ang Kinse Kilometro niadtong Marso 3 aron panalipdan ang katungod sa gagmayng mangingisda sa 15-kilometrong municipal water. Mitambong sa panagtapok ang mga myembro sa Pamalakaya gikan sa Panay.