Iti panagrambak ti Sangalubongan nga Aldaw ti Babbai iti Marso 8, padayawan ti Partido ti amin a babbai a timmakder iti kaskenan a lugar da iti rebolusyon. Isuda dagiti babbai a rebolusyonaryo, kadre, dagiti Nalabbaga a kumander ken mannakigubat, a dimmalyasat iti narigat a dana ti panaglaban, nagtignay ken nangidaulo ken ti adu ket nagiggem ti armas, tapno gun-oden ti natatayag nga arapaap para iti pannakawayawaya ti babbai ken intero nga umili.

Isuda dagiti saan a nagrukma wenno simmuko iti tengnga ti naiinget a labanan, napnuan rebolusyonaryo a pakinakem agingga iti maudi nga anges. Isuda dagiti rebolusyonaryo a bitwen nga agnanayon nga agrimat.

Kangatwan a pammadayaw ti ipapaay ti Partido kadagiti babbai a nangidaulo iti Partido, hukbo ti umili ken rebolusyonaryo a tignay. Padpadayawan ti Partido dagiti babbai a nagbalin a kagawad ti Komite Sentral a da Ka Maria Malaya (Myrna Sularte), kalihim ti Panrehiyong Komite ti Northeast Mindanao ken Komisyon ti Mindanao; Ka Bagong-Tao (Wilma Tiamzon), kabuklan a kalihim ti Partido; Ka Fiel (Eugenia Magpantay), kabuklan a kalihim ti Partido; Ka Elay (Helenita Parladis), kalihim ti Panrehiyong Komite ti Eastern Visayas; Ka Lalay (Aprecia Alvarez Rosete), kalihim ti Panrehiyong Komite ti Western Mindanao; Ka Sandy (Josephine Mendoza), maikadwa a kalihim ti Panrehiyong Komite ti Southern Tagalog ken Ka Kaye (Sandra Reyes), kagawad ti Komisyon ti Mindanao.

Saan met a malipatan ni Ka Concha Araneta Bocala, tagapagsarita ti National Democratic Front-Panay ken ginasut pay a babbai a nagserbi a kalihim, giyang pampulitika, kumander, mannakigubat, duktor ken nars ti masa, organisador, propagandista, taguyod, manursuro ken tagasanay, pangiyangesan ti marikrikna ken tagabalakad ken dadduma pay.

Rambakan tayo ti nakadakdakkel a naibingay ti babbai iti rebolusyon a Pilipino. Ipateg tayo ti ip-ipan da a sirib, regget ken taer a mangpabpabaknang ken mangpatpatibker iti dangadang ti umili. Iti tay-ak ti dangadang para iti umili ken para iti babbai, magungun-od da ti kapkapnekan da bilang tao ken kapatas dagiti lallaki. Lablabanan da ti kultura a patriyarkal a mangibilbilang kadakuada a nalupoy wenno nababbaba, ken inpamatmat da ti landok a pagtakderan.

Dagiti babbai a rebolusyonaryo ket namnama para iti minilyon a babbai nga agsagsagaba iti gimong a mangibilbilang kadakuada a nababbaba ken nakapkapsut. Pagwadan isuda para kadagiti babbai nga agsusweldo ti nababbaba ken makapatuok a paulit-ulit na trabaho; dagiti agsuksukay ti daga iti talon ngem saan a maibilbilang a produktibo; dagiti awanan daga ken mapadpadisi manipud kadagiti ansestral a daga da; nakagalut iti panagtagibalay ken panagaywan ti asawa ken anak ngem limitado, nu adda man boses da iti bukod a pagtaengan; kadagiti saan a makaruk-at kadagiti managabuso a relasyon gapu iti buteng ken kinaawan bileg iti ekonomya; kadagiti napilitan nga agbanyaga iti sabali a pagilyan tapno adda maipakan iti pamilya da; kadagiti makapadpadas ti diskriminasyon iti kasarian ken kadagiti biktima ti sekswal a panagabuso ken kinaranggas.

Bigbigen tayo ti naisangsangayan a kontribusyon da kas inna ken asawa iti panangbukel kadagiti rebolusyonaryo a pamilya ken relasyon, iti panangriing ken militante a panangitandudo kadagiti patakaran para iti proteksyon ti babbai, ubbing ken LGBT laban iti panaggundaway ken panangidadanes. Bigbigen tayo ti papel da iti panangingato ti kamulatan ti lallaki ken umili kanaig kadagiti usapin ti babbai, panangiyabante ti patas a panangibilang iti kasarian ken panangbukel ti natibker a sistema ti suporta para kadagiti kapada a babbai.

Ipateg tayo dagiti sakripisyo da, ti panangtallikod iti kumportable a biag ken managimbubukod nga arapaap, ti panangibtur iti adu a kinarigat iti gubat, ken nangruna ti napaut a pannakaisina iti bukod da nga annak. Iti laksid dagitoy, ti biag da iti dangadang ket napnuan ragsak ken regta. Saan a maibus dagiti istorya a nakaay-ayat, nakakatkatawa ken makapasangit a kapadasan dagiti babbai a makidangdangadang. Kas kadagiti naisangsangayan a sabong iti kabakiran, dungdungwen ken an-annadan isuda ti masa ken dagiti kakadwa.

Iti sango ti kumarkaro a kinarigat ken panagsagaba ti pinullo a milyon a pamilya iti tengnga ti krisis iti ekonomya nga ituntunda ti korapsyon ti rehimen Marcos, ken dagiti patakaran programa a kontra-marigrigat ken maka-gangannaet a kapitalista, agtultuloy a maririing ti babbai kadwa ti intero nga umili, iti pagkasapulan a tumakder ken lumaban.

Kabilang dagiti babbai iti unaan dagiti mangmangged a sipapasnek nga agibangbangon kadagiti unyon ken nadumaduma a timpuyog da. Kabilang isuda kadagiti mangiyun-una iti panangirupir kadagiti arungaing ken kadawatan para iti nayon a sweldo, karbengan iti regular a trabaho ken mas makatao a kundisyon iti panagtrabaho. Kabilang isuda kadagiti natured a tumaktakder iti panangsango iti buklis a kapitalista, kadagiti armado a maton na ken pasista nga ahente ti estado.

Adda da iti unaan ti masa a nakurapay a lumablaban iti awan-ressat a panagngato ti presyo ti bagas, taraon, langis, sungrod, agas, plete ken nadumaduma a serbisyo. Isuda dagiti inna ken annak a makikaykaysa kadagiti karruba da tapno babalawen ni Marcos ken dagiti pulitiko iti panangbusbos iti kwarta ti umili para iti nabarayuboy a panagbiag da ken tapno supyaten ti saan nga agpatengga a panagutang ti gubyerno tapno pondoan ti korapsyon. Kadagiti kampus, kabilang dagiti babbai nga agtutubo nga agmarmartsa iti sangwanan ti panaglaban iti awan-sarday a panagngato ti matrikula ken magastos iti panagadal, kasta met iti panaglaban iti panagpakaaso-aso ni Marcos iti US ken panangguyod ti pagilyan iti imperyalista a gera.

Iti kaaw-awayan, kabilang dagiti babbai iti masa nga agor-organisa ken agtigtignay laban iti rehimen Marcos ken iti patakaran daytoy iti todo a liberalisasyon a mangpatpatay iti pagbiagan ti minilyon a mannalon. Karaman isuda iti sangsangkamaysa nga agpukpukkaw para iti pudno a reporma iti daga, ken madagdagus a kiddaw tapno ibaba ti abang ti daga, interes iti pautang ken dagiti agum nga usurero ken bangko ken presyo dagiti ramramit iti panagtalon. Iti mano ribo a barangay a konkontrolen ti militar, natured a babbabalawen da ti panagabuso ken kinaranggas dagiti pasista a soldado, nangruna laban iti babbai ken dagiti ubbing.

Kabilang dagiti babbai iti unaan dagiti agtutubo a baro a Nalabbaga a mannakigubat ti NPA. Kas dagiti immuna a kaputotan ti babbai a mannakigubat, ipampamatmat da tatta ti awan patengga a kinamaingel iti panangsango iti kabusor, ken di- aggibus a panagayat ken panangtagiben kadakuada iti masa a kabinnulig da iti tarigagay para iti nawaya ken naranyag a masakbayan.