Walk-out ha UP Baguio. Gintatantiya nga 1,200 nga mga estudyante, magturutdo ngan empleyado han University of the Philippines (UP)-Baguio an nagpartisipar ha ginhimo nga walk-out hadton Pebrero 26 para ha hitaas nga pondo ha edukasyon, transparency (abrido nga libro-de-kwenta) ha badyet, ngan baratunon han administrasyon. Pinakadako ini nga demonstrasyon ha naglabay nga pira katuig ha UP-Baguio. Ha pangunguna han Alliance of Concerned Students (ACS), ginsukna nira an sayop nga paggamit han pondo han unibersidad nga iginbuksas hadton Disyembre 2024 ha Commission on Audit 2023 Annual Audit Report.

Sayaw-protesta han kababayin-an. Aada ha 1,000 nga kababayin-an nga trabahador han Southern Tagalog an nagtirok ha Laguna agud ilansar an sayaw-protesta nga kaparte han kagiusan nga One Billion Rising hadton Marso 2. Ginpangunahan han Women Workers United an aktibidad nga nanawagan para ha pagtapos han pandarahug ha lugar han pagtrabaho, paghitaas hin suhol ha makaburuhi nga lebel, regular ngan disente nga trabaho, akses ha pampubliko nga serbisyo ngan katungod han mga trabahador nga mag-unyon.

30 katuig han Philippine Mining Act. Nagprotesta ha ubod han Mendiola ha Manila an mga grupo nga makakalibungan ilarum han Kalikasan PNE ngan iba pa nga progresibo nga grupo agud ipanawagan an pagpabasura ha Philippine Mining Act of 1995 ha ika-30 katuig hini hadton Marso 3. Dara han mga nagprotesta an usa nga mapa han Pilipinas nga nagpapakita kun hain an pinakadagko nga minahan ha nasud ngan an mga dinastiya ha pulitika nga nagtatag-iya hini.

Aton an 15-kilometro. Nagkaurusa an masobra 100 nga parupangisda, akademiko, mga estuyante ngan tawo ha singbahan ha Iloilo ha pagbug-os hin alyansa nga Aton ang Kinse Kilometro hadton Marso 3 agud depensahan an katungod han gudti nga parupangisda ha 15-kilometro nga municipal waters. Tinambong ngan pinartisipar ha katitirok an mga kaapi han Pamalakaya tikang ha Panay.