Idi Marso 5, aggigiddan a nagsardeng iti panagtrabaho ti nasurok 1,300 mangmangged iti Nexperia Philippines Inc ken naideklara ti welga iti pabrika daytoy iti Light Industry Science Park 1 idiay Cabuyao, Laguna. Panggep daytoy a sangsangkamaysa nga iyabante da ti dangadang para iti umento iti sweldo, panangisubli kadagiti naikkat a mangmangged ken laban iti panagduprak iti unyon da.

Mano tawenen nga an-anusan dagiti mangmangged iti Nexperia ti kapitalista a panangrabngis iti pagimbagan ken saan a panangikaso kadagiti arungaing da. Agintutuleng ti maneydsment ti kumpanya kadagiti kadawatan da para iti makabiag a sweldo, laban iti panagsisante ken kontra kadagiti panagatake iti karbengan da iti panagunyon. Pabor iti interes ti kapitalista, nagiparuk-at ti “assumption of jurisdiction” ti Department of Labor and Employment (DOLE) tapno ipasardeng ti anyaman a plano a welga tapno kano “bumallaet” daytoy.

Ketdi, ididiaya ti kapitalista ti makainsulto nga umento a ₱17 kada aldaw kagiddan ti agsasaruno a panagikkat ti ginasut a mangmangged manipud pay 2023. Tapno agakup ti dumakdakkel a ganansya, dagiti mangmangged ket mapwerpwersa nga agdoble-oras ti panagtrabaho. Idi 2024, nadanon ti kumpanya ti produksyon ti siyam a bilyon nga electronic chips nga maar-aramat iti produksyon dagiti lugan, ramit pangkomunikasyon ken dadduma pay. Naaramid daytoy iti panangpwersa kadagiti mangmangged nga agiggem ti agingga ti uppat a makina tunggal maysa, a plano pay a maipangato iti siyam a makina kadagiti umay a panawen.

Saan a mailibak ti istorikal a kinapateg ti welga iti Nexperia. Maysa daytoy kadagiti kadakkelan a welga iti napalabas a mano a tawen iti maysa a gangannaet a kumpanya. Daytoy a welga ket direkta a panangkarit iti patakaran a “no strike” a nairut a maipatpatungpal kadagiti export processing zone. Ipakpakita ti kinatured dagiti mangmangged ti Nexperia a sibibiag ti pakinakem ti panaglaban dagiti mangmangged a Pilipino. Ipalpalagip daytoy iti amin a mangmangged ti kinapateg ti panagkaykaysa ken pangngeddeng a lumaban tapno salakniban ti pagimbagan ken naindasigan a dignidad da.

Bimtak ti welga dagiti mangmangged iti Nexperia iti tengnga ti kumarkaro a sosyo-ekonomiko a krisis a mangparparigat iti intero a pagilyan. Sarming daytoy ti nalawa a diskuntento ti masa a mangmangged ken umili iti sango ti panagtayok ti presyo ti taraon ken dagiti basaran a pagkasapulan ken serbisyo, nababa a sweldo ken nasaknap a kinaawan-panggedan. Minilyon ti maag-agawan ti daga ken pagbiagan ken ilugluges dagiti gangannaet a kapitalista, lokal a dadakkel a negosyo ken apo’t daga. Ngarud, ti welga dagiti mangmangged iti Nexperia ket mangmangted boses saan laeng kadagiti mangmangged ti Nexperia, nu di ket iti intero nga umili nga agsagsagaba iti sidong dagiti parigat ken maka-gangannaet a patakaran ti rehimen US-Marcos.

Ipampamatmat dagiti mangmangged iti Nexperia ti tured ken militansya iti dangadang. Panpaneknekan da a saanda nga agrukma iti sango ti panaglipit, pammutbuteng ken panagranggas ti kapitalista ken ti reaksyunaryo nga estado. Gapu ta iggem da ti kalintegan ken hustisya, saan da a nagpakigtot iti nadumaduma a pananglipit ken panagpangta ti kapitalista nga isuda ket mapadisi wenno makasuan. Mangad-adaw da ti pigsa ken tibker ti pakinakem iti tunggal maysa, iti panagkikinnapet da iti panagsango iti buklis a kapitalista.

Rumbeng laeng nga agpanawagan iti amin a mangmangged ken intero nga umili a tumakder ken suportaran ti welga dagiti mangmangged ti Nexperia. Panawen daytoy ti panagkaykaysa dagiti mangmangged, sadinno man ti pakaibilangan da a pederasyon wenno linya ti industriya. Nasken nga ipakaammo kadagiti mangmangged, karaman dagiti adda iti empresa kadagiti export processing zone, a ti dangadang dagiti mangmangged iti Nexperia ket dangadang da met. Ti dangadang para iti makabiag a sweldo, makatao a kundisyon iti trabaho ken karbengan iti panag-unyon ket kolektibo a laban ti amin a mangmangged a Pilipino, uray dagiti mangmangged iti nadumaduma a paset ti lubong.

Kasapulan met a mangted ti suporta iti welga dagiti mangmangged ti Nexperia ti nadumaduma a sektor. Rumbeng nga awiten dagiti isyu da iti kaadwan a kampus, komunidad, upisina ken simbaan, tapno alaen ti ti nalawa a suporta ti intero nga umili. Urnongen ti kalawaan a suporta a materyal ken moral para kadagiti mangmangged ti Nexperia. Ti balligi ti welga da ket sigurado nga agserbi nga inspirasyon tapno riingen dagiti mangmangged ken nadumaduma a dasig ken sektor a tumakder ken lumaban iti panangidadanes ken panaggundaway.

Bayat a padpadayawn tayo ti tured dagiti mangmangged ti Nexperia iti militante a panangiyabante kadagiti demokratiko a kadawatan ken interes da, rumbeng met a silawan tayo ti dana ti nalawlawa a dangadang laban iti amin a langa ti panangidadanes iti masa nga anakling-et ken intero nga umili. Ipakita tayo nu kasano a ti dangadang dagiti mangmangged ti Nexperia ket nakasilpo iti kabuklan a rebolusyonaryo a dangadang tapno gibusan ti bulok ken mangidadanes a sistema.