Iti okasyon ti maika-39 anibersaryo ti panagrukwas iti EDSA, nagpalagip ti National Democratic Front of the Philippines iti napapateg nga adal ken iti pagkasapulan a pagbalinen a naan-anay dagiti nagun-od daytoy babaen ti panangiyabante iti nailyan-demokratiko a rebolusyon ti umili.

Binigbig ni Elias Dipasupil, kabuklan a kalihim ti NDFP, ti naisangsangayan a papel ti panagrukwas iti EDSA iti pakasaritaan ti umili a Pilipino. Binukel daytoy ti panagkaykaysa ti nadumaduma a grupo, manipud iti sinsero agingga iti addaan bukod nga adyenda, tapno padisien ti maysa a diktador. Ti kinalawa ken nagdudumaan dagiti pwersa ti nangpalapad ken nangpapigsa ditoy, ngem daytoy met laeng ti makagapu nu apay a nagbalin a bulnerable ti nagtungpalan ti panagrukwas iti distorsyon ken kooptasyon.

Kalpasan ti umadani uppat a dekada, agtaltalinaed a nakalumlom iti kinarigat ti pagilyan, pagar-arian dagiti burukrata kapitalista ken dagiti amo da nga imperyalista. Nakasublin iti Malacañang ti pamilya a Marcos ken sipapangas nga agturturay. Daytoy napalabas a dua a tawen laeng, siyam a kaso kanaig iti tinakaw da a kinabaknang ti naibasura iti Sandiganbayan. Nanayunan metten ti naurnong da a pondo ti umili iti langa ti intelligence and confidential funds, unprogrammed funds, Maharlika Investment Fund ken adu pay a kapada a pagayusan ti korapsyon.

Nupay kasta, agtaltalinaed a napateg ti panagrukwas iti EDSA ken dagiti adal ditoy iti pananglaban iti tiranya. Ti panagrukwas ket napateg a palagip iti pagkasapulan ti naanep a panagriing ken panag-organisa. Saan a napadisi ti diktador iti tallo nga aldaw laeng idi 1986. Iti 14 tawen sakbay daytoy, naipundar iti kasyudadan dagiti limed nga organisasyon agingga a kinabaelan ti umili nga agisayangkat ti dumakdakkel a naparang a tignay tapno buraken ti terorista nga alyaw. Iti kaaw-awayan, insayangkat ti New People’s Army ti armado a dangadang tapno labanan ti nakaro a militarisasyon, kagiddan dagiti dangadang ti mannalon tapno iyabante ti dawdawaten da a pudno a reporma iti daga.

Kangrunaan ti amin, napateg nga adal ti pagkasapulan a kumpletuen ti kapadasan ti panagrukwas iti EDSA laban iti tiranya agingga a magun-od ti rebolusyonaryo a panagbalbaliw ken panangbukel ti maysa a pudno a demokratiko a gubyerno ti umili a tartarigagayan ti umili.

Panangisabiag iti anag ti EDSA

Idi Pebrero 25, iti mismo nga anibersaryo ti panagrukwas iti EDSA, naguummong ti 10,000 iti sakaanan ti Our Lady of EDSA shrine iti Mandaluyong City idiay Metro Manila. Ditoy nga ummong ket nagtitipon dagiti pwersa ti Tama Na Alliance, Bagong Alyansang Makabayan, One Taft Alliance, Duterte Panagutin Network, dagiti estudyante, mangmangged, tao’t simbaan ken adu pay.

Nagkaykaysa da tapno nainget nga ipadanon iti rehimen Marcos ti panawagan da laban iti korapsyon ken panaglablabes. Kasta met nga inpanawagan da ti madagdagus a panangpadisi ken Sara Duterte, ti bise-presidente ni Ferdinand Marcos Jr.

Naangay ti kapada a protesta kadagiti syudad ti Baguio, Tuguegarao, Naga, Bacolod, Iloilo, Roxas, Capiz, Cebu ken Davao a dinar-ayan dagiti kamkameng ti lokal nga organisasyon iti sidong ti Bayan ken progresibo a partido kas ti Bayan Muna ken Kabataan Partylist.

Nasurok 70 a pagadalan ti nagdeklara nga awan ti serrek tapno maikkan gundaway dagiti estudyante, manursuro ken dagiti akademiko a dumar-ay iti nadumaduma nga aktibidad iti pananglagip iti panagrukwas.

Idiay Metro Manila, ginasut nga estudyante ti nag-walk-out kadagiti klase da, karaman dagiti agad-adal ti Polytechnic University of the Philippines.

Nag-walk-out met dagiti estudyante ti UP-Los Baños ken Cavite State University, bayat naangay ti taripnong iti uneg ti Southern Luzon State University idiay Lucban, Quezon ken Bulacan State University. Idiay Visayas, napasamak ti walk-out idiay UP-Tacloban ken tignay iti University of Eastern Philippines idiay Catarman, Samar.

Idiay Mindanao, naangay ti taripnong iti uneg ti kampus ti Ateneo de Davao University, Ateneo de Zamboanga University ken Xavier University idiay Cagayan de Oro City.