Walk-out sa UP Baguio. Ginabana-bana nga kapin sa 1,200 ka mga estudyante, manunudlo kag empleyado sang University of the Philippines (UP)-Baguio ang nagpakigbahin sa ginhiwat nga walk-out sadtong Pebrero 26 para sa pagpasaka sang pondo sa edukasyon, transparency sa badyet, kag salabton sang administrasyon. Pinakadako ang demonstrasyon nga ini sa nakaligad nga pila ka tuig sa UP Baguio. Sa pagpanguna sang Alliance of Concerned Students (ACS), ginbatikos nila ang sayup nga paggamit sa pondo sang unibersidad nga nabuyagyag sadtong Disyembre 2024 sa Commission on Audit 2023 Annual Audit Report.

Saut-protesta sang kababaehan. Kapin sa 1,000 ka kababaehan nga mamumugon sang Southern Tagalog ang nagtipon sa Laguna agud ilunsar ang saot-protesta nga bahin sang kahublagan One Billion Rising sadtong Marso 2. Ginpangunahan sang Women Workers United ang aktibidad nga nagapanawagan para sa pagtapos sang kalakasan sa lugar sang trabahuan, pagpasaka sang sweldo sa makabuhi nga lebel, regular kag desente nga trabaho, akses sa pangpubliko nga serbisyo kag kinamatarung sang mga mamumugon nga mag-unyon.

30 ka tuig sang Pilippine Mining Act. Nagprotesta sa tiilan sang Mendiola sa Manila ang mga grupo nga maki-kapalibutan sa idalum sang Kalikasan PNE kag iban pa nga mga progresibo nga grupo agud ipanawagan ang pagbasura sang Philippine Mining Act of 1995 sa ika-30 ka tuig sini sadtong Marso 3. Dala sang mga nagprotesta ang isa ka mapa sang Pilipinas nga nagapakita kon diin ang pinakadalagko nga minahan sa pungsod kag ang mga dinastiya sa pulitika nga nagapanag-iya sang mga ini.

Aton ang 15-kilometro. Naghugpong ang masobra sa 100 ka mangingisda, akademiko, mga estudyante kag tawong simbahan sang Iloilo sa pagtukod sang alyansa Aton ang Kinse Kilometro sadtong Marso 3 agud pangapinan ang kinamatarung sang magagmay nga mangingisda sa 15-kilometro nga municipal water. Nagtambong kag nakigbahin sa pagtipon ang mga katapo sang Pamalakaya halin sa Panay.