Sa okasyon sa ika-39 anibersaryo sa panag-alsang EDSA, nagpahinumdum ang National Democratic Front of the Philippines sa mahinungdanong leksyon niini ug sa panginahanglang iabante ang mga nakab-ot niini pinaagi sa pagpaasdang sa nasudnon-demokratikong rebolusyon.

Giila ni Elias Dipasupil, kinatibuk-ang kalihim sa NDFP, ang talagsaong papel sa panag-alsang EDSA sa kasaysayan sa katawhang Pilipino. Gihiusa niini ang lain-laing grupo, gikan sa sinsero hangtud sa may kaugalingong adyenda, aron palagputon ang usa ka diktador. Ang malukpanon ug malangkubong mga pwersa ang naghatag dinhi og lapad ug kusog, mao usab ang hinungdan kung nganong nahimong bulnerable ang resulta sa panag-alsa sa distorsyon ug kooptasyon.

Human ang halos upat ka dekada, nagpabiling lubog sa kalisud ang nasud, giharian sa mga burukratang kapitalista ug ilang imperyalistang amo. Nakabalik na sa Malacañang ang pamilyang Marcos ug nagpatigbabaw sa gahum. Niining milabayng duha ka tuig lamang, siyam ka kaso kalabot sa kinawat nilang bahandi ang napabasura sa Sandiganbayan. Nadugangan na usab ang ilang nahakop gikan sa pondo sa katawhan sa porma sa intelligence and confidential funds, unprogrammed funds, Maharlika Investment Fund ug daghan pang susamang daluyan sa korapsyon.

Ingonman, nagpabiling mahinungdanon ang panag-alsang EDSA ug mga leksyon niini sa pagbatok sa tiranya. Importanteng pahinumdum ang panag-alsa sa panginahanglan sa makugihon ug pursigidong pagpukaw ug pag-organisa. Wala napalagpot ang diktador sa tulo ka adlaw lamang niadtong 1986. Sa 14 ka tuig ayha niini, gipundar sa kasyudaran ang mga tago nga organisasyon hangtud nakaya sa katawhan nga maglunsad og labing dakung dayag nga protesta aron bungkagon ang teroristang kabangis. Sa kabanikanhan, gilunsad sa Bagong Hukbong Bayan ang armadong pagsukol aron suklan ang grabeng militarisasyon, inubanan sa mga pakigbisog sa mag-uuma aron iasdang ang ilang ginapangayong tinuod nga reporma sa yuta.

Labaw sa tanan, mahinungdanong pagtulun-an ang panginahanglang iabante ang kasinatian sa panag-alsang EDSA batok sa tiranya hangtud makab-ot ang rebolusyonaryong kausaban ug pagtukod sa usa ka tinuod nga demokratikong gubyerno sa katawhan nga gipangandoy sa katawhan.

Pagpraktika sa diwa sa EDSA

Niadtong Pebrero 25, sa mismong anibersaryo sa panag-alsang EDSA, nagtapok ang 10,000 sa tiilan sa Our Lady of EDSA shrine sa Mandaluyong City sa Metro Manila. Nagtapok ang pwersa sa Tama Na Alliance, Bagong Alyansang Makabayan, One Taft Alliance, Duterte Panagutin Network, estudyante, mamumuo, tawong simbahan ug daghan pang uban.

Nagkahiusa sila aron hugot nga ipaabot sa rehimeng Marcos ang ilang panawagan batok sa korapsyon ug impunidad. Ingonman, gipanawagan nila ang hinanaling pagpalagpot kang Sara Duterte, ang bise-presidente ni Ferdinand Marcos Jr.

Adunay susamang mga protesta sa syudad sa Baguio, Tuguegarao, Naga, Bacolod, Iloilo, Roxas, Capiz, Cebu ug Davao nga gisalmutan sa mga myembro sa lokal nga organisasyon ilalum sa Bayan ug progresibong partido sama sa Bayan Muna ug Kabataan Partylist.

Kapin 70 ka eskwelahan ang nagdeklara og walay klase aron hatagag higayon ang mga estudyante, magtutudlo ug mga akademiko nga mosalmot sa lain-laing aktibidad sa pagdumdum sa panag-alsa.

Sa Metro Manila, gatusan ka estudyante ang nag-walk-out sa ilang mga klase, lakip ang mga estudyante sa Polytechnic University of the Philippines.

Nag-walk-out usab ang mga estudyante sa UP-Los Baños ug Cavite State University, samtang adunay panagtapok sulod sa Southern Luzon State University sa Lucban, Quezon ug Bulacan State University. Sa Visayas, adunay walk-out sa UP-Tacloban ug naglunsad og protesta sa University of Eastern Philippines sa Catarman, Samar.

Sa Mindanao, adunay panagtapok sulod sa kampus sa Ateneo de Davao University, Ateneo de Zamboanga University ug Xavier University sa Cagayan de Oro City.