Gipusil patay sa mga tropa sa 82nd IB sa Barangay Minan, Tapaz, Capiz niadtong Pebrero 26 ang mag-uumang si Peter Agudes, naila usab nga “Tito.” Duha pa niyang kaubanan ang nasamdan. Ginapagawas sa Armed Forces of the Philippines (AFP) nga napatay si Agudes sa armadong engkwentro tali sa mga sundalo ug sa Bagong Hukbong Bayan (BHB).

Hugot nga gipanghimakak ni Perla Agudes, asawa sa biktima, nga mga Pulang manggugubat ang tulo. Hustisya ug patas nga imbestigasyon ang panawagan sa pamilya. Nagpuyo ang pamilyang Agudes sa Sityo Taroytoy, Barangay Manica, Libacao, Aklan. Nailo ni Peter ang iyang tulo ka anak nga edad 10, 13 ug 16 anyos.

Masaker. Walang kaluoy nga gimasaker sa mga sundalo sa 26th IB ang magtiayong Toto ug Toni Gomansil ug ilang anak nga si Celine Gomansil sa Dayuman River, Barangay San Vicente, Esperanza, Agusan Del Sur niadtong Disyembre 15, 2024. Pipila ka bulan human ang makalilisang nga krimen, wala pa gihapoy hustisya ug napanubag sa masaker.

Ayha ang krimen, nananghid pa ang pamilya Gomansil sa mga sundalong nakadeploy sa duul nga detatsment aron magtrabaho sa ilang umahan. Bisan og nananghid na, gisundan pa gihapon sila sa mga sundalo ug gigapos ang magtiayong Toto ug Toni. Gipailalum sila sa grabeng interogasyon ayha giluba ug gipatay. Si Celine, gipusil usab sa mga sundalo dihang misulay siya pag-ikyas. Giakusahan silang nakigkontak sa BHB ug rebolusyonaryong kalihukan sa prubinsya.

Terorismo sa kahanginan. Troma ug kahadlok ang dala sa istraping sa mga helikopter sa militar sa mga barangay sa La Paz, Agusan del Sur ug Cabanglasan, Bukidnon niadtong Marso 4. Sa rason nga suporta kini sa pag-atake sa AFP batok sa hukbong bayan, paturagas nga namusil ang mga helikopter nga nakaapekto sa mga sibilyan. Nagpadala usab ang mga sundalo og FA50 fighter jets nga adunay kargang 250-lb o 500-lb nga mga bomba nga gamiton unta apan napaatras dihang nawala ang usa sa tulo ka jet fighter.