Nagtapok bag-o lang ang mga myembro sa Compatriots aron ipahigayon ang makasaysayanong kumperensya sa kalihukan sa migranteng Pilipino. Girepresentahan sa rebolusyonaryong organisasyong Compatriots ang espesyal nga sektor sa mga migranteng Pilipino sa National Democratic Front of the Philippines.

Sa gambalay sa kalihukang pagtul-id, gipalig-on sa Compatriots ang tahas niining organisahon ug palihukon ang mga migranteng Pilipino alang sa nasudnon-demokratikong rebolusyon, asamang dapit sila sa kalibutan. Mikabat sa 15 milyon ang migranteng Pilipino, lakip ang minilyong temporaryong mamumuo sa ubos nga klase sa mga trabaho. Gikan 2023, mikabat sa halos 10,000 ka Pilipino ang adlaw-adlaw nga nagaabrod tungod sa kanihit sa lokal nga trabaho, kawad-on o walay igong kita ug labing ubos nga suhulan, pagpangilog og yuta ug panginabuhian. Pinaagi sa palisiya sa pag-eksport sa pamuo, gisakripisyo sila sa reaksyunaryong estado aron pahupayon ang krisis sa empleyo sa nasud. Ginahuthutan sila og milyun-milyon sa porma sa mga singil sa batakang serbisyo nga wala nila natagamtam.

Sa langyawng mga nasud, giantus nila ang pagpangabuso, paglapas sa ilang mga katungod sa pamuo, rasismo o diskriminasyon sa kaliwat, kabangis ug taas kaayong gasto sa migrasyon. Wala silay mga proteksyon, ilabina ang kababayen-ang mamumuo nga anaa sa mga trabahong pinakabulnerable sa abuso ug krimen.

Gitun-an sa Compatriots ang pagsumada sa kapin upat ka dekadang rebolusyonaryong gimbuhaton sa han-ay sa mga migrante ug mikutlo og mga pagtulun-an sa abundang kasinatian gikan dinhi. Gibalik-tun-an niini ang mga leksyon sa una ug ikaduhang bantugang kalihukang pagtul-id aron ipwesto ang panawagan sa kasamtangang kalihukang pagtul-id batok sa suhetibismo, konserbatismo, ultrademokrasya ug burukratismo.

Gitun-an usab sa kumperensya ang mga katilingbanon ug makihut-ong nga pagtuki (SICA o social investigation and class analysis) sa giandam sa mga komite niini sa lain-laing nasud ug kontinente. Gamit kini, natubag ug natin-aw sa Compatriots ang hinanaling mga pangutana mahitungod sa sektor ug natakda ang mga palisiya sa pagpalapad ug pag-organisa.

Aron iasdang ang interes sa mga migranteng Pilipino, gihatagag duut sa Compatriots ang panginahanglang tukuron ang mga organisasyon sa ilang han-ay aron iasdang ang ilang mga demokratikong katungod, lakip ang katungod sa trabaho ug mga katilingbanong proteksyon sa mga nasud nga gitrabahuan. Gisiguro usab niini ang pag-organisa sa tago nga mga organisasyong masa nga magsilbing kaabag sa Partido sa pagpangulo sa kalihukang migrante, pagpakusog sa kalihukan sa migranteng mamumuong Pilipino ug lapad nga multisektoral nga patriyotikong kalihukang masa sa mga Pilipino sa lain-laing nasud. Ginalantaw sa Compatriots nga sa pagkusog sa maong mga kalihukan, modaku pa ang matampo niini sa anti-imperyalistang pakig-inigsuunay, ingonman sa pagpaasdang sa internasyunal nga proletaryadong rebolusyon.

Hugot nga nakasumpay sa kahimtang sa mga migrante ang isyung giatubang sa katawhan sa Pilipinas, sama sa ubos nga suhulan sa mga mamumuo ug kawalay yuta, kadunot sa mga burukrata-kapitalistang naghari sa estado ug pagdomina sa imperyalismong US sa katilingbang Pilipino. Kung papilion, mas gustuhon nilang magpabilin sa nasud uban ang ilang mga mahal sa kinabuhi. Samtang anaa sa ubang nasud, pinakapangandoy nilang makauli sa yutang natawhan.

Isip mga Pilipino, ginaila ang mga migrante isip kabahin sa nasudnong kalihukang malingkawasnon. Ang solusyon sa ilang migrasyon mao ang pagpasdang sa nasudnon demokratikong rebolusyon. Hagit sa Compatriots ang pagpakusog sa kalihukan batok sa mapahimuslanon ug madaugdaugong papet nga reakyunaryong estado sa Pilipinas ug pagpalapad sa suporta sa malungtarong gubat sa katawhan taliwala sa nagkagrabeng pasismo sa kalibutan.

Ginalantaw sa Partido ug sa katawhang Pilipino ang dinaghang pag-uli sa mga migrante aron mosalmot sa rebolusyonaryong kalihukan sa Pilipinas, ilabina sa natad sa armadong pakigbisog, alang sa pagpanday sa katilingbang tinuod nga kawasnon, demokratiko ug mauswagon.