Sa pagsaulog sa Kalibutanong Adlaw sa Kababayen-an sa Marso 8, pagapasidunggan sa Partido ang tanang kababayen-ang mibarog sa ilang lugar sa rebolusyon. Sila ang mga babayeng rebolusyonaryo, kadre, mga Pulang kumander ug manggugubat, nga mibaktas sa malisud nga dalan sa pagsukol, milihok ug nangulo, daghan kanila migunit og armas, aron kab-oton ang dungganong pangandoy alang sa paglingkawas sa kababayen-an ug tibuok katawhan.

Sila ang mga wala miyukbo o misurender sa tunga-tunga sa grabeng panagsangka, puno sa diwang rebolusyonaryo hangtud sa ulahing ginhawa. Sila ang mga rebolusyonaryong bituon nga mosidlak sa kahangturan.

Pinakataas nga pasidungog ang ginahatag sa Partido sa mga kababayen-ang nangulo sa Partido, sa hukbong bayan ug rebolusyonaryong kalihukang. Giparangalan sa Partido ang mga kababayen-ang nahimong kagawad sa Komite Sentral nga silang Ka Maria Malaya (Myrna Sularte), kalihim sa Rehiyunal nga Komite sa Partido sa Northeast Mindanao ug Komisyon sa Mindanao; Ka Bagong-Tao (Wilma Tiamzon), kinatibuk-ang kalihim sa Partido; Ka Fiel (Eugenia Magpantay), kinatibuk-ang kalihim sa Partido; Ka Elay (Helenita Parladis), kalihim sa Rehiyunal nga Komite sa Eastern Visayas; Ka Lalay (Aprecia Alvarez Rosete), kalihim sa Rehiyunal nga Komite sa Western Mindanao; Ka Sandy (Josephine Mendoza), ikaduhang kalihim sa Rehiyunal nga Komite sa Southern Tagalog; ug Ka Kaye (Sandra Reyes), kagawad sa Komisyon sa Mindanao.

Dili usab malimtan si Ka Concha Araneta Bocala, tigpamaba sa National Democratic Front-Panay ug gatusan pang kababayen-ang nagsilbing mga kalihim, giya sa pulitika, kumander, manggugubat, duktor ug nars sa masa, organisador, propagandista, taguyod, magtutudlo ug tigbansay, tigpataas sa moral ug tigtambag, ug uban pa.

Saulugon nato ang daku kaayong tampo sa kababayen-an sa rebolusyong Pilipino. Hatagan natog bili ang ilang gitampong kahibalo, kalagsik ug militansya nga nagpalambo ug nagpalig-on sa pakigbisog sa katawhan. Sa natad sa pakigbisog alang sa bayan ug para sa kababayen-an, nabatunan nila ang ilang hingpit nga potensyal isip tawo ug kapareha sa kalalakin-an. Gisuklan nila ang kulturang patriyarkal nga nag-ila kanilang huyang o mas ubos, ug gipakita ang puthaw ng baruganan.

Ang mga babayeng rebolusyonaryo paglaum alang sa minilyong kababayen-ang nag-antus sa katilingbang nagaila kanilang mas ubos ug mas huyang. Ehemplo sila para sa mga babayeng nagasweldo og mas ubos ug gilaay sa balik-balik nga trabaho; grabe ang kugi sa uma pero wala giila isip produktibo; mga walay yuta ug ginapalayas sa ilang yutang kabilin; nahikot sa gimbuhaton sa balay ug pag-atiman sa bana ug anak apan limitado kung aduna may tingog sulod sa kaugalingong panimalay; sa mga dili makalingkawas sa mga abusadong relasyon tungod sa kahadlok ug kawalay gahum sa ekonomiya; sa mga napugos nga mag-abrod aron may maipakaon sa pamilya; sa mga nakasinati og diskriminasyon sa kasarian; ug sa mga biktima sa sekswal nga pagpang-abuso ug pagpanglapas.

Ilhon nato ang ilang talagsaong kontribusyon isip mga inahan ug asawa sa pagmugna og mga rebolusyonaryong pamilya ug relasyon, sa pagpukaw ug militanteng pagpasiugda sa mga palisiya alang sa proteksyon sa kababayen-an, bata ug LGBT batok sa pagpahimulos ug pagpangdaugdaug. Ilhon nato ang ilang papel sa pagpataas sa kahimatngon sa kalalakin-an ug katawhan kalabot sa mga hisgutanang kababayen-an, pagpasiugda sa patas nga pagtagad sa kasarian, ug paghimo og lig-ong sistemang suporta alang sa mga kaparehong babaye.

Atong hatagag bili ang ilang mga sakripisyo, ang pagtalikod sa kumportableng kinabuhi ug pangandoy sa kaugalingon, ang pag-agwanta sa daghang kalisdanan sa gubat, ug ilabina ang dugay nga pagkabulag sa kaugalingong mga anak. Taliwala niini, ang ilang mga kinabuhi sa pakigbisog puno sa kalipay ug kalagsik. Dili mahurot ang mga estoryang maligdong, kataw-anan ug makahilak nga kasinatian sa mga babayeng nakigbisog. Sama sa talagsaong mga bulak sa lasang, sila labing gihigugma ug giamuma sa masa ug mga kauban.

Atubangan sa nagkagrabeng kalisud ug pag-antus sa minilyong pamilya sa krisis sa ekonomiya tungod sa korapsyon sa rehimeng Marcos ug mga palisiya ug programang kontra-kabus ug pabor sa langyawng kapitalista, padayon nga nahigmata ang kababayen-an uban ang tibuok katawhan, sa panginahanglang mobarog ug mosukol.

Lakip ang mga babaye sa nag-unang han-ay sa mga mamumuo nga nanglimbasog sa pagtukod sa ilang mga unyon ug lain-laing organisasyon. Lakip sila sa mga nanguna sa pagduso sa mga reklamo ug pangayo alang sa dugang suhulan, katungod sa regular nga trabaho ug mas makitawhanong kundisyon sa pamuo. Lakip sila sa maisugong mibarog sa pag-atubang sa hakog nga kapitalista, sa iyang mga armadong maton ug pasistang ahente sa estado.

Anaa sila sa unahang han-ay sa masang kabus nga misukol sa walay hunong nga pagtaas sa presyo sa bugas, pagkaon, lana, sugnod, tambal, pamasahe ug lain-laing serbisyo. Sila ang mga nanay ug anak nga nakighiusa sa ilang mga silingan aron batukan si Marcos ug mga pulitiko sa pag-usik-usik sa kwarta sa katawhan sa ilang maluho nga kinabuhi ug makmakon ang walay katapusang pagpangutang sa gubyerno aron pondohan ang korapsyon. Sa mga kampus, lakip ang kababayen-ang kabatan-onan sa nagmartsa sa unahan sa pagbatok sa walay hunong nga pagsaka sa matrikula ug galastuhon sa pagtuon, ingonman sa pagbatok sa pagpakaitoy ni Marcos sa US ug pagguyod sa nasud sa imperyalistang gubat.

Sa kabanikanhan, lakip ang kababayen-an sa masang nag-organisa ug nagalihok batok sa rehimeng Marcos ug sa palisiya niini sa todong liberalisasyon nga nagapatay sa panginabuhian sa minilyong mag-uuma. Uban sila sa kolektibong nagasinggit alang sa tinuod nga reporma sa yuta, ug hinanaling mga pangayo aron paubsan ang abang sa yuta, interes sa pautang sa mga hakog nga usurero ug bangko ug presyo sa mga himang pang-uma. Sa liboan ka barangay nga ginakontrol sa militar, maisugon nilang gisuklan ang pagpangabuso ug kabangis sa mga pasistang sundalo, ilabin batok sa kababayen-an ug mga bata.

Lakip ang kababayen-an sa nag-unang han-ay sa mga kabatan-onang bag-ong mga Pulang manggugubat sa BHB. Sama sa nag-unang mga salinlahi sa kababayen-ang manggugubat, gipakita nila karon ang walang katapusang kaisog sa pag-atubang sa kaaway, ug walang katapusang pagmahal ug pag-amuma sa masang kaabag nila sa tinguha alang sa gawasnon ug masanag nga kaugmaon.