Tungod kay pakyawan sa plantasyon sa kape, nagtinabangay sa pag-ani sa kape ang pamilyang Lupao. Kinahanglang paspas nga mahuman ni Lydia, sa iyang bana ug tulo nila ka anak ang 7 ka ektaryang kapehan. Giatubang ni Lydia ang hulgang matangtang siya sa listahan sa 4Ps kung dili niya ipatungha balik ang mga anak nga kaabag nila sa panginabuhi.

Gipa-aplay balik si Tess sa iyang kampanyang ginasudlan sa halos duha ka tuig isip mananahi. Kini ang tubag sa manedyer kaniya human siya nangayo og maternity leave sa mosunod na bulan. Grabe ang iyang kabalaka nga mawad-ag trabaho ilabina nga siya ra ang magbuhi sa iyang anak.

Nasunugan silang Rosario, inahan sa 6-anyos ug 1-ka-tuig nga bata. Ang suspetsa sa mga myembro sa ilang kahugpungan, gituyo ang sunog aron palayason sila sa komunidad. Nabuhi lamang ang iyang pamilya sa mumho nga kita sa iyang bana nga drayber sa pedikab. Nakasilong sila sa evacuation center nga gakabahaan kung adunay bagyo.

Usa ka masahista si Kris, usa ka transgender, sa usa ka gamay nga spa. Sa makaluya niyang trabaho, wala sa minimum nga suhol ang suma tutal sa kumisyong ginahatag sa iyang amo. Iya ang balayrunon sa SSS ug PhilHealth. Walay ginahatag nga proteksyon kaniya bisan og pipila ka beses na siyang nabalaka sa mga kliyenteng gapangayo og “espesyal nga serbisyo.”

Kini ang lain-laing porma sa kababayen-ang Pilipino. Dili malimud ang gigrabehon sa giantus nilang kalisud ug sakripisyo. Kayod kalabaw nilang ginabuhi ang ilang mga pamilya apan mayorya kanila ang ginaila nga “dili produktibo.” Kapin tunga sa kababayen-an ang wala ginalakip sa “pwersa sa pamuo.” Adunay mga balaod ug programang pangkababayen-an nga nindot paminawon apan tinuyong walay ngipon ug walay pulos atubangan sa malukpanong pagpangabuso nga nasinati sa mga kababayen-an.

Sa tibuok kalibutan, nakasinati ang kababayen-an sa dobleng pagpangdaugdaug atubangan sa malukpanong disempleyo ug ubos nga suhulan. Mas daghan ang mga babayeng walay panginabuhian. Nagadawat sila og mas ubos nga suhol kumpara sa mga lalaking mamumuo. Mas makadaut ang epekto kanila sa delubyo sa climate change ug mga gubat. Nagkagrabe ang nasinati nilang kabangis sa human trafficking, pornograpiya, prostitusyon, pagbaligya sa bata, lakip ang nagaagi sa social media ug uban pa.

Ang nahiagumang pagpanglupig sa kababayen-an mas grabe ilalum sa semikolonyal ug semipyudal nga sistema. Nakapatong sa pundamental nga problema sa imperyalismo, pyudalismo ug burukrata-kapitalismo, dugang nagpaantus sa kababayen-ang Pilipino ang lain-laing porma sa pyudal ug burges nga patriyarkal nga sistema.

Atubangan sa nagliyuliyo nga krisis sa ekonomiya, pulitika ug kultura, asa dapat ang kababayen-an? Sa tunga ug unahan sa pag-asdang sa rebolusyong tinuod nga mousab sa ilang mapahimuslanon ug madaugdaugong kahimtang. Kini ang gipamatud-an sa pipila ka dekadang praktika sa rebolusyonaryong kalihukan sa kababayen-an sa Pilipinas sa pagpanguna sa Makabayang Kilusan ng Bagong Kababaihan (Makibaka) nga gigiyahan sa Partido Komunista ng Pilipinas. Gipakita sa Makibaka nga lakip sa han-ay sa rebolusyon ang kababayen-an, lakip na ang mga LGBTQ, ug bisan ang mga bata.

Sa kabanikanhan, ang mga organo sa pulitikanhong gahum ginatukod nga hugot nga kaabag ang kababayen-an pinaagi sa mga lokal nga balangay sa Makibaka. Dili kaminusan ang pag-abante sa papel sa kababayen-ang mag-uuma sa pulitika, bitbit ang mga ekomikanhong ganansya sa mga hunglos, kahugpungan ug mga kooperatiba. Bisan sa kulturanhong aspeto, ginapakaylap niini ang demokratisasyon sulod sa pamilya, pangmasang pagtambal ug pagpalihok sa mga bata alang sa alternatibong kultura ug edukasyon.

Sa kasyudaran, gipasiugdahan sa MAKIBAKA ang pagduso sa mga demokratikong pangayo, kaayuhan ug katungod sa kababayen-an, bata ug LGBTQ sa kalihukang masa. Determinadong ginabutyag ug ginasuklan ang kadunot, kainutil ug pasismo sa nagharing sistema tungod sa makugihong pagtampo sa kalihukang kababayen-an sa mga pabrika, eskwelahan, komunidad, upisina, simbahan ug kung asa pang lugar anaa ang kababayen-an. Gitampo nila ang ilang tingog sa singgit sa katawhan alang sa nasudnong kagawasan gikan sa langyawng paghari ug pagpanglupig.

Laraw sa imperyalismong US nga pugngan ang pagsalmot sa kababayen-an sa rebolusyon ug sapawan ang diwang masukulon sa kalihukang kababayen-an. Gamit ang USAID, World Bank, Asian Development Bank, United Nations ug uban pang instrumento, gipauso ug ginaduso ang mga programang nagagamit og mga mabulakong pulong sama sa “inclusion,” “safe spaces,” ug “peace zones alang sa mga bata.” Laraw sa maong mga “adbokasiya” nga palubugon ang hisgutanan sa nasudnong pagpangdaugdaug ug maki-hut-ong nga pagpahimulos isip ugat sa nasinating pagpangdaugdaug sa mga kababayen-an, ilayo sila sa rebolusyonaryong dalan sa kausaban ug dad-on sila sa dalan sa repormismo, ligalismo ug NGOismo.

Atubangan niini, kinahanglang mas ipakita sa lapad nga masa sa kababayen-an nga ang ilang paglingkawas gikan sa lain-laing porma sa pagpangdaugdaug makab-ot lamang sa natad sa armadong pakigbisog. Sa milabayng pipila ka dekada, gibaktas sa kababayen-ang Pilipino ang dalan sa armadong rebolusyon, ug mitampo og kahibalo ug kinabuhi isip mga Pulang manggugubat ug kumander sa Bagong Hukbong Bayan ug mga lider ug kadre sa Partido.

Sama nilang Lydia, Tess, Rosario ug Kris, nagpaabot ang lapad nga han-ay sa kababayen-an nga angkunon ang ilang lugar sa rebolusyon. Labing kritikal karon sa kababayen-an, ilabina sa kababayen-ang anakpawis, ang magpursige sa pagpukaw, pag-organisa ug pakigbisog. Kinahanglang hugot nga huptan ang mga prinsipyo sa rebolusyonaryong kalihukang kababayen-an ug ikawaykaway ang bandera sa nasudnon-demokratikong kalihukan.