Niadtong Marso 5, dungan-dungan nga mihunong sa pagtrabaho ang kapin 1,300 ka mamumuo sa Nexperia Philippines Inc ug gideklara ang welga sa pabrika niini sa Light Industry Science Park 1 sa Cabuyao, Laguna. Tumong nilang kolektibong iasdang ang ilang pakigbisog alang sa umento sa suhulan, pagpabalik sa gitangtang nga mga mamumuo, ug batok sa pagbungkag sa ilang unyon.

Pipila ka tuig nang ginaantus sa mga mamumuo sa Nexperia ang kapitalistang pagyatak sa ilang kaayuhan ug pagbalewala sa ilang mga reklamo. Nagpabungol-bungol ang maneydsment sa kumpanya sa ilang mga pangayo alang sa makabuhi nga suhulan, batok sa pagsisante ug pag-atake sa ilang katungod sa pag-unyon. Pabor sa interes sa kapitalista, nagpagula og “assumption of jurisdiction” ang Department of Labor and Employment (DOLE) aron pahunungon ang unsamang planong welga aron kuno kini ang “magpatunga.”

Hinunua, gitanyag sa kapitalista ang insultong umentong ₱17 kada adlaw dungan ang sunud-sunod na pagpanangtang sa gatusan ka mamumuo sukad pa niadtong 2023. Aron maghakop og nagkadakung tubo, gipadoble-kayod ang mga mamumuo sa pagtrabaho. Niadtong 2024, naabot sa kumpanya ang produksyon sa siyam ka bilyong electronic chips nga ginagamit sa produksyon sa mga sakyanan, mga gamit pangkomunikasyon ug uban pa. Nahimo kini sa pagpwersa sa mga mamumuo nga mogunit og hangtud upat ka makina kada usa, nga plano pang ipataas sa siyam ka makina sa umalabot nga mga panahon.

Dili malimud ang makasaysayanong bili sa welga sa Nexperia. Usa kini sa pinakadakung welga sa milabayng pila ka tuig sa usa ka kumpanya nga gipanag-iyahan sa langyaw. Kini nga welga direktang paghagit sa palisiyang “no strike” nga hugot nga ginapatuman sa mga export processing zone. Ginapakita sa kaarisgado sa mga mamumuo sa Nexperia nga buhi ang diwa sa pagsukol sa mga mamumuong Pilipino. Gipahinumdum niini sa tanang mamumuo ang kamahinungdanon sa panaghiusa ug determinasyong mosukol aron panalipdan ang ilang kaayuhan ug maki-hut-ong nga dignidad.

Miulbo ang welga sa mga mamumuo sa Nexperia taliwala sa nagkagrabeng sosyo-ekonomikong krisis nga migun-ob sa tibuok nasud. Salamin kini sa lapad nga diskuntento sa masang mamumuo ug katawhan atubangan sa pagsaka sa presyo sa pagkaon ug mga batakang panginahanglan ug serbisyo, ubos nga suhulan ug lapad nga kawad-on sa trabaho. Minilyon ang giilugan og yuta ug sa ilang panginabuhian, ug ginaligsan sa mga langyawng kapitalista, lokal nga dagkung negosyo ug agalong yutaan. Ang welga sa mga mamumuo sa Nexperia, sa tiunuod, naghatag tingog dili lamang sa mga mamumuo dinhi, kundili sa tibuok katawhang nag-antus ilalum sa mga palisiyang paantus ug makilangyaw sa rehimeng US-Marcos.

Gipakita sa mga mamumuo sa Nexperia ang kaisog ug militansya sa pakigbisog. Gipamatud-an nila nga dili sila moyukbo atubangan sa pagpamig-ot, pagpanghadlok ug pagpanghasi sa kapitalista ug sa reaksyunaryong estado. Tungod gunit nila ang rason ug kamatarung, wala sila nahadlok sa klase-klaseng pagpamig-ot ug pagpanghulga sa kapitalista nga sila pagatangtangon o kasuhan. Nagakuha sila og kusog ug kadasig sa matag usa, sa ilang kapit-bisig nga pag-atubang sa kapitalistang hakog.

Angayan lamang nga manawagan sa tanang mamumuo ug tibuok katawhan nga mobarog ug suportahan ang welga sa mga mamumuo sa Nexperia. Panahon kini sa panaghiusa sa mga mamumuo, asamang gilangkubang pederasyon o linya sa industriya. Kinahanglang ipabati sa mga mamumuo, lakip ang mga anaa sa empresa sa mga export processing zone, nga ang pakigbisog sa mga mamumuo sa Nexperia pakigbisog usab nila. Ang pakigbisog alang sa makabuhi nga suhulan, makitawhanong kundisyon sa pabrika ug katungod sa pag-unyon usa ka kolektibong pagsukol sa tanang mamumuong Pilipino, bisan sa mga mamumuo sa lain-laing bahin sa kalibutan.

Kinahanglang maghatag usab og suporta sa welga sa mga mamumuo sa Nexperia ang lain-laing demokratikong sektor. Kinahanglang dalhon ang ilang mga isyu sa pinakadaghang kampus, komunidad, upisina ug simbahan, aron kuhaon ang lapad nga suporta sa tibuok katawhan. Tapukon ang pinakalapad nga suportang materyal ug moral alang sa mga mamumuo sa Nexperia. Ang kadaugan sa ilang welga seguradong magsilbing inspirasyon aron pukawon ang mga mamumuo ug lain-laing hut-ong ug sektor nga mibarog ug misukol sa pagpangdaugdaug ug pagpahimulos.

Samtang atong gipasidunggan ang kaisog sa mga mamumuo sa Nexperia sa militanteng pag-asdang sa ilang mga demokratikong pangayo ug interes, kinahanglang usab natong iwagan ang dalan sa mas lapad nga pakigbisog batok sa tanang porma sa pagpangdaugdaug sa masang anakpawis ug tibuok katawhan. Ipakita nato kung paunsa nakasumpay ang pakigbisog sa mga mamumuo ng Nexperia sa kinatibuk-ang rebolusyonaryong pakigbisog aron tapuson ang dunot ug madaugdaugong sistema.