Sa okasyon sang ika-39 nga anibersaryo sang pag-alsang EDSA nagapahandumdum ang National Democratic Front of the Philippines sa mga malahalon nga leksyon sini kag sa kakinahanglanon nga luboson ang mga naagum sini paagi sa pagsulong sang pungsodnon-demokratikong rebolusyon.

Ginkilala ni Elias Dipasupil, heneral nga sekretaryo sang NDFP, ang pinasahi nga papel sang pag-alsang EDSA sa kasaysayan sang pumuluyong Pilipino. Ginbug-os sini ang paghiliusa sang lain-lain nga grupo, halin sa sinsero tubtob sa may kaugalingon nga adyenda, agud pukanon ang isa ka diktador. Ang kasangkad kag pagkatuhay-tuhay sang mga pwersa ang naghatag diri sang kalaparon kag kusog, apang ini man ang kabangdanan kon nga-a nangin bulnerable ang nalab-utan sang pag-alsa sa distorsyon kag kooptasyon.

Pagkatapos sang halos apat ka dekada, nagpabilin nga lubong sa kapigaduhon ang pungsod, ginaharian sang mga burukrata kapitalista kag ila imperyalismong amo. Nakabalik na sa Malacañang ang pamilya Marcos kag nagpamayagpag sa gahum. Sining nagligad nga duha ka tuig lang, siyam ka kaso kaangot sa kinawat nila nga manggad ang napabasura sa Sandiganbayan. Nadugangan man ang ila nahukagom nga pondo sang pumuluyo sa dagway sang intelligence and confidential funds, unprogrammed funds, Maharlika Investment Fund kag madamo pa nga kasubong nga alagyan sang korapsyon.

Apang, nagapabilin nga malahalon ang pag-alsang EDSA kag mga leksyon sini sa pagpakig-away sa tiraniya. Malahalon nga pahanumdum ang pag-alsa sa kinahanglanon sang mapagsik kag maukod nga pagpamuklat kag pag-organisa. Wala napalayas ang diktador sa tatlo ka adlaw lang sadtong 1986. Sa 14 ka tuig antes sini, ginpundar sa kasyudaran ang mga likom nga organisasyon tubtob masarangan na sang pumuluyo nga maglunsar sang nagadako nga hayag nga hublag agud wasakon ang teroristang kakugmat. Sa kaumhan, ginlunsar sang Bagong Hukbong Bayan ang armado nga pakig-away agud pakig-awayan ang masingki nga militarisasyon, kabulig ang mga paghimakas mangunguma agud isulong ang ila ginademanda nga matuod nga reporma sa duta.

Labaw sa tanan, malahalon nga leksyon ang kakinahanglanon nga lubuson ang inagihan sang pag-alsang EDSA batuk sa tiraniya tubtob malab-ot ang rebolusyonaryong pagbag-o kag pagtukod sang isa ka matuod nga demokratikong gobyerno sang banwa nga ginahandum sang pumuluyo.

Pagpangabuhi sang espirito sang EDSA

Sadtong Pebrero 25, sa mismo anibersaryo sang pag-alsang EDSA, nagtipon ang 10,000 sa tiilan sang Our Lady of EDSA shrine sa Mandaluyong City sa Metro Manila. Naghugpong sa pagtipon nga ini ang pwersa sang Tama Na Alliance, Bagong Alyansang Makabayan, One Taft Alliance, Duterte Panagutin Network, estudyante, mamumugon, tawong simbahan kag madamo pa nga iban.

Naghugpong sila agud hugot nga ipalab-ot sa rehimen Marcos ang ila panawagan batuk sa korapsyon kag pagpinagusto. Subongman, ginpanawagan nila ang gilayon nga pagkakas kay Sara Duterte, ang bise-presidente ni Ferdinand Marcos Jr.

May amo man nga kasubong nga mga protesta sa syudad sang Baguio, Tuguegarao, Naga, Bacolod, Iloilo, Roxas, Capiz, Cebu kag Davao nga gintambungan sang mga myembro sang lokal nga organisasyon sa idalum sang Bayan kag progresibong partido pareho sang Bayan Muna kag Kabataan Partylist.

Masobra sa 70 ka eskwelahan ang nagdeklarar nga wala sang klase agud hatagan sang higayon ang mga estudyante, manunudlo kag mga akademiko nga magpakigbahin sa lain-lain nga aktibidad sa paghanduraw sang pag-alsa.

Sa Metro Manila, ginatos ka estudyante ang nag-walk-out sa ila mga klase, lakip ang mga estudyante sang Polytechnic University of the Philippines.

Nag-walk-out man ang mga estudyante sang UP-Los Baños kag Cavite State University, samtang may pagtililipon sa sulod sang Southern Luzon State University sa Lucban, Quezon kag Bulacan State University. Sa Visayas, may amo man nga walk-out sa UP-Tacloban kag hublag sa University of Eastern Philippines sa Catarman, Samar.

Sa Mindanao, may pagtililipon sa sulod sang kampus sang Ateneo de Davao University, Ateneo de Zamboanga University kag Xavier University sa Cagayan de Oro City.