Ginpatay sa pagluthang sang mga tropa sang 82nd IB sa Barangay Minan, Tapaz, Capiz sadtong Pebrero 26 ang mangunguma nga si Peter Agudes, kilala man bilang “Tito.” Duha pa niya ka mga kaupod ang napilasan. Ginpaguwa sang Armed Forces of the Philippines (AFP) nga napatay si Agudes sa armado nga engkwentro sa tunga sang mga soldado kag sang Bagong Hukbong Bayan (BHB).

Hugot nga ginpanginwala ni Perla Agudes, asawa sang biktima, nga mga Pulang hangaway ang tatlo. Hustisya kag patas nga imbestigasyon ang panawagan sang pamilya. Nagapuyo ang pamilya Agudes sa Sityo Taroytoy, Barangay Manica, Libacao, Aklan. Nailo ni Peter ang iya tatlo ka bata nga edad 10,13 kag 15 anyos.

Masaker. Wala sang kaluoy nga ginmasaker sang mga soldado sang 26th IB ang magpamilya nga Toto Gomansil, Toni Gomansil kag ang ila anak nga si Celine Gomansil sa Dayuman River, Barangay San Vicente, Esperanza, Agusan Del Sur sadtong Disyembre 15, 2024. Pila ka bulan pagkatapos ang makasiligni nga krimen wala pa gihapon sang hustisya kag napasabat sa masaker.

Antes ang krimen, nagpahibalo pa ang pamilya Gomansil sa mga soldado nga nakadeploy sa malapit sa detatsment para magtrabaho sa ila ulumhan. Sa pihak sang ila “pagpahibalo,” ginsundan sila sang mga soldado kag gingapos ang magtiayon nga Toto kag Toni. Ginpaidalum sila sa grabe nga interogasyon antes ginpanglabo kag ginpatay. Si Celine gintiro naman sang mga soldado sang magdalagan. Ginpasibangdan sila nga nagapakig-angot sa BHB kag rebolusyonaryong kahublagan sa probinsya.

Terorismo sa kahawaan. Troma kag kahadlok ang gindulot sang istraping sang mga helikopter sang militar sa barangay sang La Paz, Agusan del Sur kag Cabanglasan, Bukidnon sadtong Marso 4. Sa pagrason nga suporta ini sa pag-atake sang AFP batuk sa hukbo sang banwa, patarasak nga nagpaniro ang mga helikopter nga nakaapekto sa mga sibilyan. Nagpadala man ang mga soldado sang FA50 fighter jets nga may karga nga 250-lb ukon 500-lb nga mga bomba nga gamiton tani apang napaatras sang nadula ang isa sa tatlo ka jet fighter.