Nagtipon sang san-o lang ang puluan ka mga myembro sang Compatriots agud hiwaton ang makasaysayan nga kumperensya sang kahublagan migranteng Pilipino. Ginatiglawas sang rebolusyonaryong organisasyon nga Compatriots ang ispesyal nga sektor sang mga migranteng Pilipino sa National Democratic Front of the Philippines.

Sa balayon sang kahublagan panadlong, ginpabakud sang Compatriots ang katungdanan sini nga organisahon kag pahulagon ang mga kasimanwa nga Pilipino para sa pungsodnon-demokratikong rebolusyon, diin man sila sa kalibutan. Nag-abot sa 15 milyones ang migranteng Pilipino, lakip ang minilyon ka temporaryo nga mamumugon sa manubo nga klase sang trabaho. Kada adlaw halin 2023, nag-abot sa halos 10,000 ka Pilipino ang adlaw-adlaw nga nagaguwa sa pungsod tungod sa kakulang sang lokal nga trabaho, kawad-on ukon indi bastante nga kita kag tuman ka nubo nga sweldo, pagpang-agaw sang duta kag palangabuhian. Paagi sa patakaran sa pag-eksport sang kusog pangabudlay, ginsakripisyo sila sang reaksyunaryong estado agud mapahagan-hagan ang krisis sa empleyo sang pungsod. Ginahuthutan sila sang milyones sa dagway sang mga sukot sa sandigan nga serbisyo nga indi naman nila matamasa.

Sa mga dumuluong nga pungsod, ginaagwanta nila ang pagpang-abuso, paglapas sa ila mga kinamatarung sa pamugon, rasismo ukon diskriminasyon sa lahi, kalakasan kag tuman ka taas nga gasto sa migrasyon. Wala sila sang mga proteksyon, ilabi na ang kababaehan nga mamumugon nga yara sa mga trabaho nga pinaka-bulnerable sa abuso kag krimen.

Ginatun-an sang Compatriots ang pagsuma sa sobra apat na ka dekada nga rebolusyonaryo nga hilikuton sa kubay sang mga migrante kag magkuha sang mga pagtulun-an sa manggaranon nga inagihan halin sa mga ini. Ginbalik tun-an sini ang mga leksyon sang una kag ikaduha nga dungganon nga kahublagan panadlong agud ilugar ang panawagan sang subong nga kahublagan panadlong batuk sa suhetibismo, konserbatismo, ultrademokrasya kag burukratismo.

Gintun-an man sa kumperensya ang sosyal kag makasahi nga imbestigasyon (SICA ukon social investigation and class analysis) nga gin-andam sang mga komite sini sa lain-lain nga pungsod kag kontinente. Gamit ang mga ini, nasabat kag naathag sang Compatriots ang hinanali nga pamangkot bahin sa sektor kag natalana ang mga patakaran sa pagpalapad kag pag-organisa.

Agud isulong ang interes sang mga Pilipino nga migarante, ginhatagan sang tum-ok sang Compatriots ang kinahanglanon nga tukuron ang mga organisasyon sa ila kubay agud isulong ang ila mga demokratikong kinamatarung, lakip ang kinamatarung sa trabaho kag mga proteksyon sosyal sa mga pungsod nga ginatrabahuan. Ginsegurado man sini ang pag-organisa sang sekreto nga mga organisasyon masa nga magserbe nga kabulig sang Partido sa pagpamuno sa kahublagan migrante, pagpabaskog sang kahublagan sang migranteng mamumugon Pilipino kag malapad nga multisektoral nga patriyotikong kahublagan masa sang mga Pilipino sa lain-lain nga pungsod. Gintan-aw sang Compatriots nga sa pagbaskog sang mga kahublagan nga ini, magadako pa ang maamot sini sa kontra-imperyalista nga pakig-updanay, subongman sa pagsulong sang internasyunal nga proletaryadong rebolusyon.

Hugot nga nakaangot sa kahimtangan sang mga migrante ang hambalanon nga ginaatubang sang pumuluyo sa Pilipinas, pareho sang barat nga sweldo sang mga mamumugon kag kawad-on sang duta, pagkagaruk sang mga burukrata kapitalista nga nagahari sa estado kag pagpangibabaw sang imperyalismong US sa sosyedad Pilipino. Kon papilion, mas gustohon nila nga magpabilin sa pungsod kaupod ang ila mga pinalangga sa kabuhi. Samtang yara sa luwas sang pungsod, ginahandum nila nga makapauli sa ila pungsod.

Bilang mga Pilipino, ginakilala ang mga migrante bilang bahin sang pungsodnon nga kahublagan pangkahilwayan. Ang solusyon sa ila migrasyon amo ang pagsulong sang pungsodnon demokratikong rebolusyon. Hangkat sa Compatriots ang pagpabaskog sang kahublagan batuk sa mapanghimulos kag mapamigos nga papet sang reaksyunaryong estado sa Pilipinas kag pagpalapad sang suporta sa pangmalawigon nga inaway banwa sa tunga sang nagasingki nga pasismo sa kalibutan.

Ginatan-aw sang Partido kag sang pumuluyong Pilipino ang madamuan nga pagpauli sang mga migrante sa Pilipinas agud magpakigbahin sa rebolusyonaryong kahublagan sa Pilipinas, ilabi na sa patag sang armadong paghimakas, agud pandayon ang sosyedad nga matuod nga hilway, demokratiko kag bugana.