Sadtong Marso 5, dululungan nga nag-untat sa pagtrabaho ang masobra 1,300 ka mamumugon sa Nexperia Philippines Inc kag gindeklarar ang welga sa paktorya sini sa Light Industry Science Park 1 sa Cabuyao, Laguna. Katuyuan nila nga ululupod nga isulong ang ila paghimakas para sa umento sa sweldo, pagpabalik sa ginkakas nga mga mamumugon, kag batuk sa pagbungkag sang unyon.

Pila ka tuig nga gina-antus sang mga mamumugon sa Nexperia ang kapitalistang paglapak sa ila interes kag pagbalewala sang ila mga reklamo. Nagapabungol-bungol ang maneydsment sang kumpaniya sa ila mga demanda sa makabuhi nga sweldo, batuk sa pagpangkakas kag kontra sa mga pag-atake sa ila kinamatarung sa pag-unyon. Pabor sa interes sang kapitalista, nagpaguwa sang “assumption of jurisdiction” ang Department of Labor and Employment agud untaton ang ano man nga plano nga welga agud kuno amo ini ang “magpatunga.”

Imbes, gintanyagan sang kapitalista ang pang-insulto nga umento nga ₱17 kada adlaw kadungan sang asud-asud nga kakasanay sang ginatos ka mamumugon halin pa 2023. Para magkamal sang nagadako nga nagadako nga ganansya, ginapadoble-kayod ang mga mamumugon sa pagtrabaho. Sadtong 2024, nalab-ot sang kumpaniya ang produksyon nga siyam ka bilyon nga electronic chips nga ginagamit sa produksyon sang mga salakyan, kagamitan pang-komunikasyon kag iban pa. Nahimo ini sa pagpwersa sa mga mamumugon nga mag-uyat sang tubtob apat ka makina kada isa, nga plano pa nga pasakaon sa siyam ka makina sa mga maabot nga panahon.

Indi mahimutig ang pangkasaysayan nga importansya sang welga sa Nexperia. Isa ini sa pinakadako nga welga sa nagligad nga pila ka tuig sa isa ka kumpaniya nga ginapanag-iyahan sang dumuluong. Ang welga nga ini direkta nga paghangkat sa patakaran nga “no strike” nga hugot nga ginapatuman sa mga export processing zone. Ginpakita sang kakahas sang mga mamumugon sang Nexperia nga buhi ang espirito sang pakig-away sang mga mamumugon nga Pilipino. Ginapahanumdum sini sa tanan nga mamumugon ang importansya sang pag-ugyon kag desisyon nga makig-away para pangapinan ang ila interes kag makasahi nga dignidad.

Naglupok ang welga sang mga mamumugon sa Nexperia sa tunga sang nagalala nga sosyo-ekonomiko nga krisis nga ginaagum sang bug-os nga pungsod. Laragway ini sang malapad nga diskontento sang masang mamumugon kag pumuluyo sa atubang sang pagtimbuok sang presyo sang pagkaon kag mga sandigan nga kinahanglanon kag serbisyo, manubo nga sweldo kag lapnagon nga kawad-on sang trabaho. Minilyon ang gina-agawan sang duta kag sang ila palangabuhian, kag ginalapakan sang mga dumuluong kapitalista, lokal nga dalagko nga negosyo kag agalon mayduta. Ang welga sang mga mamumugon sa Nexperia, kon amo, nagahatag sang tingog indi lang sa mga mamumugon sa Nexperia, kundi sa bug-os nga pumuluyo nga naga-antus sa idalum sang mga patakaran nga paantus kag maki-dumuluong sang rehimen US-Marcos.

Ginpakita sang mga mamumugon sa Nexperia ang kaisog kag militansya sa paghimakas. Ginpamatud-an nila nga indi sila magduko sa atubang sang pagpang-ipit, pagpanghadlok kag pagpamintas sang kapitalista kag sang reaksyunaryong estado. Tungod dala nila ang pagkamakatarungan kag hustisya, indi sila magpakugmat sa nanari-sari nga pagpang-ipit kag pagpamahog sang kapitalista nga sila kakason ukon kasuhan. Nagakuha sila sang kusog kag kalig-on sang balatyagon sa matag-isa, sa ila ululupod nga pag-atubang sa kapitalista nga sakon.

Nagakadapat lang nga manawagan sa tanan nga mamumugon kag bug-os nga pumuluyo nga magtindog kag suportahan ang welga sang mga mamumugon sa Nexperia. Panahon na ini sang paghiliusa sang mga mamumugon, diin ka man nasulod nga pederasyon ukon linya sang industriya. Dapat ipalab-ot sa mga mamumugon, lakip ang mga yara sa empresa sa mga export processing zone, nga ang paghimakas sang mga mamumugon sang Nexperia paghimakas man nila. Ang paghimakas para sa makabuhi nga sweldo, makatawo nga kondisyon sa pagtrabaho kag kinamatarung sa pag-unyon kolektibo nga pakig-away sang tanan nga mga mamumugon nga Pilipino, bisan sang mga mamumugon sa lain-lain nga bahin sang kalibutan.

Dapat nga maghatag man sang suporta sa welga sang mga mamumugon sa Nexperia ang lain-lain nga demokratikong sektor. Dapat dal-on ang ila mga isyu sa pinakadamo nga kampus, komunidad, upisina kag simbahan, agud kuhaon ang malapad nga suporta sang bug-os nga pumuluyo. Tipunon ang pinakamalapad nga suportang materyal kag moral para sa mga mamumugon sang Nexperia. Ang kadalag-an sang ila welga segurado nga magaserbe nga inspirasyon agud pukawon ang mga mamumugon kag lain-lain nga sahi kag sektor nga magtindog kag makigbato sa pagpamigos kag pagpanghimulos.

Samtang nagahatag kita sang pagsaludo sa kaisog sang mga mamumugon sang Nexperia sa militante nga pagsulong sang ila mga demokratikong demanda kag interes, dapat man naton iwagan ang banas sang mas malapad nga paghimakas batuk sa tanan nga dagway sang pagpamigos sa masang anakbalhas kag bug-os nga pumuluyo. Ipakita naton kon paano ang paghimakas sang mga mamumugon sang Nexperia nakaangot sa pangkabug-osan nga rebolusyonaryong paghimakas agud tapuson ang dunot kag mapiguson nga sistema.