Nagtirok hadin naglabay an pira kanapulo nga mga membro han Compatriots agud ilansar an makasaysayan nga kumperensya han kagiusan nga migrante nga Pilipino. Gintataglawas han rebolusyunaryo nga asosasyon han Compatriots an ispesyal nga sektor han mga migrante nga Pilipino ha National Democratic Front of the Philippines.

Ha balayan han kagiusan nga pagtutul-id, ginpadig-on han Compatriots an buruhaton hini nga organisahon ngan pagiuson an igkasi Pilipino para ha nasyunal-demokratiko nga rebolusyon, diin man hira ha kalibutan. Naabot ha 15 kamilyon an migrante nga Pilipino, kaupod an milyun-milyon nga temporaryo nga trabahador ha higmubo nga tipo han trabaho. Kada adlaw tikang 2023, naabot ha haros 10,000 nga Pilipino an kada adlaw nagawas han nasud durot han kakulang han lokal nga trabaho, kawaray o diri sadang nga kita ngan ura-ura kahimubo nga suhol, panlupot han tuna ngan pakabuhi. Pinaagi han palisiya ha pag-eksport han pagtrabaho, iginsasakripisyo hira han reaksyunaryo nga estado agud maibanan an krisis ha empleyo han nasud. Ginhuhuthutan hira hin milyun-milyon ha porma han mga sukot ha batakan nga serbisyon nga diri man nira natatagamtaman.

Ha langyaw nga mga nasud, gin-aantos nira an pangabuso, pagtalapas ha ira mga katungod ha pagtrabaho, rasismo o diskriminasyon ha tulin, kamadarahug ngan hitaas kaupay nga gastos ha migrasyon. Waray hira mga proteksyon, labina an kababayin-an nga trabahador nga aada ha mga trabaho nga pinakabulnerable ha abuso ngan krimen.

Gin-adman han Compatriots an pagsusuma ha masobra upat kadekada nga rebolusyunaryo nga buruhaton ha ranggo han mga migrante ngan kumuha hin mga leksyon ha riko nga eksperyensya tikang hini. Ginrebyu hini an mga leksyon han syahan ngan ikaduha nga dakila nga kagiusan nga pagtutul-id agud ilugar an panawagan han presente nga kagiusan nga pagtutul-id kontra ha suhetibismo, konserbatismo, ultrademokrasya ngan burukratismo.

Gin-adman liwat ha kumperensya an mga pankatilingban ngan makakaklase nga imbestigasyon (SICA o social investigation and class analysis) nga igin-andam han mga komite hini ha magkalain-lain nga nasud ngan kontinente. Gamit ini, nabaton ngan nahipaklaro han Compatriots an pankadagmitan nga mga pakiana hiunong ha sektor ngan nahitalaan an mga palisiya ha pagpapahiluag ngan pag-oorganisa.

Agud ipasulong an interes han mga Pilipino nga migrante, gintagan-duon han Compatriots an panginahanglan nga bug-uson an mga organisasyon ha ira ranggo agud ipasulong an ira mga demokratiko nga katungod, kalakip an katungod ha trabaho ngan mga pankatilingban nga proteksyon ha mga nasud nga gintatrabahuan. Ginseguro liwat hini an pag-organisa ha sikreto nga mga organisasyon masa nga magseserbe nga kabakyang han Partido ha pamumuno ha kagiusan nga migrante, pagpapakusog han kagiusan han migrante nga Pilipino nga trabahador ngan hiluag nga multi-sektoral nga patriyotiko nga kagiusan masa han mga Pilipino ha magkalain-lain nga nasud. Gintatan-aw han Compatriots nga ha pagkusog hini nga mga kagiusan, madako pa an mahiaamot hini ha kontra-imperyalista nga pagkamagburugto sugadman an pagpapasulong han internasyunal nga proletaryo nga rebolusyon.

Mahugot nga nakasumpay ha kamutangan han mga migrante an karukayaknon nga ginkakaatubang han katawahan ha Pilipinas, sugad han barato kaupay nga suhol han mga trabahador ngan an kawaray hin tuna, kadunutan han mga burukrata-kapitalista nga naghahadi ha estado ngan pag-ungbaw han imperyalismo nga US ha katilingban Pilipino. Kun pagpipilion, mas karuyag nira nga magpabilin ha nasud kaupod an ira mga hinigugma ha kinabuhi. Samtang aadto ha gawas han nasud, pinakahingyap nira nga makauli ha iroy nga tuna.

Komo mga Pilipino, ginkikilala an mga migrante komo kaparte han nasyunal nga kagiusan nga pagtatalwas. An solusyon ha ira migrasyon amo an pagpapasulong han nasyunal demokratiko nga rebolusyon. Ayat ha Compatriots an pagpapakusog han kagiusan kontra ha matalumpiguson ngan matiyupion nga niyutiyo nga reaksyunaryo nga estado ha Pilipinas ngan pagpapahiluag han suporta ha panmaihaan nga gerra han katawhan ha butnga han natikagrabe nga pasismo ha kalibutan.

Ginlalantaw han Partido ngan han katawhan Pilipino an tinagdamo nga pag-uli han mga migrante ha Pilipinas agud magpartisipar ha rebolusyunaryo nga kagiusan ha Pilipinas, labina ha natad han armado nga pakig-away, para ha pagpanday han katilingban nga tinuod nga talwas, demokratiko ngan abunda.