Ginpatay ha panmusil han mga tropa han 82nd IB ha Barangay Minan, Tapaz, Capiz hadton Pebrero 26 an parag-uma nga hi Peter Agudes, kilalado liwat komo “Tito.” Duha pa niya nga kaupod an nasamaran. Ginpapagawas han Armed Forces of the Philippines (AFP) nga napatay hi Agudes ha armado nga engkwentro giutan han mga sundalo ngan han Bagong Hukbong Bayan (BHB).

Mahugot nga ginpahimuwa ni Perla Agudes, asawa han biktima, nga mga Pula nga mangaraway an tulo. Hustisya ngan patas nga imbestigasyon an panawagan han pamilya. Naukoy an pamilya Agudes ha Sityo Taroytoy, Barangay Manica, Libacao, Aklan. Nailo ni Peter an iya tulo nga anak nga 10, 13 ngan 16 anyos an pangidaron.

Masaker. Waray kaluoy nga ginmasaker han mga sundalo han 26th IB an magkaurupdan nga hira Toto Gomansil, Toni Gomansil ngan ira anak nga hi Celine Gomansil ha Dayuman River, Barangay San Vicente, Esperanza, Agusan Del Sur hadton Disyembre 15, 2024. Pira kabulan kahuman han makarimadima nga krimen waray pa gihapon hustisya ngan napapagbaton ha masaker.

Antes an krimen, nagsarit pa an pamilya Gomansil ha mga sundalo nga nakadeploy ha hirani nga detatsment para magtrabaho ha ira uma. Ha luyo han ira “pagsarit,” ginsundan hira han mga sundalo ngan igin-gapos an mag-asawa nga Toto ngan Toni. Iginpailarum hira ha grabe nga interogasyon antes tawtawon ngan patayon. Hi Celine ginpanmusil naman han mga sundalo han dumalagan. Gin-akusahan hira nga nakikigsumpayan ha BHB ngan rebolusyunaryo nga kagiusan ha prubinsya.

Terorismo ha kahanginan. Troma ngan kahadlok an igindurot han istraping han mga helikopter han militar ha mga barangay han La Paz, Agusan del Sur ngan Cabanglasan, Bukidnon hadton Marso 4. Ha pagrarason nga suporta ini ha pag-atake han AFP kontra ha hukbo han katawhan, waray wantas nga nanmusil an mga helikopter nga nakakaapekto ha mga sibilyan. Nagpadara liwat an mga sundalo hin FA50 fighter jets nga kargado hin 250-lb o 500-lb nga mga bomba nga gagamiton unta kundi napaatras han mawara an usa ha tulo nga jet fighter.