Ha pagselebrar han Pankalibutan nga Adlaw han Kababayin-an ha Marso 8, ginpapasidunggan han Partido an ngatanan nga kababayin-an nga tinindog ha kaangayan nira nga lugar ha rebolusyon. Hira an mga babaye nga rebolusyunaryo, kadre, mga Pula nga kumander, ngan mangaraway, nga naghasog ha makuri nga dalan han pag-ato, ginios ngan namuno, ngan damo ha ira kumatin hin armas, agud kab-uton an higtaas nga hingyap para ha katalwasan han kababayin-an ngan bug-os nga katawhan.

Hira an mga waray yumukbo o sumurender ha butnga han magpintas nga agway, puno hin rebolusyunaryo nga diwa tubtub ha urhi nga gininhawa. Hira an mga rebolusyunaryo nga bituon nga waray katapusan nga magpapawa.

Pinakahitaas nga pagpasidungog an iginhahatag han Partido ha mga kababayin-an nga namuno ha Partido, ha hukbo han katawhan ngan rebolusyunaryo nga kagiusan. Ginpapasidunggan han Partido an mga kababayin-an nga nagin kagawad han Komite Sentral nga hira Ka Maria Malaya (Myrna Sularte), sekretaryo han panrehiyon nga komite ha Northeast Mindanao ngan Komisyon han Mindanao; Ka Bagong-Tao (Wilma Tiamzon), pankabug-usan nga sekretaryo han Partido; Ka Fiel (Eugenia Magpantay), pankabug-usan nga sekretaryo han Partido; Ka Elay (Helenita Pardalis), sekretaryo han Panrehiyon nga Komite han Eastern Visayas; Ka Lalay (Aprecia Alvarez Rosete), sekretaryo han Panrehiyon nga Komite ha Western Mindanao; Ka Sandy (Josephine Mendoza), ikaduha nga sekretaryo han Panrehiyon nga Komite ha Southern Tagalog; ngan Ka Kaye (Sandra Reyes), kagawad han Ko- misyon ha Mindanao.

Diri liwat mahingangalimtan hi Ka Concha Araneta Bocala, tagapagyakan han National Democratic Front-Panay ngan gatus-gatos pa nga kababayin-an nga nagserbe nga mga sekretaryo, giya pampulitika, kumander, mangaraway, doktor ngan nars han masa, organisador, propagandista, kabakyang ha aktibidad, magturutdo, tagapagpahiara, parapamati han mga problema ngan tagsagdon, ngan iba pa.

Igselebrar naton an dagko kaupay nga amot han kababayin-an ha rebolusyon Pilipino. Tagan naton hin importansya an iginhahalad nira nga kabaltok, kamaduroto ngan katindog nga nagpapariko ngan nagpapadig-on ha pakigbisog han katawhan. Ha natad han pakigbisog para ha katawhan ngan para ha kababayin-an, nakakab-ot nira an ira hul-os nga potensyal komo tawo ngan katupong han kalalakin-an. Gin-aatuhan nira an patriyarkal nga kultura nga nagkukunsidera ha ira nga maluya o mas himubo, ngan igpakita an puthaw nga panindugan.

Paglaum an mga babaye nga rebolusyunaryo para ha milyun-milyon nga kababayin-an nga nag-aantos ha katilingban nga nagkukunsidera ha ira nga mas himubo ngan mas maluya. Susbaranan hira para ha mga babaye nga ginsusuhulan hin mas himubo ngan gin-uuyam han pauru-utro nga trabaho; baga karabaw nga natrabaho ha uma kundi diri gin-iihap komo produktibo; mga waray tuna ngan ginpapalayas ha tuna han ira kaapuy-apuyan; nakahigot ha panimalay nga buruhaton ngan pag-ataman han asawa ngan anak kundi limitado, kun mayda man tingog sakob han ira kalugaringon nga panimalay; ha mga diri makaalinggawas ha mga mapan-abuso nga re- lasyon tungod han kahadlok ngan kawaray poder ha ekonomiya; ha mga napiritan mag-abrod agud may mapakaon ha pamilya; ha mga nahiaagum hin diskriminasyon ha tawoa; ngan ha mga biktima han sekswal nga pangabuso ngan kamadarahug.

Kilal-on naton an ira nalalain nga kontribusyon komo mga iroy ngan asawa ha pagbug-os han mga rebolusyunaryo nga pamilya ngan relasyon, ha pagpupukaw ngan militante nga pag-undong ha mga palisiya para ha proteksyon han kababayin-an, bata ngan LGBT kontra ha paniniyupi ngan pananalumpigos. Kilal-on naton an ira papel ha pag-isa han kapukawan han kalalakin-an ngan katawhan kasumpay han mga karukayaknon nga pankababayin-an, pagpasulong han pantay nga pagtagad ha tawoa, ngan pagbug-os hin madig-on nga pansuporta nga sistema para ha mga igkasi babaye.

Tagan naton hin importansya an ira mga sakripisyo, an pagbaya ha komportable nga kinabuhi ngan makaiya nga hingyap, an pag-antos ha damo nga kakurian han gerra, ngan labina an tag-iha nga kahimulag ha kalugaringon nira nga mga anak. Ha luyo hini, an ira mga kinabuhi ha pakigbisog puno hin kalipay ngan karayhak. Diri mauubos an mga estorya nga mag-upay, makalilipay ngan makatatangis nga eksperyensa han mga babaye nga nakikig-away. Sugad han panalagsahon nga mga bukad ha kagugub-an, pinakahinigugma ngan pinakaminayuyo hira han masa ngan mga kasama.

Ha atubangan han natikagrabe nga kakurian ngan pag-antos han pira kanapulo kamilyon nga pamilya ha butnga han krisis ha ekonomiya bunga han korapsyon han rehimen Marcos, ngan mga palisiya ngan programa nga kontra-kablas ngan maka-langyaw nga kapitalista, padayon nga napupukaw an kababayin-an kaupod an bug-os nga katawhan, ha panginahanglan nga tumindog ngan umato.

Kaupod an mga babaye ha unhan han mga trabahador nga pursigido nga nagtutukod han ira mga unyon ngan magkalain-lain nga asosasyon. Kaupod hira ha mga nangunguna ha pag-insister ha mga ungara ngan demanda para ha dugang nga suhol, katungod ha regular nga trabaho ngan mas makatawo nga kundisyon ha pagtrabaho. Kaupod hira ha mag-isog nga naninindugan ha pag-atubang ha hakog nga kapitalista, ha iya mga armado nga maton ngan pasista nga ahente han estado.

Aada hira ha unhan han masa nga kablas nga naato ha waray hunong nga paghitaas han presyo han bugas, pagkaon, lana, sungo, medisina, pasahe ngan magkalain-lain nga serbisyo. Hira an mga iroy ngan anak nga nakikig-usa ha ira mga amyaw agud suknaon hi Marcos ngan mga pulitiko ha pagdispalko han kwarta han nasud ha ira huralwa nga kinabuhi ngan atuhan an waray katapusan nga pangutang han gubyerno agud pondohan an korapsyon. Ha mga kampus kaupod an kababayin-an nga kabatan-unan ha namartsa ha unahan han pag-ato ha waray hunong nga paghitaas han matrikula ngan kagarastuhan ha pag-eskoyla, sugadman ha pag-ato ha pagpakaniyutiyo ni Marcos ha US ngan pagdanas ha nasud ha imperyalista nga gerra.

Ha kabaryuhan, kaupod an kababayin-an ha masa nga nag-oorganisa ngan nagios kontra ha rehimen Marcos ngan ha palisiya hini nga todo-larga nga liberalisasyon nga napatay ha pakabuhi han milyun-milyon nga parag-uma. Kaupod hira ha duruyog nga naguliat para ha tinuod nga reporma ha tuna, ngan kadagmitan nga mga demanda agud pahimub-on an plete ha tuna, interes ha pautang han mga hakog nga usurero ngan bangko, ngan presyo han mga higamit ha pag-uma. Ha pira kayukot nga barangay nga ginkokontrol han militar, maisugon nira nga ginsusukna an pangabuso ngan kamadarahug han pasista nga sundalo, labina kontra ha kababayin-an ngan kabataan.

Kaupod an kababayin-an ha unhan han mga kabatan-unan nga bag-o nga Pula nga mangaraway han BHB. Sugad han nahiuna nga mga tulin han kababayin-an nga mangaraway, iginpapakita nira yana an waray tubtuban nga kaisog ha pag-atubang ha kaaway, ngan waray katapusan nga paghigugma ngan pagmayuyo ha masa nga kausa nira ha hingyap para ha talwas ngan malamrag nga kabubwason.