Ha okasyon han ika-39 nga anibersaryo han pag-aalsa nga EDSA, nagpahinumdom an National Democratic Front of the Philippines ha mga importante nga leksyon hini ngan ha panginahanglan nga maksimisahon an mga nakab-ot hini pinaagi han pagpapasulong han nasyunal-demokratiko nga rebolusyon.

Ginkilala ni Elias Dipasupil, pankabug-usan nga sekretaryo han NDFP, an nalalain nga papel han pag-aalsa nga EDSA ha kasaysayan han katawhan Pilipino. Ginbug-os hini an pagkakaurusa han magkalain-lain nga grupo, tikang ha tangkod tubtub ha may kalugaringon nga adyenda, agud patalsikon an usa nga diktador. An kahiluagon ngan pagkakaiba-iba han mga pwersa an naghatag dinhi han kahiluagon ngan kusog, kundi ini gihapon an hinungdan kun kay ano nagin bulnerable an nahingadtuan han pag-aalsa ha distorsyon (pambirikis) ngan kooptasyon (pakigbuligay ha kaaway).

Kahuman han haros upat kadekada, nagpapabilin nga ludlod ha kakurian an nasud, ginhahadian han mga burukrata kapitalista ngan ira imperyalista nga amo. Nakabalik na ha Malacañang an pamilya nga Marcos ngan nanawantawan ha poder. Hadin naglabay nga duha katuig la, siyam nga kaso kasumpay han ira ginkawat nga karikuhan an napabasura ha Sandiganbayan. Nadugngan na liwat an ira nahakin nga pondo han katawhan ha porma han intelligence and confidential funds, unprogrammed funds, Maharlika Investment Fund ngan damo pa nga kapareho nga aragianan han korapsyon.

Kundi, nagpapabilin nga mahinungdanon an pag-aalsa nga EDSA ngan mga leksyon hini ha pag-ato ha tiraniya. Importante nga pahinumdom an pag-aalsa ha panginahanglan han marayhak ngan pursigudo nga pagpupukaw ngan pag-oorganisa. Waray mapatalsik an diktador han tulo kaadlaw la hadton 1986. Ha 14 katuig antes ini, iginpundar ha kasyudaran an mga sikreto nga organisasyon tubtub nga gin-akos han katawhan nga maglansar hin tikadagko nga dayag nga paggios agud buungon an terorista nga ngirhat. Ha kabaryuhan, ginlansar han Bagong Hukbong Bayan an armado nga pakig-away agud atuhan an grabe nga militarisasyon, kadungan an mga pakigbisog nga parag-uma agud ipasulong an ira gindedemanda nga tinuod nga reporma ha tuna.

Labaw ha ngatanan, importante nga leksyon an panginahanglan nga maksimisahon an eksperyensya han pag-aalsa nga EDSA kontra ha tiraniya tubtub nga makab-ot an rebo-lusyunaryo nga pagbabag-o ngan pagbubug-os hin usa nga tinuod nga demokratiko nga gubyerno han katawhan nga ginhihingyap han katawhan.

Paghatag-kinabuhi ha diwa han EDSA

Hadton Pebrero 25, ha mismo nga anibersaryo han pag-aalsa nga EDSA, nagtirok an 10,000 ha atubangan han Our Lady of EDSA Shrine ha Mandaluyong City ha Metro Manila. Nagtirig-ob hini nga katitirok an Tama Na Alliance, Bagong Alyansang Makabayan, One Taft Alliance, Duterte Panagutin Network, estudyante, trabahador, tawo ha singbahan ngan damo pa nga iba.

Nagkaurusa hira agud mahugot nga ipaabot ha rehimen Marcos an ira panawagan kontra ha korapsyon ngan kawaray konsensya. Sugad liwat, iginpanawagan nira an dagmit nga pagpapatalsik kan Sara Duterte, an bise-presidente ni Ferdinand Marcos Jr.

Nagkamayda hin pareho nga mga protesta ha syudad han Baguio, Tuguegarao, Naga, Bacolod, Iloilo, Roxas, Capiz, Cebu ngan Davao nga ginpartisiparan ha mga membro han lokal nga organisasyon ha ilarum han Bayan ngan progresibo nga partido sugad han Bayan Muna ngan Kabataan Partylist.

Masobra 70 nga eskoylahan an nagdeklara hin waray klase agud tagan hin higayon an mga estudyante, magturutdo ngan mga akademiko nga pumartisipar ha magkalain-lain nga aktibidad ha paghandum han pag-aalsa.

Ha Metro Manila, gatus-gatos nga estudyante an nag-walk-out ha ira mga klase, kaupod an mga estudyante han Polytechnic University of the Philippines.

Nag-walk-out liwat an mga estudyante han UP-Los Baños ngan Cavite State University, samtang nagkamayda hin katitirok ha sakob han Southern Luzon State University ha Lucban, Quezon ngan Bulacan State University. Ha Visayas, nagkamayda hin walk-out ha UP-Tacloban ngan paggios ha University of Eastern Philippines ha Catarman, Northern Samar.

Ha Mindanao, nagkamayda hin katitirok ha sakob han kampus han Ateneo de Davao University, Ateneo de Zamboanga University ngan Xavier University ha Cagayan de Oro City.