Hadton Marso 5, dudrungan nga inundang ha pagtrabaho an masobra 1,300 nga trabahador ha Nexperia Philippines Inc ngan igindeklara an welga ha pabrika hini ha Light Industry Science Park 1 ha Cabuyao, Laguna. Katuyuanan nira nga duruyog nga ipasulong an ira pakigbisog para ha umento ha suhol, pagpabalik ha gintanggal nga mga trabahador, ngan kontra ha pagbuhag ha ira unyon.

Pira katuig na nga gin-aantos han mga trabahador ha Nexperia an kapitalista nga pagtamas-tamas ha ira kaupayan ngan pagbalewaray ha ira mga ungara. Nagpapakabungol an maneyds-ment han kompaniya ha ira mga demanda para ha makaburuhi nga suhol, kontra ha pagtatanggal ngan kontra ha mga pangatake ha ira katungod ha pag-unyon. Pabor ha interes han kapitalista, nagpagawas hin “assumption of jurisdiction” an Department of Labor and Employment para paundangon an anuman nga larang nga welga agud kunuhay ini an “mag-arbiter.”

Lugod, gintanyag han kapitalista an matamay nga umento nga ₱17 kada adlaw kadungan an susrunod nga pagtanggal han gatus-gatos nga trabahador tikang pa 2023. Agud makaghakin han tikadagko na nga ganansya, ura-ura nga gindugngan an pagtrabaho an mga trabahador. Hadton 2024, naabot han kompaniya an produksyon han siyam kabilyon nga electronic chips nga gin-gagamit ha produksyon han mga sarakyan, higamit nga pan-komunikasyon ngan iba pa. Nahimo ini ha pagpwersa ha mga trabahador nga kumapot tubtub upat nga makina kada usa, nga plano pa nga pahitas-on ha siyam nga makina ha mga tiarabot nga panahon.

Diri madidiwara an pankasaysayan nga kamahinungdanon han welga han Nexperia. Usa ini ha pinakadako nga welga ha naglabay nga pira katuig ha usa nga kompaniya nga pananag-iya han langyaw. Ini nga welga direkta nga pag-ayat ha palisiya nga “no strike” nga mahugot nga iginpapatuman ha mga export processing zone. Iginpapakita han kaisog han mga trabahador han Nexperia nga buhi an mapan-ato nga diwa han mga Pilipino nga trabahador. Iginpapahinumdom hini ha tanan nga trabahador an importansya han pagkaurusa ngan determinasyon nga umato agud depensahan an ira kaupayan ngan makaklase nga dignidad.

Naglarab an welga han mga trabahador ha Nexperia ha butnga han natikagrabe nga sosyo-ekonomiko nga krisis nga kinamumutangan han bug-os nga nasud. Espiho ini han hiluag nga diskuntento han masa nga trabahador ngan katawhan ha atubangan han tigda nga paghitaas han presyo han pagkaon ngan mga batakan nga panginahanglan ngan serbisyo, himubo nga sweldo ngan hiluag nga kawaray trabaho. Milyun-milyon an gin-aagawan hin tuna ngan han ira pakabuhian, ngan ginliligis han mga langyaw nga kapitalista, lokal nga dagko nga negosyo ngan agaron maytuna. An welga han mga trabahador ha Nexperia, ha laktud, naghahatag tingog diri la ha mga trabahador han Nexperia, kundi ha bug-os nga katawhan nga nag-aantos ha ilarum han mga pakuri nga palisiya ngan makalangyaw nga rehimen US-Marcos.

Iginpapakita han mga trabahador ha Nexperia an kaisog ngan militansya ha pakigbisog. Ginpapamatud-an nira nga diri hira mayukbo ha atubangan han pan-gigipit, panhadlok ngan pandarahug han kapitalista ngan han reaksyunaryo nga estado. Tungod kay amkon nira an katadungan ngan hustisya, waray hira magpahadlok ha dirudilain nga pan-gigipit ngan panarhug han kapitalista nga tatanggalon o kakasuhan hira. Nakuha hira hin kusog ngan kadig-on han determinasyon ha kada tagsa, ha ira nagkakaurusa nga pag-atubang ha hakog nga kapitalista.

Kaangayan la nga manawagan ha tanan nga trabahador ngan bug-os nga katawhan nga tumindog ngan suportahan an welga han mga trabahador ha Nexperia. Panahon ini han pagkakaurusa han mga trabahador, diin pa man nga kaparte nga pederasyon o linya han industriya. Kinahanglan ipahibaro ha mga trabahador, kaupod an mga aada ha pabrika han mga export processing zone, nga an pakigbisog han mga trabahador han Nexperia pakigbisog liwat nira. An pakigbisog para ha makaburuhi nga suhol, makatawo nga kundisyon ha pagtrabaho ngan katungod ha pag-unyon an kolektibo nga pag-ato han ngatanan nga mga Pilipino nga trabahador, bisan han mga trabahador ha magkalain-lain nga parte han kalibutan.

Kinahanglan nga maghatag liwat hin suporta ha welga han mga trabahador han Nexperia an magkalain-lain nga demokratiko nga sektor. Kinahanglan dad-on an ira mga isyu ha pinakadamo nga kampus, komunidad, upisina ngan singbahan, agud kuhaon an hiluag nga suporta han bug-os nga katawhan. Tirukon an pinakahiluag nga materyal ngan moral nga suporta para ha mga trabahador han Nexperia. An kadaugan han ira welga segurado nga magseserbe nga inspirasyon agud pukawon an mga trabahador ngan magkalain-lain nga klase ngan sektor nga tumindog ngan umato ha pananalumpigos ngan paniniyupi.

Samtang gindadayaw naton an kaisog han mga trabahador han Nexperia ha militante nga pagpasulong han ira mga demokratiko nga ungara ngan interes, kinahanglan liwat naton lamragan an dalan han mas hiluag nga pakigbisog kontra ha ngatanan nga tipo hin pananalumpigos ha masa nga anakbalhas ngan bug-os nga katawhan. Ipakita naton kun tiunan-o an pakigbisog han mga trabahador ha Nexperia nakakaw-it ha pankabug-usan nga rebolusyunaryo nga pakigbisog agud tapuson an dunot ngan matalumpiguson nga sistema.