Tungod kay pakyaway ha plantasyon han kapehan, burublig ha pag-ani han kape an pamilya nga Lupao. Kinahanglan madagmit nga humanon ni Lydia, han iya asawa ngan tulo nira nga kabataan an 7 kaektarya nga kapehan. Ginkaka-atubang ni Lydia an tarhug nga matanggal hiya ha listahan han 4Ps kun diri niya ibabalik ha eskoylahan an mga anak nga kabulig nira ha pakabuhi.

Ginpapaaplay naman utro hi Tess ha iya kompaniya nga ginsudlan hin haros duha katuig komo paragtahi. Ini an baton han manedyer ha iya kahuman niya maghangyo hin maternity leave para ha panganak ha masunod nga bulan. Sobra an kabaraka ni Tess nga mawarayan hin trabaho, labina nga magigin solo nga kag-anak hiya.

Nasunugan naman hira Rosario, iroy han 6-katuig nga bata ngan 1 katuig nga puya. An pagkita han mga kaapi han ira asosasyon han kablas, tinuyo an sunog agud palayason hira ha komunidad. Nabubuhi la an iya pamilya ha guti nga kita han asawa niya nga drayber han pedikab. Nakasirong hira ha evacuation center nga gin-aapo kada pagbagyo.

Usa nga masahista hi Kris, usa nga transgender, ha usa nga guti nga spa. Ha nakakaubos hin kusog nga trabaho niya, kulang ha minimum nga suhol an suma total nga komisyon nga iginsusuhol han iya amo. Ginbabaton niya an kabarayadan ha SSS ngan Philhealth. Waray iginhahatag nga proteksyon ha iya bisan pira kabeses na hiya nga nabaraka ha mga kliyente nga nag-aaro hin “ispesyal nga ser- bisyo.”

Ini an magkalain-lain nga ladawan han kababayin-an nga Pilipino. Diri madidiwara an kagrabihon han gin-aantos nira nga kakurian ngan sakri-pisyo. Sugad hin karabaw nga ginkakapagalan nira nga mabuhi an ira mga pamilya kundi mayoriya ha ira ginkukunsidera nga “diri produktibo.” Masobra katunga ha kababayin-an diri igin-iihap ha “pwersa han pagtrabaho.” Mayda mga balaud ngan programa nga pankababayin-an nga maupay pamatian kundi tinuyo nga waray tango ngan waray pulos ha atubangan han hiluagan nga pagtalapas nga nahiaguman han mga kababayin-an.

Ha bug-os nga kalibutan, nahiaagum an kababayin-an hin doble nga paniniyupi ha atubangan han hiluagan nga kawaray trabaho ngan himubo nga suhol. Mas damo an mga babaye nga waray trabaho. Nakarawat hira hin mas himubo nga suhol tanding ha mga lalaki nga trabahador. Dugang nga mapanhibang an hampak ha ira han delubyo han climate change ngan mga gerra. Nagtitikagrabe an nahiaaguman nira nga pandarahug ha human trafficking, pornograpiya, prostitus-yon, pamaligya han bata, kalakip an nakikit-an ha social media ngan iba pa.

An nahihiaguman nga pananalumpigos han kababayin-an dugang pa nga ginpagrabe ilarum han bagakolonyal ngan bagapyudal nga sistema. Nakaungbaw ha pundamental nga problema han imperyalismo, pyudalismo ngan burukrata kapitalismo, dugang nga ginkakaatubang han mga Pilipino nga kababayin-an an magkalain-lain nga porma han pyudal ngan burgis nga patriyarkal nga sistema.

Ha atubangan han nagliliyong nga krisis ha ekonomiya, pulitika ngan kultura, diin ba angay pumapel an kababayin-an? Ha butnga ngan ha unhan han pagpapasulong han rebolusyon nga tinuod nga magbabag-o ha ira kamutangan nga tinalumpigos ngan tiniyupi. Ini an ginpamatud-an han pira kadekada han praktika han rebolusyunaryo nga kagiusan han kababayin-an ha Pilipinas ha pangunguna han Makabayang Kilusan ng Bagong Kababaihan (Makibaka) nga gin-gigiyahan han Partido Komunista ng Pilipinas. Iginpakita han Makibaka nga kaparte ha ranggo han rebolusyon an kababayin-an, bisan an mga LGBTQ, ngan magin an kabataan.

Ha kabaryuhan, an mga organo han pampulitika nga poder igintutukod nga mahugot nga kabakyang an kababayin-an pinaagi han mga lokal nga tsapter han Makibaka. Diri madidiwara nga ha pag-abante han papel han kababayin-an nga parag-uma ha pulitika, dara hini an mga pan-ekonomiya nga ganansya han mga tiriklos, asosasyon ha umhanan ngan mga kooperatiba. Bisan ha aspeto nga kultural ginpapasamwak hini an demokratisasyon ha sakob han pamilya, maka-masa nga panambal ngan pagpapagios ha kabataan para ha alternatibo nga kultura ngan edukasyon.

Ha kasyudaran, iginpapasulong han MAKIBAKA an pag-insister ha mga demokratiko nga demanda, kaupayan ngan katungod han kababayin-an, kabataan ngan LGBTQ ha kagiusan masa. Pursigido nga ginbubuksas ngan gin-aatuhan an kadunutan, kawaray pulos ngan pasismo han naghahadi nga sistema dara han marayhak nga pag-amot han kagiusan nga kababayin-an ha mga pabrika, eskoylahan, komunidad, opisina, singbahan ngan kun diin pa nga lugar nga nakadto an kababayin-an. Igin-aamot nira an ira tingog ha guliat han katawhan para ha nasyunal nga katalwasan tikang ha langyaw nga paghahadi ngan pananalumpigos.

Karuyag han imperyalismo nga US nga ulangon an partisipasyon han kababayin-an ha rebolusyon ngan sapawan an mapan-ato nga diwa han kagiusan han kababayin-an. Gamit an USAID, World Bank, Asian Development Bank, United Nations ngan iba pa nga instrumento, iginbabandilyo ngan iginduduso an mga programa nga nagamit hin mag-upay nga pulong nga “inclusion,” safe spaces,” ngan “peace zones para ha kabataan.” Katuyuanan hini nga mga “adbokasiya” nga himuon nga matarapsaw an karukayaknon han nasyunal nga pananalumpigos ngan makaklase nga paniniyupi komo gamot han gin-aagian nga pananalumpigos han mga kababayin-an, ihirayo hira ha rebolusyunaryo nga dalan han pagbabag-o ngan dad-on ini ha dalan han repormismo, ligalismo ngan NGOismo.

Atubangan hini, kinahanglan dugang nga ipakita ha hiluag nga masa han kababayin-an nga an ira katalwasan tikang ha magkalain-lain nga klase han paniniyupi makakab-ot la ha natad han armado nga pakig-away. Ha naglabay nga pira kadekada, ginhasog han kababayin-an nga Pilipino an dalan han armado nga rebolusyon, ngan nag-amot hin kabaltok ngan kinabuhi komo mga Pula nga mangaraway ngan kumander han Bagong Hukbong Bayan ngan mga lider ngan kadre han Partido.

Sugad kanda Lydia, Tess, Rosario ngan Kris, naghuhulat an hiluag nga ranggo han kababayin-an nga angkunon an ira papel ha rebolusyon. Mas kritikal yana ha kababayin-an, labina ha kababayin-an nga anakbalhas, nga magpursige ha pagpukaw, pag-organisa ngan pakigbisog. Kinahanglan mahugot nga katinan an mga prinsipyo han rebolusyunaryo nga kagiusan han kababayin-an ngan igpalaypakay an bandera han nasyunal-demokratiko nga kagiusan.