Nagtipon kamakailan ang ilampung mga myembro ng Compatriots para idaos ang makasaysayang kumperensya ng kilusang migranteng Pilipino. Kinakatawan ng rebolusyonaryong samahang Compatriots ang espesyal na sektor ng mga migranteng Pilipino sa National Democratic Front of the Philippines.

Sa balangkas ng kilusang pagwawasto, pinagtibay ng Compatriots ang tungkulin nitong organisahin at pakilusin ang mga kababayang Pilipino para sa pambansa-demokratikong rebolusyon, saan man sila sa mundo. Umaabot sa 15 milyon ang migranteng Pilipino, kabilang ang milyun-milyong temporaryong manggagawa sa mabababang klase ng trabaho. Kada araw mula 2023, umabot sa halos 10,000 Pilipino ang araw-araw lumalabas sa bansa dulot ng kasalatan ng lokal na trabaho, kawalan o hindi sapat na kita at napakababang sahod, pangangamkam ng lupa at kabuhayan. Sa pamamagitan ng patakaran sa pag-eksport ng paggawa, isinasakripisyo sila ng reaksyunaryong estado parang ibsan ang krisis sa empleyo ng bansa. Hinuhuthutan sila ng milyun-milyon sa anyo ng mga singil sa batayang serbisyo na hindi naman nila natatamasa.

Sa dayuhang mga bansa, iniinda nila ang pang-aabuso, paglabag sa kanilang mga karapatan sa paggawa, rasismo o diskriminasyon sa lahi, karahasan at napakataas na gastos sa migrasyon. Wala silang mga proteksyon, laluna ang kababaihang manggagawa na nasa mga trabahong pinakabulnerable sa abuso at krimen.

Pinag-aralan ng Compatriots ang pagsusuma sa higit apat na dekadang rebolusyonaryong gawain sa hanay ng mga migrante at humalaw ng mga aral sa mayamang karanasang mula sa mga ito. Binalik-aralan nito ang mga aral ng una at ikalawang dakilang kilusang pagwawasto para ilugar ang panawagan ng kasalukuyang kilusang pagwawasto laban sa suhetibismo, konserbatismo, ultrademokrasya at burukratismo.

Pinag-aralan din sa kumperensya ang mga panlipunan at maka-uring pagsisiyasat (SICA o social investigation and class analysis) ng inihanda ng mga komite nito sa iba’t ibang bansa at kontinente. Gamit ang mga ito, nasagot at nalinaw ng Compatriots ang kagyat na mga tanong hinggil sa sektor at naitakda ang mga patakaran sa pagpapalawak at pag-oorganisa.

Para isulong ang interes ng mga Pilipinong migrante, binigyang-diin ng Compatriots ang pangangailangang buuin ang mga organisasyon sa kanilang hanay para isulong ang kanilang mga demokratikong karapatan, kabilang ang karapatan sa trabaho at mga proteksyong panlipunan sa mga bansang pinagtatrabahuan. Tiniyak din nito ang pag-oorganisa sa lihim na mga organisasyong masa na magsisilbing katuwang ng Partido sa pamumuno sa kilusang migrante, pagpapalakas ng kilusan ng migranteng manggagawang Pilipino at malawak na multisektoral na patriyotikong kilusang masa ng mga Pilipino sa iba’t ibang bansa. Tinatanaw ng Compatriots na sa paglakas ng mga kilusang ito, lalaki pa ang maiaambag nito sa anti-imperyalistang pakikipagkapatiran, gayundin sa pagsusulong ng internasyunal na proletaryadong rebolusyon.

Mahigpit na nakaugnay sa kalagayan ng mga migrante ang usaping kinakaharap ng mamamayan sa Pilipinas, tulad ng barat na sahod ng mga manggagawa at kawalan ng lupa, kabulukan ng mga burukrata-kapitalistang naghahari sa estado at pagkubabaw ng imperyalismong US sa lipunang Pilipino. Kung papipiliin, mas gugustuhin nilang manatili sa bansa kasama ang kanilang mga mahal sa buhay. Habang nasa labas ng bansa, pinakahangad nilang makauwi sa inang bayan.

Bilang mga Pilipino, kinikilala ang mga migrante bilang bahagi ng pambansang kilusang mapagpalaya. Ang solusyon sa kanilang migrasyon ay ang pagsusulong ng pambansa demokratikong rebolusyon. Hamon sa Compatriots ang pagpapalakas ng kilusan laban sa mapagsamantala at mapang-aping papet na reakyunaryong estado sa Pilipinas at pagpapalawak ng suporta sa matagalang digmang bayan sa gitna ng tumitinding pasismo sa mundo.

Tinatanaw ng Partido at ng mamamayang Pilipino ang maramihang pag-uwi ng mga migrante sa Pilipinas para lumahok sa rebolusyonaryong kilusan sa Pilipinas, laluna sa larangan ng armadong pakikibaka, para sa pagpapanday ng lipunang tunay na malaya, demokratiko at masagana.