Nasurok 7,000 mangmangged, kabilang dagiti kabataan ken dadduma pay a demokratiko a sektor, ti nagmartsa agturong ti Mendiola idiay Manila idi Mayo 1, Aldaw ti Tegged. Immawag da nga ingato ti sweldo iti makabiag a tukad iti intero a pagilyan. Adda met ti kapada a tignay kadagiti syudad ti Baguio, Angeles, Calamba, Naga, Cebu, Iloilo, Roxas, Bacolod, Davao, ken iti ili ti Rosario idiay Cavite.

Segun kadagiti mangmangged, rumbeng nga ingato ti minimum a sweldo iti makabiag a tukad a ₱1,200 gapu iti ngumatngato a balor ti panagbiag ken mano a dekadan a mapawpawilan ti panagngato ti sweldo. Iti agdama, adda iti 6% agingga 54% ti maaw-awat a sweldo dagiti mangmangged kumpara iti pagkasapulan da. Inrupir da a waswasen dagiti regional wage board a mangit-ited ti barya-barya a panagngato. Panawagan da met ti panangisardeng iti kontraktwalisasyon ken panangsalaknib iti karbengan iti unyon, karaman ti karbengan iti panag-organisa ken kolektibo a pannakitinnawar.

₱200 across-the-board

Kagiddan ti panawagan a makabiag a sweldo, induron ti National Wage Coalition (NWC) ti pannakaipasa a linteg ti ₱200 nayon a sweldo tapno dagus a maikkan ti bang-ar dagiti mangmangged. Iyab-abante ti koalisyon ti gakat iti sango ti manon a tawen a pannakaitantan dagiti gakat a nayon a sweldo iti Kongreso ken Senado. Nu maiduron, daytoy ti umuna a nailyan a panagngato ti sweldo a maidalan iti linteg iti napalabas a 36 tawen. Ti NWC ket bukbuklen ti 30 a sentro ti tegged, kabilang ti KMU.

Kas ti namnamaen, inulit laeng ni Ferdinand Marcos ti sungbat a “pagadalan” ti gakat a nayon. Kabaliktad daytoy iti kinapaspas ti panangipasa ti rehimen ti ehekutibo a mandato a nangnayon ti ₱200 iti inaldaw nga alawans kadagiti soldado ken pulis tatta a tawen.

Diskriminasyon iti sweldo iti kaaw-awayan

Makabiag a sweldo met ti awag dagiti mangmangged iti agrikultura iti Aldaw ti Tegged. Segun iti Unyon ng mga Manggagawa sa Agrikultura (UMA), nu nababan ti sweldo iti kasyudadan, nababbaba pay ti sweldo dagiti mangmangged-talon iti laksid ti napateg a papel da iti produksyon ti taraon.

Arig na “third class citizen” wenno nababbaba a klase ti umili dagiti mangmangged iti kaaw-awayan, segun iti UMA. Idiay Eastern Visayas kaspangarigan, adda iti ₱390 laeng ti sweldo dagiti mangmangged iti agrikultura, a 32.5% laeng ti makabiag a sweldo. Idiay Negros, nu sadinno a masarakan ti dadakkel nga asyenda, rinibo a mangmangged-talon ti nakagalut iti sistema ti pakyawan a nababbaba pay iti naikeddeng a minimum a sweldo ti maaw-awat dagiti mangmangged iti agrikultura.

Nayon iti barat a sweldo, sumangsango da met kadagiti saan a makatao ken napeggad a kundisyon iti trabaho. Masansan a maisarsarang da kadagiti napeggad a kemikal, nakaro a pudot ti aldaw ken dadduma pay a sitwasyon a makapadakes iti salun-at.

Karit kadagiti mangmangged a Pilipino

Iti pablaak ti Communist Party of the Philippines iti Aldaw ti Tegged, inallukoy daytoy dagiti mangmangged a Pilipino nga agkaykaysa ken agtignay tapno agserbi a natibker a bugas, nalawa a pwersa ken daulo iti dangadang ti umili a Pilipino para iti wayawaya ti pagilyan ken kagimongan.

Kasapulan nga iyabante dagiti militante a dangadang ti unyon tapno ilaban ti makabiag a sweldo, ken salakniban ti demokratiko nga interes ken pagimbagan dagiti mangmangged, kuna daytoy. Nasken a pangiggeman ken usaren ti welga kas armas kadagiti pang-ekonomya ken pangpulitika a dangadang da.

Kuna ti Partido, rumbeng nga ikabil dagiti mangmangged a Pilipino ti intar da iti unaan dagiti dangadang ti umili, kabilang iti panaglaban iti korapsyon ti agar-ari a rehimen, dagiti pasista a krimen, awan-sarday a panagngato ti presyo dagiti gagatangen ken saan a nainkalintegan nga importasyon ti bagas. Kasapulan a paawengen ti panawagan para iti pudno a reporma iti daga, nailyan nga industriyalisasyon ken nailyan a demokrasya.

Nasken met a labanan ti Balikatan ken dagiti war games a pangparparnuay ti gera ti US ken ti panagpakpakaaso-aso ti rehimen Marcos iti imperyalista nga amo na. Nagpanawagan met daytoy kadagiti mangmangged a Pilipino nga ipakita ti pannakikaykaysa iti umili a Palestino laban iti henosidyo ti Zionista nga estado ti Israel.