Ibunbunannag ti agar-ari a sistema ti bukod daytoy a kinabulok iti mapaspasamak tatta a reaksyunaryo nga eleksyon. Kadagiti napalabas a bulan ti panagkampanya para iti eleksyon iti senado, kongreso ken dagiti lokal a gubyerno, naimatangan ti umili nu kasano a ti eleksyon iti Pilipinas ket dominado dagiti dinastiya ken partido a mangibagbagi iti interes dagiti imperyalista a gangannaet ken sumagmamano, ken saan a ti interes ti mayorya ti umili.

Ti eleksyon 2025 ket pagar-arian dagiti kabulokan a bunggoy ti agar-ari a dasig: dagiti Marcos ken Duterte, nga agpada a napeklan iti korapsyon, panagikuspil ken panangidadanes iti umili, ken iti kina-paspasurot kadagiti diktar ti imperyalista a gangannaet. Ti dua a bunggoy ket aggubgubal tapno maiggeman ti turay iti panggep a palawaen ti kinabaknang da ken burukratiko a pribilehiyo ken makalibas kadagiti sungsungbatan kadagiti krimen da iti umili.

Gagem ti bunggoy a Marcos a pagarian ti kongreso, senado ken dagiti LGU tapno ad-adda a mapairut ti kontrol iti poder ken parnuayen ti kundisyon para iti panagpaut iti bileg ti dinastiya da labes iti 2028. Ti panangipabalud ken Duterte iti International Criminal Court nu sadinno a nakaisaklang isuna kadagiti krimen laban iti sangkataw-an, ket inikkan dalan ni Marcos iti gandat nga idiskaril dagiti karibal na iti pulitika. Agsumsumbangir ti pabuya ken gimik ti rehimen Marcos tapno maala ti nalawa a suporta ti umili. Nupay kasta, mapapaay daytoy a kaluban ti nakaro a krisis ti kinarigat gapu ti awan-sarday a panagngato ti presyo dagiti gagatangen, nababa a sweldo ken kinaawan ti pagsapulan.

Agkamkamat dagiti Duterte a maiserrek ti naan-anay a bilang dagiti tauhan da iti Senado, kangrunaan tapno lapdan ti impeachment ken Vice President Sara Duterte, nga akusado iti naanomalya a panaggastos iti ginasut a milyon a piso a badyet ti gubyerno. Tapno alaen ti simpatya ti umili, parparwaren da nga isuda ket biktima ti pulitikal a panagikuspil ni Marcos. Ngem napaay da a buraen ti sadiwa a lagip ti masa iti nasaknap a kinaranggas ken panagsagaba da iti sidong ti napalabas a rehimen, ken apputen ti pukkaw ti umili para iti hustisya iti amin a biktima ti pasista a krimen ti tirano a ni Duterte.

Ipakpakita ti dominasyon ti dua a bulok a bunggoy iti eleksyon 2025 ti nakadakdakes a panagbobotos iti sidong ti malakolonyal ken malapyudal a sistema iti Pilipinas. Daytoy ket balubal ti sumagmamano a nabileg, nu sadinno nga awan ti pudno nga espasyo para kadagiti masa a maidadanes ken magungundawayan. Parparwaren da a ti eleksyon ket demokratiko, idinto a ti kinapudno ket para laeng daytoy kadagiti burukrata kapitalista, burges komprador ken apo’t daga.

Kadagiti napalabas a bulan, nangparnuay ti napigsa a tagari ti pannakipaset dagiti demokratiko, progresibo ken patriyotiko a kandidato ken partido iti eleksyon iti senado ken kongreso. Inawit da iti kampanya iti eleksyon dagiti panawagan para iti makabiag a sweldo ken tangdan, pudno a reporma iti daga, pannakaibaba ti presyo dagiti gagatangen, libre a serbisyo iti salun-at, edukasyon, trabaho, karbengan, wayawaya ken dadduma pay a kadawatan ti umili. Nagtaud ti kaadwan kadakuada iti intar dagiti mannalon ken mangmangged, dagiti nakurapay iti syudad, mangngalap, drayber ken dadduma pay a maidadanes a sektor.

Kaniwas daytoy kadagiti reaksyunaryo a pulitiko nga agintutuleng kadagiti pukkaw ti umili. Nu agpostura da man a maka-masa, dayta ket agpatengga iti eleksyon laeng. Babaen ti nauneg a bubon ti kinabaknang da, rimrimbawan da met tattan ti panagbobotos ti party-list ken ik-ikkatan da ti lugar dagiti partido a pudno a mangibagbagi iti marigrigat a sektor ti kagimongan.

Ginasut a milyon a piso ti gastos da para kadagiti patalastas iti radyo ken telebisyon, tapno tateken dagiti pader ken poste kadagiti poster da ken agiwaras kadagiti kamiseta a natatakan kadagiti rupa ken nagan da. Kagiddan na, kasla uong a nagsiruk-at dagiti sarbey tapno impluwensyaan ti panunot ti umili. Kagiddan daytoy ti panagaramat kadagiti mabaybayadan a para impluwensya iti social media tapno iduron ti panagtatalantan pabor iti interes dagiti pulitiko wenno partido. Ginasut a milyon a piso ti sigurado nga aglayus pay bayat nga umadani ti kaaldawan ti eleksyon tapno igatang ti botos.

Agsusumbangir dagiti kaso ti pammapatay ken kinaranggas dagiti agkakaribal a pulitiko iti nadumaduma a paset ti pagilyan. Kinaranggas met ti estado ti us-usaren dagiti ahente ti militar, pulis ken NTF-Elcac tapno lipiten dagiti progresibo a kandidato ken partido, babaen ti surbeylans, panagipila ti pinarbo a kaskaso, panag-aresto ken panagibalud ken pammutbuteng kadagiti pwersa ken tagasuporta da.

Sigurado a balbaliw nga aramaten ti nakatugaw iti turay ti dekompyuter a panagbilang ti botos tapno pumabor kadakuada ti agbalin a resulta ti eleksyon. Isu a pumigpigsa ti panawagan para iti mano-mano a panagbilang ti botos a mangted koma ti dakkel a kinasigurado nga usto a mabilang dagiti botos. Nupay kasta, agtultuloy a saan nga ikaskaso daytoy ti Comelec. Mapatta-patta a dakkel a bilang dagiti migrante a mangmangged a Pilipino ti saan a makabotos gapu iti naaramid nga online voting.

Siasinoman kadagiti Marcos wenno Duterte ti agari iti dumteng a panagbobotos, sigurado nga agtuloy ken ad-adda a pumardas ti pannakabulok ti reaksyunaryo nga estado, iti sango ti awan pannakarisut na a krisis ti agar-ari a sistema. Agtuloy daytoy nga agipatungpal kadagiti programa ken linteg a pabor iti interes ti imperyalismo a US, ti dadakkel a gangannaet a kumpanya ken dagiti agar-ari a dasig, a mangitunda ti ad-adda a panagsagaba ti umili. Sigurado a kumaro pay ti korapsyon iti panangsubbot dagiti burukrata kapitalista ti ginasut a milyon nga inpuonan da iti eleksyon.

Kasapulan nga agtuloy a patibkeren ti solido nga organisado nga intar ti umili a Pilipino ken agpinget iti dana ti militante a dangadang, nangruna iti panangsango iti dadakkel a laban kadagiti umay a bulan ken tawen, kabilang ti panaglukat ti panagdengngeg ti Senado kanaig iti impeachment ni Sara Duterte ken panagusig ken Rodrigo Duterte iti ICC, kasta met ti laban iti uming-inget nga interbensyon militar ti US iti Pilipinas ken panangprobokar ti gera kontra iti China, iti panagpakpakaaso-aso ni Marcos, iti kontra-umili ken parigat a patakaran, korapsyon, kinainutil ken pasista a panagikuspil ken panagatake ti rehimen Marcos iti umili.

Kadagiti napalabas a bulan, nakaad-adu manen ti nailukat ti mata na iti kinabulok ti reaksyunaryo nga eleksyon ken ubbaw a demokrasya iti sidong ti agar-ari a sistema. Ipampamatmat daytoy iti umili a pudno a rebolusyonaryo a panagbalbaliw ti solusyon kadagiti pundamental a problema ti umili. Tuluy-tuloy a pumigpigsa ken lumawlawa ti National Democratic Front ken amin a kameng nga organisasyon daytoy, ken ar-aramiden daytoy ti amin a kabaelan tapno tumulong iti panangpapigsa ti New People’s Army (NPA) ken panangiyabante ti armado a dangadang.

Iti kaaw-awayan, agtultuloy nga agpingpinget ken agpappapigsa ti NPA iti laksid ti awan-ressat ken brutal a gera ti panagikuspil ti rehimen Marcos. Agtultuloy a papaunegen ken palpalawaen ti NPA ti pannakisilpo daytoy iti masa a mannalon tapno iyabante dagiti anti-imperyalista, anti-pasista ken antipyudal a dangadang da, papigsaen dagiti timpuyog ti masa ken iruswat dagiti kabaelan da a taktikal nga opensiba. Iti tarabay ti Partido ken ti tignay panagilinteg, sigurado nga agtuloy a dalyasaten ti gubat ti umili ti dana ti panagabante.