Masarakan ti kadakkelan a bilang dagiti mangmangged a Pilipino idiay Southern Tagalog. Iti kabuklan, 18% ti intero a pwersa ti tegged ti pagilyan ti adda iti rehiyon. Maikadwa ditoy ti National Capital Region nu sadinno a bumilbilang iti 10.4 milyon dagiti mangmangged. Nakakonsentra iti Calabarzon ti 12.1 milyon iti 14.2 milyon a pwersa ti tegged ti rehiyon.

Saan pay a karaman ditoy ti saan nga ibilbilang ti estado a pwersa ti tegged kas kadagiti agtagibalay, retirado, out-of-school a kabataan, nagturpos ngem awan ti mastrekan a trabaho, addaan rangkap ken dagiti saan a nagsapul ti trabaho iti uneg ti innem a bulan. Iti kaudian nga inruar a surbey ti reaksyunaryo nga estado, ti “labor force participation rate” wenno porsyento ti populasyon ti edad 15 agpangato a mairamraman iti pwersa ti tegged ket 64.8% laeng iti Calabarzon ken 64.2% iti Mimaropa.

Kadagiti addaan trabaho, apag-katlo ti nakategorya a self-employed wenno agiyem-empleyo iti bukod na. Malaksid ditoy, adda 7% a maibilbilang iti employed ngem awanan sweldo wenno saan a mabaybayadan ti tegged na. Nu pagtipunen ti dua a kategorya, 35% daytoy ti pwersa iti tegged nga addaan bilang a 3.2 milyon iti intero a rehiyon. Nu inayon daytoy iti upisyal a bilang ti awanan trabaho, adda ti makapasidduker a bilang a 3.7 milyon nga awanan pormal a pagsapulan iti intar ti 9.2 milyon a pwersa iti tegged ti Southern Tagalog. Nayon kadakuada ti adda iti 1.4 milyon a mangmangged nga underemployed wenno kurang iti trabaho.

Nababa a sweldo

Ti tinangdanan ken agsusweldo a mangmangged iti rehiyon ket mangbukbukel iti 64% ti pwersa ti tegged nga addaan trabaho. Adda iti pribado a kumpanya ti 4.4 milyon, bayat nga empleyado ti gubyerno ti 777,000.

Nakababbaba ken saan a makabiag ti pamilya ti tangdan nga ibaybayad ti kapitalista ken burukrata kapitalista kadagiti mangmangged, iti pribado man wenno iti sektor publiko. Iti Calabarzon, ti minimum a tangdan idi Mayo 2024 ket ₱522 laeng iti tunggal aldaw idinto a ti naikeddeng a makabiag a tangdan para iti 5-katao a pamilya ket ₱1,122 tunggal aldaw. Idiay Mimaropa, makapaasi a ₱352 tunggal aldaw ti minimum a tangdan idi Marso 2024, adayo iti naikeddeng a makabiag a tangdan para iti 5-katao a pamilya a ₱1,213. Aglanglanga a patakaran ti reaksyunaryo a gubyerno ti saan a makatao a sapul ti mangmangged.

Minilyon dagiti mangmangged ngem bassit a bilang laeng ti organisado kadagiti unyon a kangrunaan nga organisasyon a mangiyabante iti karbengan da iti nainkalintegan a sweldo. Iti rekord idi 2021-2022, iti kabuklan a bilang a 34,543 kumpanya iti pagilyan nga addaan kababaan a 20 mangmangged agpangato, 1,464 kumpanya wenno 4.2% laeng ti addaan rehistrado nga unyon. Basbassit daytoy iti dati a 6.3% idi 2018.

Terorismo ti sungbat ti rehimen iti panaglaban ti dasig a mangmangged

Ti sigud a pasista a panangipawil iti panagunyon dagiti mangmangged ket inartapan pay ti agdadata a terorismo ti estado babaen ti pannakaipasa ti linteg nga Anti-Terrorism Law. Ti reaksyunaryo nga estado ti agiyar-aramid ti terorismo laban iti kadawyan nga umili nangruna laban kadagiti mangmangged, aktibista, dagiti tao nga addaan nainkalintegan nga adbokasiya ken dagiti kritiko ti gubyerno. Nasaknap nga ar-aramaten dagiti militar, pulis ken ahensya ti estado kas ti NTF-Elcac ti Red-tagging a mangpunpuntirya kadagiti lider ken aktibista a kameng ti unyon. Panagsagana daytoy tapno ipatungpal ti pammapatay, panagdukot ken panangpukaw kadakuada. Nalatak nga ehemplo daytoy ti operasyon ti PNP-Calabarzon a naawagan a Bloody Sunday idi Marso 7, 2021 a nangpapatay iti siyam a lider ken organisador kabilang ti lider-mangmangged a ni Manny Asuncion. Kalpasan ti sumagmamano a lawas, pinapatay da met ni Dandy Miguel, presidente ti unyon iti Fuji Electronics idiay Laguna.

Idi nasapa a paset ti 2023, maysa a delegasyon ti International Labour Organization (ILO) ti nagiyaramid ti imbestigasyon iti kasasaad dagiti unyon ken nagiyebkas ti panangkundenar iti taray ti kapanunotan ti reaksyunaryo a gubyerno a kanayon nga isilsilpo daytoy ti unyonismo iti komunismo. Manipud 2016, 76 unyonista ken organisador ti naimaldit a pinapatay dagiti pwersa a pangseguridad ti estado. Uray kalpasan ti misyon ti ILO iti pagilyan, uppat pay nga unyonista ti naiyulat a napapatay.

Naadaw iti Kalatas, Mayo 2025.